الحظ لما يهادى ....... يخلى الاعمى ساعاتى

Friday, 24 December 2010

يا واد يا تقيل خليك تقيل

يقولولك ايه الاعجاب اخرته حب ده الطبيعى، لكن نقول ايه بقى على الاعجاب اللى بيفضل اعجاب اكيد ده مش طبيعى

الولد يبقى معجب بالبنت وعنيه هتطلع عليها كل يوم وكاتم فى قلبه وساكت، طبعا البنت واخده بالها بس تعمل ايه بقى غلبانه اذا كان الولد اللى المجتمع مديله كل الصلاحيات علشان اسم النبى حارسه ذكر كاتم الاعجاب فى قلبه وبيعجب فى صمت فهى بقى لا تملك الا الانتظار على امل انه هيتشجع فى يوم من الايام ويجى يقولها الساعه كام

بس حتى وهى مستنيه بتعد تفكر وبعدين فى الولد ده بقى، هو عايز ايه؟ مبيزهقش دة ولا ايه والله شكله كده تبع حزب ابص اه لكن اتكلم لا، وتحضر فى دماغها الكلام اللى عمرها ماهتقوله الحمد لله المجتمع سابلنا الخيال، تعد تتخيل نفسها بتقوله بص يابن الناس انا تعبتلك بجد ما كتر مابتركز معايا كل يوم حاسه انك بقيت تعرف عنى اللى انا معرفوش، تكونش معجب بطريقه لبسى انا ممكن اقولك بجيبه منين عادى على فكره ماتخفش مش هاخبى عليك، ولو عينك من لفه الايشارب انا برده زى اختك وممكن اعلمهالك، اما بقى لو شايف انى عندى شنط وجزم كتير انا هاشورلك على المحل ده قريب ميتوهش

لكن مقدرش اعمل اكتر من كده مانا مش عارفه وانا لو اعرف اقول اعلى طول، هو صحيح انا فضلت كتير بسأل نفسى ليه البنات لازم تستنى لما الولاد يعجبوا بيهم وينولوا شرف اختيارهم ليهم، ليه لازم يكون الولد الفعل والبنت رد الفعل، ماهى البنت كمان ممكن يعجبها حد وتبقى عايزه تتعرف عليه

بس دلوقتى عرفت ليه، ليه لازم انتوا اللى تتعبوا علشان توصلوا لاى بنت، لان اى ولد هيطلع عين البنت اللى عجباه عقبال مايقولها انه معجب بيها وهايشيطلها دماغها عقبال مايقولها بحبك وهايجبلها شلل رعاش عقبال مايقولها انه عايز يتجوزها وفى الاخر هايسبها علشان سبب من الاسباب المهمه مثلا زى الدنيا بتمطر

ولو هى اللى بدات وقالتله انها معجبه بيه حتى لو الموضوع مشى فى الاول وهو 99% مبيمشيش لانه هيفضل فاكر انها كانت جريئه زياده عن اللزوم واسس التربيه عندها ملخلخه اصل بابا وماما كانوا مش فاضيين وفى الاخر برده هيسبها علشان الدنيا بتمطر

طب حط نفسك مكانى احساس ان فى حد مركز معاك وعارف انت بتتنفس كام مره فى الدقيقه معجب بقى ولا مش معجب احساس يضايق ويخنق، بص انا معاك ان البنات بتحب الولد التقيل ومبتحبش الناس اللى بيريلوا على اى حد، بس البنات مش هاتترمى عليك لمجرد انك تقيل، فاتقل زى مانت عايز وانا كمان هاتقل ونشوف مين بقى اللى اتقل من التانى

اذا كنت فاكر ان البنات لسه زى زمان بتنشغل بأى نظره ولا اهتمام احب اقولك اننا لتغيرنا كتير اوى، اه لسه بردوا بننشغل ونعمل قصص من الهوا لمجرد ان حد ساب كل الناس وجه سألنا الساعه كام، لكن كمان معظمنا جرب وجع القلب فمبقناش بنجرى وراه بالمشوار، ولا بقينا بندى اعذار، ولا بقينا ساعات بناخد الخطوه الاولى علشان بقينا عارفين ان الخطوه التانيه ممكن متجيش

يعنى انا لا هاسهلك الموضوع، ولا انا اللى هاجى اسألك الساعه كام، ولا هاشغل تفكيرى بيك، ولا هاهتم اعرف اسمك ولا اى معلومه عنك، ولا هاديك فرصه تتكلم معايا حتى لو طلعت معايا فى الشغل، علشان انت ضيعت فرصتك ومعملتش حساب انك اكيد مش هتفضل تشوفنى كل يوم، وانا مش هينفع اخسر فى الاول وبرده فى الاخر تيجى تقولى الدنيا بتمطر






22 comments:

Guevara Shavez said...

جامده
بس اقولك المشكلة مش في الولد اللي فاكر نفسه بس وتش وهنترمي اول لما يغمز، ولا المشكلة في البنت المسهوكة اللي برده بتتنحنح واول لما تيجي تعدي الشارع تصرخ ال ايه بتخاف وتمسك في ايده، ولا المشكلة في الجرأه و حقوق المرأه اللي كل لما نتكلم فيها يقولولنا والله احنا عاوزين نعمل جمعية موازية عشان حقوقنا احنا كمان، ولا المش...كلة في المجتمع اللي خلي التصريح بالمشاعر من جانب الولد حلال وعادي ومن جانب البنت جرأة وقلة ادب، المشكله ان المطرة دايما بتمطر في وقت مش وقتها خااااالص

Hadeel Mesbah said...

صح دايما الدنيا غرقانه

Anonymous said...

المواهب كتير مشاء الله
كل ما تتقل اكتر كل ما اكبر و انفض
المشكله فى ثقافه المجتمع اللى بقلها سنين حلفين ما نغيرهاش
بالنسبه لمشكله المطر ممكن نصرف لكل مواطن شمسيه او نسمع دقوا الشماسى
مى

Hadeel Mesbah said...

ماشى يا مى ههههههههههههه

Mariam Gaber Mohamed said...

‎7elw aweee aweee ya3nee :D:D:D:D:D la2 3agabneee ...

Omnia Adel said...

eldonya bitmatr
gmeel awi w lzeez mooooooooot ya hadeel

Hadeel Mesbah said...

thx mariam :)
eh enty mesh wa5da ba2lek wala eh ya omnia de me3'r2a eldonia

hala said...

والله يا هديل موضوع كويس بس انا اكتشفت اني الواد اللي تديله على دماغة وتطنشيه على الاخر اكنه مش موجود هو اللي بيجري وراكي
واللي تهتمي بيه اكنك عملتي حاجة عيب في حقه
علشان كده ارفعي شعار
التقل صنعه

Hadeel Mesbah said...

ماشى صح يا هاله بس انا بتكلم على الولد اللى يبقى هيموت عليكى وفى نفس الوقت مبيقولكيش حاجه طيب دة عايز ايه بقى

Fadwa Akthem Ghoraba said...

msh 2essa heik !! fakrny bel song de
I like awy ya Dola...wa elly garbo y7s beh awy..rabena yshfehom

Hadeel Mesbah said...

aked kolna 7asena beh ya fadwa bas ana mesh 3rfa elo3'nya de

Meanass Hashem said...

‎3ndk 7a2 ya dola msh fahma leh elwld bytnyl w y5af w yoskt bs ymkn 3lshan by5af el bent tbahdelo w tb3tr kramto f el 2rd wala msln byb2a kramto zayda 3leh shwya w 7ases eno mynf3sh eno y2ol 3la 2sas b2A kl el bnat bymoto feh

Omnia Adel said...

Hahahahahaha Elmatra elly m3'r2a eldonya wala as7ab elgomla ?aslha tifr2 ya dodi

Hadeel Mesbah said...

bas ya meno elwa7ed maynfa3esh ye3esh 3la e7tmalat
eletnen ya omnia

Roah Yousry said...

to7faaaaaaaaaaaaaaaaaaaaaaaaa bgd

Hadeel Mesbah said...

thx esraa :)

Possy NobonTo said...

Gamda 2wi w mohlekaaaaaaaaaaaaaaaaaaa f nafs elwa2t :D a7ayeeki bgad 5soosan 7ewar elmatara elli btmattar 3leehom dy ! :D ..
bgad i like a5er 7aga :D

Hadeel Mesbah said...

thx possyyyyyyyyyyyyyyyyyyyyyyyyyyyyyyyyyyyyyyyyyyy

Hoda Abdel Zaher said...

hey Hadeel
dear Sis. really it touches me cuz really all guys are going that way many grlz experienced that shit they do w lel asd kol el bnt tkoon tayba kol mabtet3b ba3d ma tetsdm eno haifdl mo3gb bas la wakaman momkn yb2a mashy kwis awy fel mawdoooo3 w y2olha ma3lesh asly el donia btmtr i think its rainy along the whole yr everywhere thats y i say in arabic " ya far7t 2omak beek " many prefer to stay beside mummy and others prefer to wait till we do the 1st step then blame us Uffff bgd 3leehom ya banat a2olkom eh i stayed one whole yr waiting him really he was counting my heart rates not only all that u say we used to go out together have launch together all ppl thought we fell in love he was the nearest one to me and i was the only grl he talked to then another grl came and worked in the co. so wt she started to do all that steps to go wz 1st step then he came to me Hoda wt i do i feel like she cares about another :S i told him to go marry her ... What a surprise ,, they are engaged right now God bless him cuz he played wz ma feeling he's infected wz serious disease that he can not marry any :s Sure i didnt wish 4 him all that but after a whole yr we lived together every moment when he asks whom to marry Sure i would not reply I'm the Bride u search... Learn 4m this grlz never believe the lovely moments Only believe the wedding ring and there's a nother story wz the wedding ring but keep it now

Ingy Elgendy said...

bgd msa 7lw awiii to7faaa bgd <3 wana sha5seyaaan ba3anyyy mn l mawdou3 da 7alyan w galyy shalal w el3asabyy w kol 7aga 7dl :D

هديل مصباح said...

@ hoda damty ma3bya ya benty bas a2olek ma7desh byt3lem bebalash
@ ingy ma3lesh ya benty kolo by3ady welly z3lana 3alyh elnahrda bokra tenseh

Ossama al.Naqjjar said...

اهوة انتو كدة الواد الروش الى بيغرف يتكلم تجرو وراة وفى الاخر يقولك الدنيا بتمطر انما الى ملوش خبرات سابقة ومعجب بواحدة بجد وخايف يخسر الحاجة الوحيدة الى فى ايدة تقولو علية كدة