الحظ لما يهادى ....... يخلى الاعمى ساعاتى

Monday 9 December 2013

كيف تصطادين عريسا

 كام مرة روحتي مكان أو إشتغلتي في شغل وشوفتي بنت بتظبط ولد، ويا سلام بقى لو 
أنتي معجبه بيه وبقالك سنين مستنياه يغلط في يوم ويجي يكلمك إن شاء الله يقولك معاكي أستيكه؟، 
وفجأة متفهميش ايه اللي حصل لاقيتي واحدة نزلت عليكوا بالبراشوت ضيعتلك كل اللي قعدتي 
سنين تحلمي بيه وفياسبوع واحد عملت اللي انتي معملتيهوش في سنين. وحتى لو انتي مش معجبه بحد،
 كام واحدة تعرفيها (اكيد انت لو تعرفي مكانش زمانك بتقرأى دلوقتي) بتلعب بالبيضه والفرخه اللي 
جابت البيضه وبتعرف تظبط اي واحد يعجبها، وانتي قاعدة مستنيه نتيجة النظره والابتسامه بتوعك ده
 لو كنتي بتعمليهم اصلا والبنات رايحة جايه بالشيفروليه واحنا قاعدين. علشان كدة اليكي يا سيدتي ياللي ملكيش
 في التظبيطوحركات البنات، خلاصة تجربة بنات بتعرف تظبط حتى ذكر الزرافه لو جه في طريقها، كفياكي 
بقى فرجه على الشيفروليه اللي خارجه واللي داخله، نحن نضمن لك بعد قراءة هذا المقال قيادة الشيفروليه
 نفسها، وكمان اليك عزيزي الرجل علشان تتنور كدة وتركز وتفوق من اللي أنت فيه وتاخد بالك بعد كده
 من حركات البنات (ابقى قابلني).
قبل أى حاجة لازم تهتمي بنفسك ولبسك وطريقة كلامك وتعالجى كل مشاكلك المظهرية، مبقاش في حاجة اسمها
عشق الروح الكلام ده الله يرحمه من زمان بصى عليكي وعلى دبي (لبنان سابقا) ظبطي كل حاجه ولما ترجعي
 هتلاقيه هو اللي بيجري وراكي، كمان الابتسامة دي متسيبش وشك لاي سبب كان حتى لو كنتي في عزا، 
والجواز دا طبعا اخر حاجة بتفكري فيها.
أتكلم معاه أزاي؟: سؤال أكيد سألتيه لنفسك كتير والموضوع طلع علمي ومدروس يعني مش اي حاجه تطلع في
دماغك تعمليها، لان اول خطوة دي هي اهم واصعب خطوه (بشهادة الخبراء)، في كذا طريقه بقى بس بتفرق 
حسب المكان والشخصيه.
يعني لو انتوا في الشغل لازم تستني الفرصه لما تجيلك لحد عندك وانتهزيها بقى، لو انتوا في جروب صحاب كبير
مش هينفع منك لنفسك كده تروحي تكلميه (قليله الخبره بقى نقول ايه)، لازم برضه تستني لما أي حوار يتفتح ولو
هو اتكلم فيه لازم بقى تتدخلي وتقولي رأيك العظيم ولازم يكون عظيم يعني متقوليش أي هبل في الجبل وحاولي بقى
 توجهيه لسؤال معين محيرك من زمان عشان الكلام بينكوا يستمر زي مثلا الكفته بالصلصه أحلى ولا بالارز.
لو انتوا مع بعض في الجامعه ممكن تسأليه على محاضره .. تساعدية في محاضره أيام الامتحانات طبعا لان
مفيش حد بيحضر دلوقتي لازم تكونى اب تو ديت. ولو فى الشغل كل شويه اسأليه على حاجه، خليه يعملك
حاجه اشغليه لغايه مايسيبلك الشغل ويمشى وبليل استلميه على الفيس بوك (مش بعيد يعملك محضر عدم تعرض).
الكلام دة كله لو الفرصة جت طيب لو مجتش نعمل أيه نسيبه؟!
 لا طبعا البنت هي اللي بتعمل الفرص (الله عليها هي دي البنات) ممكن تظبطي كل مواعيدك على مواعيده
(على اساس أنك شغالة في شركة الحاج الوالد) وصباح الخير في مساء الخير ممكن الدنيا تمشي، كمان ممكن
 تجيبي موبايل زي بتاعه (معلش هو التظبيط مكلف كدة) وأول ما يطلع موبايله قدامك تقوليله ايه ده هو في
منه اللون ده؟ قال يعني متعرفيش، وهاتك يا أسئله بقى على الموبايل كأنك اول مرة تستخدميه، ممكن كمان
تسأليه لو عايزة اطلب رقم اعمل ايه؟؟، ممكن كمان تعرفى كل تحركاته من على الفيس بوك
(مارك كان حاسس بيكى عشان كده عملك الفيس بوك) هتقوليلى ماهو مش عندى هقولك كل
الولاد بروفايلاتها مفتوحه، وتشوفى ناوى يروح فين وروحى معاه بس ماتكلميهوش هناك وبعد 
ماترجعى اعمليله اد والف الف مبروك.
لو انتوا مفيش اي سابق معرفة بينكوا ومش نافع يبقى بينكوا كلام تلفتي نظره أزاي بقى؟
ممكن ترمي النظره ومتبصيش (بصي بطرف مناخيرك) ولو عينك جت في عينه ممكن تبتسمي وتفضلي
باصه في عينه دقيقتين كدة قال يعني بتقوليله الاشارة خضراء (عدي متخافش)، وفي كمان لغة الجسم 
body language (اذا كان بيفهمها اصلا) متقلقيش كل حاجة بقى فيها كورسات دلوقتي يعني لو هو معدي
مينفعش تقفي مربعة ايدك ده معناه لا، كمان اقعدي حركي شعرك او الايشارب، في كمان طريقة "ساعدني يابني"
 بتاعه قال يعني انتي من الاقاليم ومش عارفة جدول المحاضرات بيتعلق فين ومينفعش يوصفلك لازم يوديكي
بنفسه مش ممكن تتوهي (اقاليم بقى) وطبعا هتروحوا متلاقوش الجدول فياريت بقى لو ياخد رقم موبايلك
ويكلمك لما ينزل على اساس انه من حرس الجامعه، وفي كمان طريقة تانية انك تعرفي هو واصحابه بيقفوا
فين في الكليه وتروحي كل يوم تقفي جنبهم انتي وأصحابك لغاية ما تتأكدي انه خد باله انك مركزه معاه وعرف
شكلك فتطيري على البيت زي الشاطرة وأعمليله اد على الفيس بوك وكلام هيجيب كلام لغاية ما ربنا يسهلها من عنده.
الموضوع كمان بيختلف على حسب شخصية الولد، مينفعش تجربي اي حاجة من غير متكوني دارسه الموقف
 كويس، قولتيلي بقى وانا الشخصيه دي اعرفها منين؟ ممكن تسألى صحابه وتفهمي الدنيا عامله ازاي او تشوفي
 معاملته للى حواليه حتى لو وصلت انك تشتغلي بواب عمارته - مش انتي اللي عايزة تظبطى- !!
في بنت قالت كلمة حكمة ان في ناس بينفع معاها الاهتمام وناس بالتقل يعني "الغلبان انفخيه والمغرور فرقعيه"،
وتقريبا التفسير العلمي للموضوع ده ان الناس اللي بينفع معاها الاهتمام بتبقى مفتقده الموضوع ده في حياتها،
لو هو من النوع ده يبقى لازم تهتمي بيه وتسألي عليه ولو لابس حاجة تقوليله حلو اللي انت لابسه ده، ممكن
برضه تسمعيه لو مضايق بس سمع بس لكن لا تعيشي في مشاكله ولا تحاولي تحليها لانك لو خدتي دور اللي
واقفة جنبه ممكن تفضلي طول عمرك كده، ومن علامات الإهتمام انك تقوليله نام بدري (عشان الهالات السودا(،
بيطبق تجبيله نسكافيه، معهوش فلوس سلفيه وخدي عليه وصل امانه (ويا الجواز .. يا الحبس)،
وبعد مايبقى سؤالك عليه جزء مهم من حياته اختفي خالص منها (سنة .. سنتين في السعوديه مش كتير)
 والطريقة دي طلعت مشهورة اوي بأسم "محدش شاف هنادي"، ولو سألك مالك؟ ردي عليه بارهاق 
مشغولة ياعيني عشان اختاروكي تدربي المنتخب.
الولد التنك بقى اللي واخد شلوت في نفسه وزهقان من الاهتمام بيه، غالبا بيبقى شكله حلو والناس دي
اتعودت على ان شكلها هو جواز سفرها بين الناس، فرصتك بقى انك تفرقعيه، يعني لو اتعرفتي عليه
 لازم تبيني له انه مش فارق معاكي وانك زهقانه من كمية الحلويين اللي في حياتك (اكيد نفسك حلوة)
 يعني بلاش لهفة ودلقة ولازم تبيني انك ليكي حياتك واهتماماتك وان دنيتك مش واقفة عليه، وكمان
 احتفظى لنفسك بشوية غموض (ماتقوليلوش اسمك ايه).
اول مكالمة تليفون ... لو كلمني في التليفون ممكن قلبي مسيتحملش الصدمة (هو ده ممكن يحصل؟)
لو انتوا الاتنين عارفين ارقام بعض بس مش بتتكلموا ممكن تعاكسيه في التليفون وانتي وشطارتك
 بقى (بس مش من رقمك يا زيكو)، لكن لو بتتكسفي (واضح طبعا) في طريقة بس قديمه شويه،
انك تبعتيله رساله (مسدج يعني) قال يعني بالغلط ممكن مثلا كلمني شكرا، أو تبعتيله على الواتس اب "
"من انت مثلا" زى اختك سعاد حسنى.
ولو مش معاكي نمرته اكيد مش هتجبيها من الدليل، خدي نفس طويل علشان طريقه "مكانك فين في مصر"
 محتاجه شغل كتير، أعرفي هو ساكن فين (ملفه اللي في الشغل .. الجامعة .. تمشي وراه مايضرش)
وتستني لما يجيب سيرة المكان ده وليكن الزمالك وتقوليله دا في حفلة في الساقيه وكنت عايزة اجيب تكتس
 (لازم تبقي مثقفه) لو هو متقبل الموضوع هتلاقيه بيقولك أنا ممكن أسالك، أقفشى في اللحظه دى وقولي له
 لو لاقيت ممكن تكلمني!!. لو مش متقبل بقى قولي له انا ايه اللى جابنى هنا يا جزمبل.
لما يكلمك بقى مينفعش تردي من اول رنه (متعلقيش الموبايل في رقبتك في اليوم ده) قال يعني مبترديش
 على ارقام غريبة (على ماما برضه)، وكل شوية تقوليله ثانيه واحده ومفيش مانع تقفلي السكه في وشه،
وفي طريقة تانية عكسها بتاعه "البنت الرغايه" انك ترغي رغي السنين في كل حاجه لما يكلمك حتى لو
 قولتيله عندك كام جزمه وشنطه. وبعد اول مكالمه من حين لاخر ابعتيله على الواتس اب ولو تجاوب معاكى
 يبقى فى امل لو متجاوبش يبقى فى عمر.
انا وانت روحين في قله!!!
جينا بقى للمراحل النهائيه، اديكى اتعرفتي عليه وكلمتيه في التليفون وبقى الكلام بينكوا عادى. ناقص ايه بقى؟
انه يقولك انا عايز اقابل بابا يوم الاثنين العصر وطبعا ده مش هيحصل الا لو اعجب بيكي، هنا بقى دورك
 انك تحسسيه انك نصه التاني اللي كان تايه منه في العتبه، يعني بعد كل مكالمه ممكن تسأليه عملت ايه بعد
 ماقفلت معايا امبارح؟! لو قالك حاجات كتيره من بينها نمت بدري يبقى انتي كمان مش بتعرفي تسهري خالص،
 ولو بينام متأخر يا سبحان الله انتي كل يوم بتنامي بعد الفجر، لو سمعتي رنه موبايله تقوليله انك كنت لسه
 بتغني الاغنيه دي من شوية، هو انت كمان بتحب محمد منير؟، متدين ممكن تصحيه يصلى الفجر، بيهتم
 بالشكل اديها ميكب اب وحركات، كول في نفسه كدة يبقى اتكلمي أنجليزي اول ذا تيم واديها جيم وحفلات،
بيحب الشخصيه القوبة يبقى سجاير وسواقة وكلام عن الشغل والفلوس (إدمان كمان لو عايز)، ليه في الرقة
يبقى صوتك ميطلعش كأنك بتتكلمي من تحت السرير، رياضي اشتركي في نفس الساحه الشعبيه ولا مركز
 الشباب اللي بيروحه، مادي طلعي الـ 2.75 قرش اللي كنتي شايلاهم للزمن، شرقى محافظ يبقى انتي عمرك
 ماشوفتي ولاد وياريت تقصري مع باباكي (ماهو ولاد برضه)، رومانسي مأساوي اديها مسلسلات تركي،
بيحب الضحك والهزار يا سلام بقى لو يشوفك بتمثلي مع أحمد حلمي، تحررى تقدمى لو محجبه قولى له انا
 اتسرعت فى قرار الحجاب واقلبى صحابك كلهم ولاد، قارىء ابقى دوده كتب، اعرفي هو بيحب ايه وأعمليه.
بصى البنات اللي بتظبط بتلعب على حته الغرور اللي جوه كل ولد، اللي بتخليه يقول لنفسه انها بتعمل كدة
 (التظبيط يعني) بسلامة نيه وانها سابت كل الناس واختارته هو، لا وكمان ممكن يقولها متعمليش كدة علشان البنات "المنحرفه"
بس هما اللي بيعملوا كده، وده مش معناه ان الولاد دول هبل او مش فاهمين لانهم بيعرفوا كويس اوي (معظمهم يعني)
 الفرق بين اللي بتحاول تظبط واللي بتتصرف عادي، هما بس بيبقى عاجبهم ان البنت دي عرفت تدوس على
 زرار الغرور اللي جواهم (مبسوطين يعني ان في حد بيجري وراهم)، يعني من الاخر اللي بينفع يتظبط
 هو اللي بيكون عايز يتظبط.
والمفاجأة الكبيرة ان كل البنات اللي بتعرف تظبط وعملت كدة كتير شايفه انك تسيبى الولد هو اللي يبدأ
 الاول احسن، لان احلى حاجة ان يكون في واحد معجب بيكي وبيحبك وبيحاول يلفت نظرك بأي طريقه.



Saturday 25 May 2013

حمد لله على السلامة

دايما كانت اغنية حمد لله على السلامة من الاغانى القريبه الى قلبى ... اللى بحب اسمعها لما باخد اى مطب فى حياتى، بحس انها   
بتطبطب عليا لما بيقول ابكى انا سامعك♫♪ ... ببقا عايزة اقوله ايوة انا زعلانه ومش عارفه اعمل حاجه غير انى اكون زعلانه
مسير الايام تمسح دمعك♫♪ ... بقول لنفسى تفتكر ده ممكن يحصل وارجع تانى زى زمان، ممكن اللى انا فيه دلوقتى ده يعدى..طب لو عدى هيعدى ازاى انا حاسه انى انتهيت.. وقعت ومش هاقوم تانى
انسى وافرحى ولا تتعبى وفيوم هاتصفى وترجعى♫♪ ... طيب اليوم ده هيجى امتى وهيجى فعلا ولا انا بيتهيألى، طيب هيجى ازاى وانا مش عارفه انسى وكل اللى بعمله انى بفتكر بفتكر بفتكر بس لكن مابنساش، اصفى -هو ده انا ممكن اصفى تانى- ويصبح الموضوع كأنه ماكان..انت اكيد بتهزر يا عسيلى يأما عمرك ماحبيت
ايوة فين النظرة دى من زمان والضحكة اللى مليانه شوق وحنان♫♪ ... انا نفسى ماعرفش راحوا فين، مابقتش اعرف ابص غير بنظرة مكسورة..نظرة حزينة كلها خيبة امل، اكيد مش هنتكلم عن الضحك لانى مابعرفش اضحك دلوقتى غير عشان اخبى دموعى، هتصدقنى لو قلتلك انى نسيت نفسى زمان
ياللى مسافره وانتى جنبى♫♪ ... انا بقيت بقعد مع الناس بس مش معاهم..بقيت مسافره على طول..مسافره حتى من نفسى ونفسى  ارجع تانى بس مش عارفه ازاى وطريق الرجوع ده اروح له منين
 ايوه كان لازم انت تسبيه ده احسن ليه لو كنت بتحبيه -هو انت فى حد حكيلك حاجه ولا ايه- بس انا ماكنتش عايزه اعمل كده، عارف اوحش حاجه فى الدنيا انك تكون مضطر تعمل حاجه انت مش عايز تعملها بس انت عارف انها صح ومع ذلك مش مقتنع بس مضطر
انا عارف انك حاولتى معاه♫♪ ... حاولت بس، انا اتغيرت وغيرت حياتى عشانه، ماتختصرش اللى عملته فى كلمة المحاوله، مش هقولك هو ماقدرش ومافهمش ومايستهلش..هقولك انى حاولت فى المكان الغلط من الاول
مش كل اللى بنعوزه بنلقاه♫♪ ... مش عارفه ليه اول مره احس انى مكنتش عايزه ، هتقولى طيب صبرتى وحاولتى ليه؟
هقولك انا كنت عايزه حاجه كنت موجوده فى دماغى انا بس وكنت بحاول انقلها للواقع او اقنع نفسى ان هو ده اللى انا عايزاه لكن من جوايا انا عارفه ان مش هو، تقولى بتضحكى على نفسك..بتوهمى نفسك..هقولك انا دفعت ولسه بدفع تمن الوهم
انت عارف انا ببص فى المرايه دلوقتى مش بعرف نفسى..عارف احساس الحزن لما يملا قلبك..احساس بيخليك مش عارف حاجه كأنك لسه مولود ومحتاج تتعرف على العالم من اول وجديد..احساس بالوجع بس انت مش عارف ايه اللى بيوجعك بالظبط هل دماغك، ايدك، معدتك وعارف ان ولا حاجه من دول، انت موجوع من جواك
الوجع اللى بيخليك مش قادر تقوم حتى من السرير كل يوم الصبح، مع انك سليم معافى وكل حاجه حواليك كويسه وتمام، والحاجه الوحيده اللى مش تمام ان خاطرك مكسور
عمرك سألت نفسك هو الخاطر ده يعنى ايه وموجود فين بالظبط فى جسم الانسان؟ يعنى تحت الحجاب الحاجز ولا جنب القولون ولا عند القلب ولا فين، وليه بيسبب كل الالم الخفى ده مع انه حاجه مش ملموسه
يمكن هو مش ملموس عشلن الحاجات اللى بتكسره حاجات برضه مش ملموسه، زى ان املك ضاع او فرحتك ماتت وحاجات تانيه  كتير بتكسر الخاطر، حاجات مش ملموسه ولا مجسمه بتكسر حاجه برضه لا هى ملموسه ولا مجسمه بس وجعها بيتشاف وبيتحس 
وانا عارف انك هتقدرى تنسيه
وانا عارف انك هتقدرى تنسيه
حمد الله على السلامه ياللى مسافره وانتى جنبى