غريبة اوى اغنية اتمنالة الخير بتاعة انغام، انا معاكوا انها حلوة بس مش منطقية خالص كل ما الواحد يجى يطبقها فى الواقع يحس ان يا انغام جاية من كوكب تانى ياللى بتحبة هو اللى جى من كوكب تانى ياحنا اللى وحشين والمفروض دة يكون شعور اى واحدة اللى حبيتة سابها يا الست انغام عمرها ماحبت اصلا او حظها كان حلو واللى حبتة مخرمش قلبها، ماهو لو خرمة اكيد كان زمانها ماقلتش اتمنالة الخير كانت قالت اتمنالة يطير بس من الدنيا
احساسك وانتى بتسمعيها زى احساسك بالظبط لما تسمعى واحدة صاحبتك بتكلمك على كانت بتحبة اللى كان عامل زى البصلة كل قطمة بدمعة ومع ذلك بتقولك متشتمهوش (طبعا انتى مؤدبة ومبتشتميش) او ادعيلة (بردة انتى كويسة ومبتدعيش علية) او ربنا يهدية (لا حول ولا قوة الا بالله قلبها كبير) او انا لو شوفتة هاسلم علية عادى (دى بقى اكيد كانت مع انغام فى المدرسة) اكيد دول كلهم خرجوا من المستشفى من غير مايكملوا علاجهم
واحدة تقولك انا هاسلم علية والتانية تقولك اية يعنى يفوتنى وينسانى ماهو ياما اتحمل علشانى ماهو ياما كان قلبة عليا، هى الحكاية عمرها ماكانت حاجة قصاد حاجة يعنى هو علشان اتحمل علشانك دة اذا كان اتحمل حاجة اصلا يبقى ينساكى عادى اية الحلاوة دى دانتى على كدة كان المفروض تسبية وتروحى تتجوزى اخوة مانت بردة عملتى علشانة حاجات كتير
ولا الجزء اللى بتقول فيه اتمنالة الخير ماهو قبل مايجرحنى داوانى كان عمرى وكان هو زمانى كان قلبى وروحى وعنيا، دانتى الجرح الوحيد الموجود فى حياتك هو جرحة الجرح اللى كل مابيلم بيرجع يفتح تانى كل مابتعرفى حاجة عنة او كل ما بتفتكرى اللى كان عمرك وزمانك عمل فيكى اية
والجزء اللى بتقول فيه هفتكرلوا حاجات كتير كانت مابينا هفتكر ايام هوانا والخطاوى اللى فى طريقنا لما كنا بنقسم الفرحة فعيونا هفتكرلة حاجات كتير واتمنالة الخير، اهو دة بقى بالذات الجزء اللى انتى مبتحبيش تفتكرية قصة حبكم وكل حاجة عملتوها سوا، كل حاجة حلمتوا بيها سوا، كل خطوة خطتوها سوا، لما كنتى بتبسطى لما تشوفية وتتكلمى معاة، لما بتفتكرلى كل الحاجات دى صعب اوى تتمنيلة الخير
والجزء اللى بتقول فية هتمنالة الخير من قلبى علشان يستاهل دانا هتمنى تلف الدنيا تانى تانى ونتقابل، اهو دة لما بتسمعية بتفتكرى المثل اللى بيقول ادعى على اللى خرم قلبى وابوس اللى يقول امين علشان يستاهل، وانتى فعلا بتتمنى تلفى الدنيا تانى على رأيها اول مرة تقول حاجة صح علشان نتقابلوا ومتحبيهوش اصلا او تعملى فية نفس اللى عملة فيكى
والجزء العظيم اللى بتقول فية هفتكرلة حاجات كتير كانت مابينا هفتكر لحظة لوقانا وانسى لحظة مافترقنا، بس انتى الصراحة عايزة تنسى الاتنين هى عايزة تفتكر هى حرة اما انتى عايزاة يروح يعيش فى الكوكب التانى بتاع زميلها مدحت صالح وكفاية بقى اللى عملة فى الكوكب دة
اول مرة بتسمعى الاغنية دى ويكون كدة الخرم لسة جديد لانج بتقوللها اسكتى يا انغام اسكتى اتمنالة الخير اية حسبى الله ونعم والوكيل فية ولما الخرم ابتدى يلم وسمعتيها بتقولى لنفسك بلا اتمنالة خير بلا شر وبعد ما الخرم خد وضعة خلاص فى قلبك ومبقاش بيوجعك زى زمان لما يتسمعيها بتقولى كلة سلف ودين حتى المشى على الرجلين ولما بتعرفى ان هو خطب بقى وتسمعيها بتقولى ياعينى على اللى خدتة ابو قلب صفيح دة وبعد كدة لما بتسمعيها بتقولى الله دى اغنية جميلة اوى
وعلى فكرة لو لسة صحابك بيقولولك الحاجات الغريبة اللى بيقولوها ماتفتكريش انك وحشة علشان مش حاسة زيهم ولا حتى هما هبل كل واحد بيتعايش مع الموضوع بطريقتة ومش كل الناس بتقدر تسامح زى بعض وحتى لو مقدرتيش تسامحى المهم انك تقدرى تنسى