الحظ لما يهادى ....... يخلى الاعمى ساعاتى

Monday 23 May 2011

وبعدين بقى يا ماريان

مبقتش عارفة أكتب من ساعة الثورة، كل ما أجي أكتب عن حاجة أقول مش وقتة يا هديل اللي أنتي عايزة تقوليه دة أحنا في أيه ولا في أيه !! وبعدين لاحظت كمان أن الناس اللي كانت بتقرا يوم تلاقيها مخلصة كل الجرايد ونازلة شير في المقالات على الفيس بوك ويوم تاني تلاقي الصورة السودا طلعت في البروفايل (يعني فكك منهم النهاردة)، بقيت بحس أني لو رحت لاي حد من صحابي وقولتله أنا عايزة أكتب عن التحرش مثلا هيحدفني بالدولاب ويصرخ في وشي "تحرش أيه البلد بتضيع بكرة المتحرشين دول مش هيلاقوا الشوارع اللى بيتحرشوا فيها" أهههه حتى التحرش هيخدوه طب نعيش أزاي في مصر من غير تحرش أحنا كدة ممكن منعرفهاش، أمال لو قولتلهم أنا عايزة أكتب عن الحب هيعملوا فيا أيه؟

ودي مش قلة عقل ولا فضا مني لانك مهما كنت مهموم بقضايا الوطن فأنت برضه عندك همومك الشخصية اللي بتاخد حيز من تفكيرك بيكبر أو بيصغر حسب مساحة مخك، دة غير أني كل ما بحاول أجري ورا الاحداث الجارية علشان أكتب عنها مش بلحق، وبحس أن الناس مش بتحسني في السياسي زي الاجتماعي (متكسفونيش قدام نفسي وقولوا اه)، بيني وبينكوا أنا كمان مش بلاقي نفسي في السياسي يمكن علشان الكتابة الاجتماعية أي حد ممكن يكتب عنها ويكتبها حلو لانه بيتكلم عن حاجة عايشها لكن اللي بيكتب سياسي لازم يكون فاهم وبيقول كلام موزون وموثوق فيه مش بيقول أي هبل في الجبل علشان هي دي الموضة دلوقتي


فانا قولت أغير النهاردة وأقول شوية هبل في الجبل، وملقيتش حد غير مريان صاحبتي المسيحية علشان أسألها هو أيه موضوع الفتنة الطائفية اللي ماشي فى البلد اليومين دول؟ على فكرة هي مش بتقرا أي حاجة من اللي أنا بكتبها (ودي أول علامة على أن في خلل في العلاقة بين المسلمين والمسيحين) كدة يا مريان مكانش العشم

أنا عايزة أعرف بس مش أنتي برضه عايشة هنا من زمان ولا ايه!! أصل تحسي أن فجأة كدة الناس خدت بالها أن في مسيحين في البلد، مره كنيسه ومره كاميليا (بالمناسبه لو تعرفي مكانها ياريت تقولي علشان في ناس بيدوروا على أختهم كاميليا)، وبعدين طلعتلنا عبير، قولنالهم مين عبير دي يا جماعة قالولك واحدة أسلمت والكنيسة حبساها، قوم أيه المسلمين راحوا يهاجموا الكنيسة علشان يطلعوها، ده لو واحد خبطته عربيه في الشارع ولا حد طلعله بلطجى علشان يقلبه بنعمل نفسنا مش شايفين، بس ده ميمنعش أننا ممكن نهاجم كنيسة عادي أو حتى نولع فيها أحنا مستكترين نفسنا يا ستي أحنا أحرار، أصل كمان في شوية كلام كدة عن المسلمين أنهم إرهابين فقولنا نأكد الموضوع


أنا عارفة أنك بقيتي خايفة، أقولك عليكي وعلى الهجره (وياريت تبعتى فيزا للسلفين المتعصبين والمسيحين اللي عايزين أمريكا تحميهم) بلاش السعودية علشان فيها مشاكل برضه، روحي أى بلد من اللي مضطهده المسلمين فرنسا مثلا هتعملي أحلى شغل هناك


المشكلة أكبر من كاميليا ومن عبير، أكبر حتى من حضن البابا لشيخ الازهر، أكبر من فلول النظام، ومن حتى السلفين، المشكلة أننا متربيناش على الاختلاف متربيناش على أننا نبص لاخلاق اللي قدامنا مش صليب على ألايد أو هلال في الرقبه (دي موضة جديدة هنعملها علشان نعرف المسيحين من المسلمين أفترى بقى تقولي أيه) متربيناش على أن الوحدة بينا لازم تكون أكبر من مجرد كل سنة وأنت طيب فى رمضان ولا حد الزعف، أتعودنا أن لما يحصل مشكلة بين مسلم ومسيحي لازم المسلم ينصر المسلم والمسيحي ينصر المسيحي، من وأحنا صغيرين ولغاية دلوقتي نفسنا نعرف الممثلين والمطربين مسلمين ولا مسيحين مع أنها مش فارقة معانا، عارفين ليه في اماكن كل اللي بيشتغلوا فيها مسلمين بس وأماكن تانية كلها مسيحين بس، كل ماتحصل مشكلة نقعد نقول الدين لله والوطن للجميع وبعدها نرجع تاني الدين زي ماحنا فاهمينوا والوطن مش سايعنا أحنا الاتنين، عمالين نقول المسلم والمسيحي أيد واحدة بس لما بيحصل حاجة بنلاقيهم أربع أيدين، أي مشكلة بقت بتحصل بقينا بنعلقها على شماعة فلول النظام، بالمناسبة موضوع المية اللي بتتقطع عندكوا كتير أكيد وراه فلول النظام

أحنا مش قادرين نعترف أننا عندنا مشكلة، مش قادرين نختلف من غير منتخانق حتى لو دينا واحد، مش عارفة أقولك أيه يا ماريان أنا معنديش حل غير أني أحلم ببلد الاخوة عندهم فعل مش شعارات، بحلم لما أركب المترو ألاقي واحدة مسيحية بتندهلي علشان أقعد في الكرسي اللي فضي جنبها مع أن في بنات تانية مسيحيات واقفة، بحلم أن أي خلاف بينا يبقى بين هديل وماريان مش بين مسلمة ومسيحية، بحلم بحاجات كتيرة أوي يمكن تتحقق ويمكن متتحققش


معنديش حاجة أقولها غير أنك من الناس القريبة إلى قلبي رغم أننا مش بنتقابل كتير (الله يرحم أيام باص الشغل) ومش بنتكلم كتير





































































































19 comments:

Heba Tullah Refaat said...

enty shaifa keda enk mosh betetkalemy f el siasa !!!! mazonesh 2a2dar 2a2oek en di siasa mn el daraga el 2ola ... el 3'arib en kol ma 2a2abel 7ad 2ala2y ra2io maie5telefsh 3an ra2iek kteeer 2omal meen ely bie3mel el fetna zai bezabt ma bei...2olek lazem 3agalet el 2ntag terga3 tany !!?? tab ma kol el nas btroo7 sho3'laha kool yom w kol wa7ed bie3mel elly 3aleh 7ata el 3atleen kol yom bienzelo nafs el 2ahwa ely kano bi23odo 3aleha .... ya3ny kolo zai ma howa tamam el tamam w kolo 2alesta , W BOKRA HAIB2A 27SAN ISASee more

هديل مصباح said...

ana 3rfa y5ty shklha esh3at, asln we ana bakteb elmawdo3 dah kont ba5od r2y elnas elly m3ya fel sho3'l menhom wa7da mes7ya kont ana we heya we bent tanya moslma elly 2ltlna mafesh moshkela asln ma7na bentkalem ma3 ba3d 3ady aho :D

Mariam Gaber Mohamed said...

likeee so much ya hadeel bgd specialy ( المشكلة أننا متربيناش على الاختلاف ) de fe3lan aktr moshkela f el our society

Meanass Hashem said...

wallahi 3ndk 7a2 ya dola 3arfen kwys en feh mshkla w m3 zalk m3'mden 3nena w sden wdnena 3lshan el markb tmshy w 5las w ykon 3ndna 2stkrar w 2mn w el klam ele klna 3rfeno bs 3la fkra 3wza tshofe f3ln el moslm w el mse7e 2ed w7da t2dre trg3e... ll ref tla2ehm klhm shabh b3d 7ata lbsehm wallahi matfr2e mslm mn mase7e w 3la km el trabt ele bnhm yaret na5d gdodna ele f el 2ryaf 2msla llw7da el watnya msh el 3eyal bto3 el yomen dol ele by2smona 3la 2sas dene w 5las.See more

هديل مصباح said...

elmarkb 3'er2t asln ya meno :D

Fadwa Akthem Ghoraba said...

Ahm 7aga an Marian t2ra el article 3shan 3ayzaha t3rf any msh tay2aha 3shan msh bt3brny :@a3'lty mara ya Marian w atsly da a7na kan byna 3aysh w calls w rush!!

هديل مصباح said...

fadwa law sam7ty eltzemy belmawdo3 we ro7y safy 7esabtk fe profile marian

Marian Magdy Ptata said...

ba7ebk ya hadel ( ya gma3a ana batlet el kesa de :)

هديل مصباح said...

marian mesytaky ana ay 5edma share it b2a

Marian Magdy Ptata said...

@ fadwa : ana 3arfa eny m2asra ya fedo m3aky bas enty mat3rafesh 3'alwtek gwa 2alby 2ad eih

Laila Abd El Hady said...

بالمناسبة موضوع المية اللي بتتقطع عندكوا كتير أكيد وراه فلول النظام
Ay 7aga y2ollak flol el nezam ma3a enena fe3lan 3andena moshkela w moshkela bgd w law ma3elgnahash hatekbar awy hatekbar aktar mema natakhayal : )
7elwa ya Hadee ;

هديل مصباح said...

we kama ya laila flol elnezam homa elly sr2o ellaptop bet3ko

Laila Abd El Hady said...

LOL :D:D

Nihal Ali said...

مقالك بداية جميلة ليومي يا هديل :) .. أنا متفائلة والله إن الجاي أفضل إن شاء الله عشان اللى بتتمني تشوفيه مع ماريان موجود فعلاً بينا وإن كان بيظهر على السطح دلوقت العكس نتيجة الجهل بالدين والتعصب الأعمى اللى ملمسنهوش في حياتنا بالتطرف ده قبل كده

هديل مصباح said...

الله عليكي يا نهال

Hanan Dahab said...

Nice one ... Keep it up Hadeel

هديل مصباح said...

thx hanan :)

Shaza Atef said...

wallahi ya Hadeel bra3'm eny serty magtsh fel mawdoo3, bs I have to confess enk 3abkaria, w miss both of u w miss bus el sho3'l kaman. Keep it up Hadeel :D

هديل مصباح said...

thx shaza i miss u too :)