الحظ لما يهادى ....... يخلى الاعمى ساعاتى

Tuesday 27 December 2011

People you may know

الدنيا صغيرة وغريبة أوي، جملة بتقولها كتير، لما تقابل حد صدفة وانت كنت بتحاول تظبط معاه علشان تشوفه بس مش عارف، بتقولها لما حد تعرفه كان بيحب حد وماشي خلاص في مشروع جواز بس في الاخر بيتجوز حد تاني خالص برضه انت تعرفه، بتقولها لما تدخل على الفيس بوك مرة وتلاقي حد من صحابك عامل شير لحاجة من عند اللي خرم قلبك

بتضحك اوي عشان ساعات كتيرة كان بيطلعلك في

people you may know

على الفيس بوك، وكل مرة كان بيطلع بيبقى نفسك تبعت رسالة للفيس بوك، تقوله فيها

عزيزي الفيس بوك

الشخص اللى بتشاورلي عليه ده وفاكر اني مش واخد بالي، احب اقولك واطمنك اني واخد بالي منه واعرفه كويس جدا، دانا اعرفه لدرجة اني مش هينفع اعمله "اد" تاني، الموضوع اصله كبير ومليان مواويل، لو عندك استعداد تسمع انا ممكن احكيلك الحكاية. انا كنت ماشي في حياتي بتفرج على الناس اللي بتحب واقول لنفسي امتى بقى افرح بيكي والاقي نصك التاني، وقابلت حد وافتكرته - ماي حد -، لاقيتني بحب اشوفه ولما بيغيب بسأل عليه - معرفش ليه - وبقيت بحب اتكلم معاه بالساعات، كانت روحي مرتحاله وواثقة فيه، كنت فاكر أننا أصحاب بس طلعت بحبه وانا مش عارف، أصل أنا أول مرة أحب، وأول مرة أشوف الدنيا بعين اللي بيحب

ولما إتأكدت إني بحب وهو كمان قالي كنت فين من زمان، حسيت إني ملكت الدنيا في أيدي، ما بقتش أعرف يعني أيه حزن ولا ألم كأني عمري ما عرفتهم في يوم

بس ما عرفش أيه اللي حصل، كأنه كان حلم جميل وصحيت منه وكأنه عمره ما حصل، خلصت فرحتي وأنا كنت فاكرها لسه بتبتدي، بقى كل اللى فاضلي خرم في قلبي مش قادر أشوفه بس عارف إنه موجود، والحزن والالم رجعولي تاني وقالولي كنت فين من زمان، بقيت مش عايز أفتكر حاجة لان الذكريات بقت بتوجع أكتر ما بتصبر، بقيت مش فاهم أزاي أقرب حد ليا في الدنيا واللي عيشت طول عمري أتمناه يبقى هو سبب أكبر جرح في حياتي، أزاي خرج من حياتي بسهولة كده وأنا مش عارف أخرج من حياته

في الاول كنت حاسس كأن فلبي بقى عليه ختم (مستخدم)، وكنت كل ما حد يحكيلي عنه حاجة أحس إن الخرم اللي في قلبي بينقح عليا، واللي بيزعلني أكتر إني حاسس إن قلبي لسه عنده أمل وأنا كان نفسي يبقى فيه أمل رغم كل اللي حصل، لغاية ما فيوم عرفت إنه خطب حسيت إن قلبي ضلم وأخر شمعة أمل جواه أنطفت وساعتها عرفت إن أصعب حاجة مش أن يبقى عندك أمل لكن إن الامل يضيع

وراحت أيام وجت أيام، والذكرى كل يوم بتبعد أكتر من اللى قبله عشان ما كنتش عايز أفكر فيها ولا أسأل وأقول ليه ولا بقيت حتى عايز أفتكرها، بقيت حتى ببعد عن أي حد بيقرب من مرحلة الخرم

لغاية ما في يوم لاقيت الذكرى بقت بعيدة أوي، ساعتها عرفت أني لازم أدور على الامل في أي حاجة تانية في حياتي عشان أقدر أكمل وقلبي ينور من تاني، وإن مش لازم كل قصص الحب تنتهي ب

happily ever after

بقيت بقول لكل الناس اللي قلبها إتخرم زيي، بكره تنسوا وتكملوا حياتكوا، بس ما حدش بيصدقتى، وأنا كمان عمري ماكنت هصدق إني أقدر أنسى

أنا نسيت لدرجة إنك لو طلعتهولي تاني في

people you may know

هاقولك

yes, but I can't remember

















14 comments:

Du omar said...

wooooow begd brgd so touching and true u made a smile on my face hadeel coz 7aset enk bettkalmy 3ny w 3an banat ketir 7asalhom 5orm f 2albhom :)

هديل مصباح said...

ya duuuuuuuuuuuuuuuuuuuuuuuuu el5orm dah she2 asasy fe 7ayat ay bent masrya :) by the way ana 3ndy article esmha 5orm el2lb asln :D:D

Fadwa Akthem Ghoraba said...

‎7lw ya dola awy :)

هديل مصباح said...

Ana mesh 7asaha awy t2rebn 3shan ana neset completely :D

Fadwa Akthem Ghoraba said...

D momkn..bas ana 7asah morakaz wa fe el goal ;)

هديل مصباح said...

Mana 2olt ageb elmawdo3 men awelo

Laila Abd El Hady said...

‎7abetch-ha 7abetch-ha :) :)

هديل مصباح said...

‎:))

Anonymous said...

النسيان نعمة . . : ))
في غيرك بقى بيعملوا من الذكرى صنم و يعبدوها ما تبقى من عمر ، أو على الأقل بيدوروا على شبيه لصاحب الختم الأول !!

هديل مصباح said...

عشان دول ما بيحبوش نفسهم

Sahar El-Behairy said...

أأوووووووووه ماهو مش عارفه ليه احنا اللى مش بنتعظ ونأخد بالنا. كلهم جبابرة وبيدوروا على مصالحهم ومع مين تكون وبيحاولوا يبقوا معاه فين يكون علشان المصلحة. النون بقى على العكس فى معظم الأحوال وبتدى بلا حدود ودا عيبه علشان هما بيدورا يأخدوا إز...اى ومن غير مقابل لو ممكن ولو لاء يبقى بأقل التكاليف. مجرد الكلام بيكلفهم كتيرأوى فى حين إن الافعال الكبيرة اللى بتعملها النون ما بتتقدرش. النون هى السبب أو الزهرة هى السبب منها لله خليت المريخ يتمطع أوى. هى ليه من الأول قبلت تواجده ماهى كانت لوحدها وشايفه الدنيا روز. للأسف غرها القوة الوهمية للمريخ وأدى أخرتها. بس يارب نتعظ ونأخد بالنا وندى على قد ما نأخد وما نبادرش بالعطا ولا ندى بالزيادة يبقى كله بحساب. يا ترى ممكن ولا مواصفات الزهرة هتغلب؟

هديل مصباح said...

E7na bena3'lt felawel 3shan net3alm fel25er el3'aby bas howa elly by3'lat fel 2 :)

Anonymous said...

مش ضروري يكونوا مابيحبوش نفسهم ...
محمد حسن علوان بيقول جملة حلوة أوي في رواية سقف الكفاية...
بيقول ، أي إمرأة تلك التي ستكفيني بعد أن رفعتي أنتي سقف الكفاية إلى حد تعجز عنه كل النساء !؟!؟ . .
المقصود ، إن ساعات الإنسان بيدمن الترامادول عشان بيديه باور مش موجود في جسمه الطبيعي ، و يدمن البودره عشان بتعيشه في وهم مفيش مخدر تاني بيعيشهوله . . و ساعات بيدمن إنسان آخر ، لأنه معاه حس بحاجات عمره ما هايحسها مع حد تاني . . .

هديل مصباح said...

ماشى انا معاك انك ممكن تعيش حاجة مع حد ومتعرفش تعيش زيها تاني بس مهما كانت حلوة ومهما كنت حاببها خلاص ما بقتش موجودة فى حياتك طول مانت هتفضل فاكرها ومتعلق بيها هتبقى بتعذب نفسك اكتر لكن حاولت تنسى او حتى تركنها جواك بعيد فى مكان مش سها انك تفتكره هتبقى بتعذب نفسك اقل