الحظ لما يهادى ....... يخلى الاعمى ساعاتى

Thursday 3 February 2011

جديد * جديد

من ساعة ما بدأت اكتب من شهر 5 اللى فات، من زمان اوى يعنى كان لما بيحصل اى حاجه سياسيه وحد يقولى اكتبى فيها اقوله انا مابكتبش فى السياسه، مع انى بكالريوس علوم سياسيه يعنى تقدروا تقولوا كده ان النجار نسى يركب لنفسه باب اصلا. معرفش ليه مكنتش بحب؟ كنت دايما بحس انى رأيى ناقص وان فى ناس بتفهم احسن منى وهتكتب احسن منى

تقولولى ايه اللى خلاكى تكتبى النهارده؟ اقولكم انى حسيت انى محتاجه اتكلم، محتاجه اقول رأيي اللى فضلت انا وكتير اوى زيى فاكرين انه ملوش قيمه وعمرنا ماهنقدر نعمل حاجه وكمان خايفين نقوله

بس النهارده انا برضه مكتبتش فى السياسه، انا بكتب عن حياتنا وعن بلدنا التى اتغيرت 360 الف درجه من ساعة ماشوفت ايفنت يوم الغضب على الفيسبوك وقولت لنفسى ياريت كانت الحاجات دى بتغير حاجه، وبعد ماشوفت اللى حصل من يوم 25 يناير اعدت اسأل نفسى هو حب الوطن ده حاجه بنتولد بيها ولا بنكتسبها بعد كده، طيب هى موجوده فعلا جوايا طيب فين بالظبط فى قلبى ولا عقلى ولا فين

بس مدورتش على الاجابه كتير الصراحه، ولاقيت الاجابه بسيطه اوى حب الوطن هو اللى خلى ناس بتضحى بنفسها علشان ناس تانيه تعيش حياه كريمه، حب الوطن هو اللى مخلى كل الناس اللى مشاركوش فى الثوره بيعيطوا بالدم مش بالدموع، حب الوطن هو اللى بيخلى كل واحد فينا النهارده بيزعل ويفرح ويزعق ويهتف ويقلق ويستريح ويعيط من الحزن ويعيط من الفرحه كل ده فى يوم واحد، حب الوطن هو اللى بيخلى كل واحد فينا شويه يخاف من بكره وشويه يحس هو ازاى كان عايش النهارده وفى بكره ممكن يجى حلو كده عمره مافكر انه يحلم بيه، حب الوطن هو اللى بيخلى كل شاب وراجل بينزل من بيته علشان يدافع عن كل ام وكل اخت وكل حد كبير فى السن، بعد ماكانت غالبيه البنات وانا اولهم بيقولوا الرجاله ماتوا فى 73، بس طلعوا مماتوش فى 73 دول اتولدوا فى 25 يناير، حب الوطن هو اللى بيخليك لما بتمشى فى الشارع دلوقتى بتتحسر وتبكى على الشوارع اللى كانت مبتنطفيش قبل كده ده طبعا قبل ما يرشدوا استخدام الكهرباء، بس بتقول لنفسك بينا هاترجع احسن من الاول ان شاء الله

بس احنا طلعنا كلنا بنحب مصر بس مكناش عارفين، طلعنا اجدع شعب فى العالم بس مكناش حاسين، طلعت كلمة مصرى مبتتقدرش بتمن واحنا اللى عشنا طول عمرنا فاكرين اننا ملناش قيمه لا جوه بلدنا ولا براها، عرفنا معنى كلمة مصر ام الدنيا بعد مكنا بنتريق عليها لان فعلا مصر ام الدنيا واحنا المصريين علمنا الدنيا حاجات مكانتش تعرفها ولا احنا كمان كنا عارفين اننا نعرفها

انا حاسه اننا كلنا اتولدنا من جديد، حاسه ان الايد اللى لمت زباله من الارض عمرها ماهتتمد وترمى حاجه على الارض تانى، الايد اللى مسكت سلاح علشان تدافع بيه عن الارض والعرض عمرها ماهتتحرش بأى بنت تانى، اللسان اللى مبيطلش قولت يارب مش هيطلع كلمة وحشه لاى حد تانى، الضمير اللى صحى وبقى بيأنب الناس اللى فى البيوت علشان هيناموا فى الدفا وناس تانيه سهرانه فى البرد عمره ماهيموت تانى، الخوف اللى فضل طول عمره ساكن قلوبنا عمره ماهيعرف يدخلها تانى، بعد ماعرفنا مين الاصيل ومين المصدى عمرنا مهننسى تانى

احنا مش بس غيرنا احنا كمان اتغيرنا، رجعنا نحترم نفسنا تانى، رجعنا بنقول رأينا تانى، رجعنا ايد واحده تانى، رجعنا اخوات تانى بس من ملايين الابهات والامهات،

متفتكروش ان التمن كان غالى لا اللى كسبناه اغلى واغلى، كان لازم حاجه زى دى تفوقنا وتجمعنا وتعرفنا ان فى حاجات اغلى من الاكل والشرب

متفتكروش ان اللى ضاع مش هيرجع واللى اتكسر مش هيتصلح وان زمن المعجزات خلص خلاص ده شكله كده لسه بيبتدى، متخافوش على مصر ده ليها رب اسمه الكريم وشعبها ميعرفش المستحيل وجندها خير اجناد الارض

























7 comments:

Princesa De Corazones said...

The best I read since the beginning of these events

Faten Hafez said...

bgd helw awi we dah sho3ry fe3lan we sh3or kol wa7d 3ayesh fi el bald deh

Laila Abd El Hady said...

More than amazing ya Hadee this is our new country wiz its new people : ) w ana men el nas elly betebky dam mesh domo3 3ashan 7ad mana3ha enaha tenzel el mozahrat :'(

Mariam Gaber Mohamed said...

amazing ya doooo w bgd congrats to Egypt ana fe3lan delwa2te 22dr 2a2ol i proud 4 being egyptian :)) w aana ba2ra kalamek fe3lan eftakart lama konte bttkaleme abl kda 3an en el rogola da3et w 3an el makal bta3 el ta7arrosh ele kan abl kda w... bada2t a7es en da 3omro ma hay7sal tane isa fe3lan w 7asset kaman en ay kateb aw adeeb aw senarest aflam aw ay fanan bensbalo ele 7asal no2tet ta7awol hay3'ayar feha kol el makalat el ketabat el adema ele 3an masr la2enaha fe3lan etwaladet mn gdeed :)) Go ahead ya doo w congrats 4 all the egyptiansSee more

هديل مصباح said...

ted2y wana kaman 7assa eny 3yza a3'er kol elly katbto kolo 7asa en ketaby elly haynzel maynfa3sh ynzel keda we lazem a3'er feh 7agat keter awy
bas 3la fekra lesa feh nas bet3aks

رحاب المليحي said...

جميلة جميلة يا هديل.. احساسها صادق جدااااا
وعندك حق ف كل كلمة :)

Roah Yousry said...

gamila awyyyyy ya hadel..el wa7ed f3ln shaf sora gamila awyy l shbabna..kanet fen mn zman..bs el mohem enha mawgoda delwa2t