الحظ لما يهادى ....... يخلى الاعمى ساعاتى

Sunday 6 February 2011

طهقان زهقان مضايق


ايه يا جدعان ده الواحد مبقاش فاهم اى حاجه كل ما يقعد قدام برنامج فى التليفزيون يقوم مغير كل ارائه، يتناقش مع اهله يغير رأيه تانى، يسمع الناس فى الشارع يغير رأيه تالت، وفى ناس ريحت نفسها وبطلت تتفرج على التلفزيون خالص وعملت تعتيم اعلامى ولو اى حد سألها السؤال الغبى بتاع مع ولا ضد تقوله انا عايز ربع جنيه واروح

بعد ماكان الواحد مبسوط ومش مصدق ان الشباب اللى كان فاكر اخرها لما تفكر توقف شعرها ولا تجلجله عملوا ثوره، والشباب بتوع كل شارع اللى كان فاكرهم صيع كانوا هما اول ناس شالوا شوم وسيوف ووقفوا يدافعوا عنه، دلوقتى بقى غالبية الناس عايزين حد يروح يحرر ميدان التحرير من الاستعمار المصرى، بعد ما الناس كلها لاقت حاجه تتكلم فيها غير الكوره، وكل واحد كان نفسه يدخل شرطه حقق حلمه، سدوا نفسنا تانى

تلاقى ناس طالعه دلوقتى تقولك مبارك ده ابونا، هو فى حد برضه يعمل كده فى ابوه؟ كانوا فين ياترى من بداية الثورة اكيد مخدوش بالهم علشان كانوا فى الحمام

وبعدين هو اى رئيس دوله يبقى ابو شعبها يعنى احنا بلد ناميه حتى فى دى، طيب ده على كده ثروة الريس مش هتكفى عياله من الشعب، المشكله انهم مقالوش انه ابونا من الاول ماحنا كده يا جماعه ظلمناه امال هيصرف على التمانين مليون منين يعنى

واحب بس ارد على سؤال انت ينفع تعمل كده فى ابوك؟ لو ابويا سايبنى من غير اكل ولا شغل وعندى امراض الدنيا ومش لاقى العلاج ولا عارف اخد حقى ومش عارف اتجوز طيب ياترى هى دى الابوه الحديثه اللى بيقولوا عليها

وناس تانيه عندها ياشيزوفرنيا يا دى بداية زهايمر، يقولولك دول وقفوا حالنا عايزين نرجع زى زمان، دلوقتى عايزين ترجعوا تعيشوا زى زمان، مش زمان ده اللى كانت الاسعار فيه مولعه، وكل حاجه بالطابور، ومفيش حاجه بتمشى من غير فلوس، وكل الناس قلقانه على شغل عيالها وجوازهم، وكنا عايشين فى جمهورية امناء الشرطة، ايه بالظبط اللى وحشكوا فى زمان علشان مش واخده بالى

واللى يقولك ميدان التحرير كله اجندات خارجيه، فجأه كده التحرير بقى فيه فتح وحماس وحزب الله وايران لا وكمان الموساد، امال المصريين موجودين فين اكيد بقى قاعدين فى البيت بيتفرجوا على الجزيره

وناس تقولك دول بيدولهم فلوس علشان يفضلوا فى التحرير بالدولار واليورو على اساس ان الجنيه المصرى اتمرمط اليومين دول اكتر ماهو متمرمط قبل كده، وازاتين ميه تقريبا علشان يغسلوا بيها وشهم من القنابل المسيله للدموع، وكنتاكى تقولى اشمعنى كنتاكى ليه مش مؤمن على اساس يعنى كلنا مصريين فى بعضينا، اقولك علشان الاجندات الخارجيه

طيب لو فعلا الموضوع فيه فلوس واكل كان الشعب المصرى كله طلع حد طايل ياخد حاجه ببلاش واهو هيضرب عصفورين بحجر يتظاهر وياكل كنتاكى

وناس تانيه مشوفنهاش خالص، الفنانين والمغنين نظامهم ايه بس علشان الواحد مبيسمعش غير على اللى اسمهم خالد، اى حد اسمه خالد دلوقتى تلاقيه فى ميدان التحرير، الباقى فين ياترى ولا هما ملهمش غير فى الكوره اى انتصار فى غير ماتشات الكوره مبيفهمهوش، فين نجم الجيل اكيد طبعا راح يشوفله جيل تانى اصل الجيل ده مش فاضيله كله راح ميدان التحرير، بلاش ده الهضبه اكيد مش موجود ماهى هضبه الهرم اتسرقت، طب فين الممثلين اللى كل افلامهم فيها اعتراض على النظام اكيد بقى مشغولين فى فيلم جديد عن الثورة، كان الله فى العون، ولا هى الزعامه فى التمثيل بس

وفى ناس تانيه مش دريانه بحاجه ونفسها كل ده يخلص علشان السينمات اللى قافله تفتح ويعرفوا يخرجوا مع صحابهم ويرجعوا لحياتهم الورديه اللى كانوا عايشنها فى المدينه الفاضله، لو تعرف حد منهم غطيه كويس علشان ميستهواش









Thursday 3 February 2011

جديد * جديد

من ساعة ما بدأت اكتب من شهر 5 اللى فات، من زمان اوى يعنى كان لما بيحصل اى حاجه سياسيه وحد يقولى اكتبى فيها اقوله انا مابكتبش فى السياسه، مع انى بكالريوس علوم سياسيه يعنى تقدروا تقولوا كده ان النجار نسى يركب لنفسه باب اصلا. معرفش ليه مكنتش بحب؟ كنت دايما بحس انى رأيى ناقص وان فى ناس بتفهم احسن منى وهتكتب احسن منى

تقولولى ايه اللى خلاكى تكتبى النهارده؟ اقولكم انى حسيت انى محتاجه اتكلم، محتاجه اقول رأيي اللى فضلت انا وكتير اوى زيى فاكرين انه ملوش قيمه وعمرنا ماهنقدر نعمل حاجه وكمان خايفين نقوله

بس النهارده انا برضه مكتبتش فى السياسه، انا بكتب عن حياتنا وعن بلدنا التى اتغيرت 360 الف درجه من ساعة ماشوفت ايفنت يوم الغضب على الفيسبوك وقولت لنفسى ياريت كانت الحاجات دى بتغير حاجه، وبعد ماشوفت اللى حصل من يوم 25 يناير اعدت اسأل نفسى هو حب الوطن ده حاجه بنتولد بيها ولا بنكتسبها بعد كده، طيب هى موجوده فعلا جوايا طيب فين بالظبط فى قلبى ولا عقلى ولا فين

بس مدورتش على الاجابه كتير الصراحه، ولاقيت الاجابه بسيطه اوى حب الوطن هو اللى خلى ناس بتضحى بنفسها علشان ناس تانيه تعيش حياه كريمه، حب الوطن هو اللى مخلى كل الناس اللى مشاركوش فى الثوره بيعيطوا بالدم مش بالدموع، حب الوطن هو اللى بيخلى كل واحد فينا النهارده بيزعل ويفرح ويزعق ويهتف ويقلق ويستريح ويعيط من الحزن ويعيط من الفرحه كل ده فى يوم واحد، حب الوطن هو اللى بيخلى كل واحد فينا شويه يخاف من بكره وشويه يحس هو ازاى كان عايش النهارده وفى بكره ممكن يجى حلو كده عمره مافكر انه يحلم بيه، حب الوطن هو اللى بيخلى كل شاب وراجل بينزل من بيته علشان يدافع عن كل ام وكل اخت وكل حد كبير فى السن، بعد ماكانت غالبيه البنات وانا اولهم بيقولوا الرجاله ماتوا فى 73، بس طلعوا مماتوش فى 73 دول اتولدوا فى 25 يناير، حب الوطن هو اللى بيخليك لما بتمشى فى الشارع دلوقتى بتتحسر وتبكى على الشوارع اللى كانت مبتنطفيش قبل كده ده طبعا قبل ما يرشدوا استخدام الكهرباء، بس بتقول لنفسك بينا هاترجع احسن من الاول ان شاء الله

بس احنا طلعنا كلنا بنحب مصر بس مكناش عارفين، طلعنا اجدع شعب فى العالم بس مكناش حاسين، طلعت كلمة مصرى مبتتقدرش بتمن واحنا اللى عشنا طول عمرنا فاكرين اننا ملناش قيمه لا جوه بلدنا ولا براها، عرفنا معنى كلمة مصر ام الدنيا بعد مكنا بنتريق عليها لان فعلا مصر ام الدنيا واحنا المصريين علمنا الدنيا حاجات مكانتش تعرفها ولا احنا كمان كنا عارفين اننا نعرفها

انا حاسه اننا كلنا اتولدنا من جديد، حاسه ان الايد اللى لمت زباله من الارض عمرها ماهتتمد وترمى حاجه على الارض تانى، الايد اللى مسكت سلاح علشان تدافع بيه عن الارض والعرض عمرها ماهتتحرش بأى بنت تانى، اللسان اللى مبيطلش قولت يارب مش هيطلع كلمة وحشه لاى حد تانى، الضمير اللى صحى وبقى بيأنب الناس اللى فى البيوت علشان هيناموا فى الدفا وناس تانيه سهرانه فى البرد عمره ماهيموت تانى، الخوف اللى فضل طول عمره ساكن قلوبنا عمره ماهيعرف يدخلها تانى، بعد ماعرفنا مين الاصيل ومين المصدى عمرنا مهننسى تانى

احنا مش بس غيرنا احنا كمان اتغيرنا، رجعنا نحترم نفسنا تانى، رجعنا بنقول رأينا تانى، رجعنا ايد واحده تانى، رجعنا اخوات تانى بس من ملايين الابهات والامهات،

متفتكروش ان التمن كان غالى لا اللى كسبناه اغلى واغلى، كان لازم حاجه زى دى تفوقنا وتجمعنا وتعرفنا ان فى حاجات اغلى من الاكل والشرب

متفتكروش ان اللى ضاع مش هيرجع واللى اتكسر مش هيتصلح وان زمن المعجزات خلص خلاص ده شكله كده لسه بيبتدى، متخافوش على مصر ده ليها رب اسمه الكريم وشعبها ميعرفش المستحيل وجندها خير اجناد الارض