الحظ لما يهادى ....... يخلى الاعمى ساعاتى

Monday 14 May 2012

حلمي أنا

يــــــــــــــــــــــــــــــــاه الكتابة وحشتني أوي، تقريبا ماكتبتش حاجة من شهر مارس ودي كانت أطول فترة أقعد ماكتبش فيها من ساعة 
مالاقيت الكتابة والكتابة لاقيتني

كنت كل شوية أفتح البلوج وأتفرج على الحاجات اللي كتبتها قبل كدة وأحاول أكتب حاجة جديدة ماعرفش، وأقوم قافلة البلوج وأشغل نفسي
 بأي حاجة تانية، وفي كل مرة كنت بعمل كدة كان في شعور بيكبر جوايا إني مش هاعرف أكتب حاجة تانية زى اللي كتبتها قبل كدة، هما أكيد مش أعظم حاجة مكتوبة في الدنيا وممكن كتير يشوفوها أي كلام، بس أنا كنت شايفاها حاجات بسيطة أوى بس كبيرة أوي عندي
وبطلت أقول لاي حد إني بكتب زي زمان، مابقيتش فخورة باللي بعمله ولا بقيت شايفاه أكبر أحلامي، ولما كنت بتكلم في الموضوع مع الناس كانوا بيقولولي ممكن مايكونش ده حلمك يا هديل

كنت خايفة أواجه نفسي بالحقيقية دي، خايفة تكون هي دي الحقيقة فعلا وأرجع تاني أدور على هدف لحياتي، خايفة أرجع تاني للحياة بلا هدف لانها حياة قميئة ومزرية، حياة تخليك تيجي الدنيا وتخرج منها من غير ماتكون عملت أي حاجة
أكيد مش كل الناس لازم تاخد نويل، أنا بتكلم على إحساسك لما تكبر وتبص على حياتك اللي عيشتها وتحس إنك راضي عن كل لحظة فيها، عن كل حاجة عملتها عشان بتحبها، عن كل أمل إتمنيته وحققته، عن كل هدف حطيته في دماغك ووصلتله المهم إنك تكون راضي   
عن حياتك، مش مهم الناس تشوفك عظيم ولا مشهور ولا يتمنوا يبقوا زيك، المهم إنت تشوف وتحس بكدة وبعدين تيجي الناس مش العكس


لكن أنا عملت العكس (ماشاء الله عليا طول عمري مبدعة) كنت مستنية أشوف حلمي في عيون الناس قبل حتى ما شوفه في عيني، كنت 
مستنياهم يقدروا مع إني بعمل كل ده عشان خاطر نفسي مش حد تاني


والشخص الوحيد اللي كان محتاج إني أدافعله عن حلمه، اللي كان بيدورعليه من زمان، خذلته. أيوة أن خذلت نفسي وسمحت للناس إنها تضيع حلمها ومادفعتش عنه


 أنا مش عارفه أعيش من غير ماكتب، مش عارفه ما أقولش رأيي من غير ماببداه بجملة "انا ككاتبة مشهورة شايفه"، مش عارفه 
ماتريقش على نفسي وأقول"أنا كاتبة بس مابعرفش عربي"، مش عارفه أتصور حياتي من غير ماكون بكتب


بس اللي أنا عارفاه كمان إن اللي مايدافعش عن حلمه مايستحقهوش



9 comments:

Hoda Abdel Zaher said...

لا يا هديل انتي كاتبة مشهورة و متميزة و اللي مريتي بيه بسبب ظروف احنا فيها كلنا و طبيعي ان الانسان بيمر باوقات بيكون مش قادر يواصل حياته زي ما كان راسمها بس الاهم انك تقدري تتغلبي علي اللحظات دي و تعديها بقوة ...الحاجة الوحيدة اللي بتغير مسارنا عن تحقيق احلامنا هي اننا نلاقي حلم جديد احلي من وجهة نظرنا بس عاوزة اقولك انك علي قد ما بتكوني مستمتعة بكتابتك انا بحب اقرالك و اكيد غيري كتيير..دافعي عن حلمك و هتقدري و مستنية منك مقال جديد ان شاء الله :)

Laila Abd El Hady said...

بس اللي أنا عارفاه كمان إن اللي مايدافعش عن حلمه مايستحقهوش
♥♥

Heba Sayed Mostafa said...

fصي ياهديل مش مهم تكوني مشهورة بين الناس اد ما تكوني مشهورة ادام نفسك.ومش علشان قابلتي مشكلة في حاجة تعتبر بنسبالك مش أهم حاجة رغم ان الناس كلها شايفة ان دي أهم حاجة انك تخسري الأهم بالنسبة لنفسك وهي الكتابة؛لأن انت عندك موهبة بجد موهبة صادقة بمعني اني لما اقرئلك جاجة انت كتباها بتزعل بجد بشوف انك فعلن زعلانة كاني شيفاتكي ادامي بتكلمي مش مجرد كلام مكتوب. وكمان لما تكتبي حاجة وانت مبسوطة بيكون وشك بيضحك جوة الكلام. اوعي تسيبي الكتابة علشان اي حاجة تانية.لان الكتابة دي اولا واخيرا هي هديل بالنسبة لهديل . ولما ياستي تكوني عاملتي كل حاجة وبأتي مبسوطة دوري على جاجة جديدة و اعمليها حتى ل هتبدأي من الأول بس لازم تكون جنب الكتابة لأن دي فعلا الحاجة الحقيقية فيك

هديل مصباح said...

اول مرة يا هبة تقولى كلام حلو روحى يا بنتي انا مسمحاكي تقدرى تاخدى مكانى عادى :)

Mariam Gaber Mohamed said...

Super like :)
‎3ayza 2a2olek en ana kaman wa7ashne ene 2a2ralek :)

هديل مصباح said...

enty elly batlty te2ry elawel we ba3d keda ana batlt akteb

Du said...

Luv it awiiiiiiiiii .keep it up and fight for ur dream hadeel <3 <3

zahraa mohamed said...

انت بجد موهبتك فى الكتابة مالهاش حل واسلوبك فى منتهى النعومة وبيوصل لقلوبنا من غير استئذان اناقريت معظم مقالاتك وعجبانى كلها انت فعلا بتتكلمى عننا بالظبط استمررررررررررررى من فضلك وحشانى جدا والله ووحشتنى ضحكتك الجميلة

هديل مصباح said...

زهرةةةةةةةةةةةةةةةةةةةةةةةةةةةة