قالى الوداع قولتله قشطه

وانا كل ماقول التوبه يابويا وبعدين بقى انا كل ماقول خلاص بقى ياهديل اتكلمى فى مواضيع تانيه علشان الناس متفتكرش انك عامله جمعيه المرأه المتوحشه بجد وانك واخده موقف من الولاد, ابسلوتلى خالص انا بكتب عن الحاجات اللى بشوفها وانا اعمل ايه يعنى كل مصيبه الاقى فيها ولد، مشكلتى دى بقى

تقدروا تقولوا ان الموضوع ده الجزء التانى بتاع خرم القلب يعنى بعد ما القلب اتخرم وخيطناه الحمد لله والواحده من رجعت تعيش حياتها عادى وتنسى طبعا احنا مش بنعرف ننسى حاجه كومبليتلى (راجع زعلتى على ايه النهارده) امال يعنى لما نحب نزعل ونعيط نعمل ايه مش الماضى اولى برده اننا نرجعله ونزعل عليه دى عشره، المهم يعنى بنكمل فى حياتنا ومن وقت للتانى نفتكر ونرجع فلاش باك ونقول اه لو ونعمل ايه ..... يلا انتوا عارفين

كل واحده لسه قلبها مخروم جديد كل شويه تعد تقول لنفسها هو سابنى ليه ليه ليه, وتسأل صحابها هو ممكن يحاول يكلمنى, مش عايز يطمن عليا, تفتكروا بيعرف اخبارى, تفتكروا ممكن يجيلى الشغل, تفتكروا بيفكر فيا, تفتكروا لسه بيحبنى (ده اصلا لو كان بيحبها قبل كده) تفتكروا تفتكروا تفتكروا والصراحه يعنى هما مفتكروش حاجه خالص علشان هما مش عارفين ولا هى عارفه ولا حد عارف ولا حد هيعرف (الكتالوج بتاعهم ضاع باين)، وتعد كل يوم اعده باصه للتليفون يمكن يتصل وتعد تتأكد ان فيه حراره وتمسك موبايلها وتعد تتفرج على نمرته وتقرا مسدجاته اهى حاجه من ريحته برده وتعد تدخل على البروفايل بتاعه على الفيس بوك ونفسها تشوف صوره لكن مش عارفه علشان مسحها من عنده او عملها بلوك، وهى خارجه من الشغل تعد تبص يمين وشمال يمكن يكون واقف لكن لا حياه لمن تنادى

تعمل ايه بقى وهى عامله فى نفسها كل ده وفى ناس بيعدوا كده بالسنين لو عرفت انه خطب "ان ان ان "، ياعينى وهى كانت فاكره انهم ممكن يرجعوا تانى حتى لو بقالهم 10 سنين سايبين بعض

طبعا الخرم دلوقتى بقى ممكن يعدى فيل وعارفين بقى بتحس انها كانت بتحب جزمه حاجه كده معندهاش احساس عمركوا يعنى سمعتوا عن جزمه بتحس ولا عن جزمه ضاعت منك ورجعت تانى او جزمه كلمتك فى التليفون بعد ماضاعت وتعد تقول لنفسها انا كان عقلى فين فى حد يحب جزمه

يعنى ايه خطب طيب نسينى امتى وحب التانيه امتى وخطب امتى، هو نسيكى فى الوقت اللى انت كنتى بتفتكريه فيه وتعيطى وحب التانيه فى الوقت اللى انت كنتى بتدورى عليه فيه ومتابعه كل اخباره وانت مش فى باله اصلا وخطب التانيه فى الوقت اللى انت كنتى مستنياه يرجعلك فيه، هسألكوا سؤال فى حد قبل كده سمع ان فى ولد كان بيحب بنت وسابوا بعض ومقدرش يكمل بعدها وحتى لو سمعتوا طيب سمعتوا بقى عن كام بنت مش عارفه تعيش بعد ماقلبها اتخرم ومش عارفه تشوف غير اللى خرموه وضيعت كل الفرص اللى جاتلها بعد كده علشان عندها امل انهم يرجعوا تانى

ذكر فى الاساطير القديمه ان الولد لو كان بيحب بنت وسابها والمشكله اللى سابها علشانها (ده لو كان فى مشكله) اتحلت مش بيرجع لها تانى (يمكن نحس حد عارف) وبيدورعلى حد تانى

لا انت اول واحده ولا هتبقى اخر واحده ومتزعليش على نفسك ده ربنا بيحبك يا هبله حد يحب جزمه مالها الشرابات هه، متستنيش حاجه علشان متزعليش هو لو كان بيحبك بجد مكنش سابك ولو سابك لاى سبب خارج عن ارادته يبقى نصيبك كده زعللك مش هيغير حاجه, طبعا كل حاجه بتاخد وقتها ازعلى بس مش كتير ومتستنيش انه يرجع تانى والله رجع لوحده يبقى خير وبركه بس بلاش الاسئله اللى ملهاش اجابه اللى عامله زى امتحانات الثانويه العامه فى مستوى الطالب اللى ساكن فوق الطالب المتميز، كل حاجه بتتنسى الحياه مبتقفش لو كانت بتقف علشان حد بيحب حد ماكنش حد فيها عاش

ولو سمعتى ان اللى كنتى بتحبيه خطب ولا اتجوز قوليله قشطه غور فى داهيه واسمعى واغنيه استرونج ينف بتاعه شير كل 12 ساعه وهتبقى كويسه ان شاء الله

زعلتى على ايه النهارده؟

قالك الهم عارفنا ان غبنا عنه يسأل علينا معارفنا , انا كهديل واحد من همومى اليوميه رحله البحث عن السى تى ايه وبقيت مكرسه حياتى ادعى انى الاقيه كل يوم وانا رايحه وراجعه من الشغل وان شاء الله هنستضيف فى البلوج الحلقه اللى جايه واحد من سواقين السى تى ايه علشان يكلمنا عن ازاى بقى من الحاجات النادره لدرجه ان هو نفسه مبيركبوش . فى ناس زى كتير شايلين هم اى حاجه وكل حاجه بيبقوا مش قادرين يمشوا من كتر الهم (او زعلانين ان السى تى ايه فاتهم) اصلا الهم والاكتئاب بقوا صحاب بيت وكل الناس ماشيه تكلم نفسها من كتر الهم زمان كان لما تلاقى حد ماشى يكلم نفسه كان بيبقى مجنون دلوقتى لو لاقيت حد مش بيكلم نفسه بيقى هو اللى مجنون , ولما تسأل اى حد عامل يقولك والهى تعبان والهى قرفان لكن لو حد قالك بقى مبسوط على الاخر والدنيا فل تقول فى نفسك مبسوط يعنى ايه الكلمه دى يكونش معناها سعيد ايه الكلام الصعب ده وطبعا مش هاتتكلم معاه تانى لاتتعدى وتبقى سعيد زيه

هى دى المشكله اكيد يعنى محدش فينا زعلان على طول اكيد فى حاجات تبسطنا ساعات يعنى بس احنا ايه نسيب الحاجه الحلوه ونفكر فى الوحش يعنى لو فى اليوم حصل حاجه واحده منيله بنيله وعشر حاجات حلوين نسيب الحلو ونفكر فى الحاجه الوحشه , احنا مش نكدين او بعضنا يعنى لكن احنا اتعودنا على كده اتعودنا على النكد والارف والزعل والحزن ونسينا يعنى ايه فرح يعنى ايه سعاده يعنى ايه اكون مبسوط . لو حد لا قدر الله كان مبسوط مبقاش بيقول (ماعدا الراجل اللى قال فوق شكله مش من البلد دى) بيقنا بنخاف حتى لو الواحد عنده مشاكل بس عاديه يعنى مش جامده اوى يخاف يقول لاى حد لايكون عنده مشاكل اكبر فيحسده , دلوقتى بقى اللى يشوف بلوه غيره بيحسده عليها

انتوا عارفين احنا كمان بيوحشنا النكد وان الواحد كده يبقى قاعد زعلان وبيعيط يعنى لو مفيش حاجه نكدت علينا نقوم ايه فاتحين التليفزيون وندور على اى فيلم من افلام النكد العالميه عربى , انجليزى او حتى هندى الحاجات الحلوه دى اللى البطل او البطله بيموتوا فى الاخر الواحد بيعيط عليها من قلبه ولو ملقيناش وده طبعا نادرا يعنى نقوم ايه نفتكر ايام زمان اللى كنا مبسوطين فيها (حلو) ونعيط انها خلصت ومش راجعه تانى (مش حلو) او نفتكر حد كنا بنحبه وقلبنا ونعيط او نكلم اى حد من صحابنا ونعيط مع بعض العياط برده بيحب اللمه احنا كده كده هنعيط .

ومضى العمر يا ولدى واحنا بنعيط يعنى لما ولادنا يسألونا كنتوا بتعملوا ايه زمان هنقولوا هوهوهوهوهههههههه ههههييييه كنا بنعيط . والعمر جرى واحنا ماسكين فى اللى مزعلانا ونساين اللى بيفرحنا او زعلانين على الفات مع اننا عارفين ان الفات مبيرجعش تانى لكن نسيبه ابدا لازم نزعل عليه ده واجب برده , انتوا عارفين احنا دايما يا بنفكر فى الماضى او المستقبل عمرنا مابنفكر فى الحاضر اللى احنا فيه يعنى دايما يا زعلانين على حاجه فاتت او خايفين على حاجه لسه هاتيجى لكن اللحظه اللى عايشنها دلوقتى هنستنى لما تفوت وتبقى ماضى وهنزعل بقى عليها ده غير ان احنا كنا خايفين منها لما كانت لسه مستقبل ولسه مجتش

الهم نفسه زهق مننا ويمكن مبقاش عايز يجيلنا لكن مضطر لكن احنا مش مضطرين اننا نفضل مهمومين على طول مفيش حاجه اسمها زمان كان زمان ده خلاص راح ومش هايرجع كلمه لو دى هى اللى جايبلنا الكافيه حتى لو الزمان رجع اللى حصل هيحصل تانى واى حاجه كان نفسك فيها ومحصلتش مكنتش نصيبك اصلا متزعلش عليها احنا طريقنا مكتوب من قبل مانيجى الدنيا. ومتخافش من بكره ممكن متشوفش بكره اصل وتبقى ضيعت النهارده. والناس اللى خرجوا من حياتك مكنش نصيبك انهم يكملوا فيها حتى لو تعرفهم من ايام فحت البحر. اى حاجه بتحصلنا هى الخير لينا بس احنا مبنعرفش نصدق ده. ومتفتكرش انك انت لوحدك اللى مهموم وزعلان كل الناس زعلانه حتى لو مبيقولوش

انا عايزه احكيلكوا حكايه انا مكنتش اعرف اذا كنت بعرف اكتب ولا لا بس انا كنت بحب اكتب بس مكنتش بكتب برضه وبعدين حصلتلى حاجه فى وقت وزعلت اوى وحسيت ان حياتى خلاص وقفت ومكنتش عارفه اخرج من حزنى وفى يوم واحده صاحبتى قالتلى ان باباها عامل بلوج وبيكتب فيه ففكرت انى ممكن انا كمان اعمل بلوج واكتب فيه وكنت ناويه اخلى صحابه بس هما اللى يقروا علشان انا مكنت حاسه ان الحاجات اللى بكتبها ممكن تعجب حد (كنت عارفه ان صحابى هيجاملونى حتى لو وحشه) وعملت البلوج وبدأت اكتب ودى الحمدلله من اكتر الحاجات اللى فرحتنى فى حياتى ونسيت اصلا انا كنت زعلانه من ايه ولا على ايه. انت بس اللى تقدر تخرج نفسك من اللى انت فيه مش حد تانى لو زعلت اوى اعمل اى حاجه بتحبها وممكن تبقى فاكر انك مش بتعرف تعمل حاجه بس ممكن تكون بتعرف تعمل حاجه اى حاجه . الهم كده كده عارف طريقك وعارف هيجيبك منين لكن انت كمان عارف طريق السعاده وعارف طريقها فين بس انت اللى مش عايز تدور او مستنى ان الحزن يخلص لكن المفاجأه بقى انه مبيخلص والسعاده كمان مبتخلص.