الحظ لما يهادى ....... يخلى الاعمى ساعاتى

Tuesday, 5 April 2011

انت فين يا حسن

ازاى الواحده تعرف انها مستعدة لحب جديد؟


طبعا بعد ما تتخلصى من كل بقايا حمامك القديم (فكك من كلام اسامة منير بتاع داويها بالتى كانت هى الداء مينفعش تحبى جديد على قديم ده حتى الويندوز يضرب)، يعنى لما تيجى تفتكري الذى لا يجب ذكر اسمه فتحسى ان الذكرى بقت بعيده اوى، لسه فاكرة اه مننكرش بس الذكرى مبقاش بيجى معاها اى احاسيس لا حلوة ولا وحشة كأنك شيلتيه بذكرياته واحلامه فى اوضة الكراكيب (فى حد بيحب يروح يجيب حاجة من اوضة الكراكيب)، يعنى لا بقيتى عايزة تولعى فى نفسك وفيه وفى الكل كليله، ولا بقت سيرة اى راجل بتخليكى عايزة ترجعى، ولا لما بقي الهوا بيعدى فى الخرم اللى فى قلبك بتحسى انك بردانه ولا اى حاجة ده حتى بقى بيجيب طراوه، رجعتى تانى تسمعى اغنية حمد الله على السلامة بتاعة محمود العسيلى من غير ماتعيطى، ولو الصدفة البحتة ودتك لمكان من اللى كنتى شلتيهم من على الخريطة زمان علشان كنتوا بتروحوه، وقعدتى فى نفس االمكان اللى كنتوا بتقعدوا فيه وبعد كدة سألتى نفسك، حاسة بأيه؟ لاقتيها بتقولك احنا (انتى ونفسك يعنى) ليه بطلنا نجى هنا، ولو حد جه قالك ده كتب كتابه النهارده، قولتيله تفتكر معزمنيش ليه؟، لما قلبك يعمل لنفسه ضبط مصنع وكل العدادات فيه ترجع اصفار، رجع ينور كله تانى ومبقاش فيه حته ضلمه بتخافى تروحلها او تفتكريها، ساعتها بس بتحسى انك عايزة تحبى تانى


مع الاحساس ده بيجى احساس تانى مساوى له فى القوة وماشى معاه فى نفس الاتجاة، تقولولى هو ايه، اقولكم الاحساس بتاع ان فى حاجة ناقصة اللى بيجى فى عز ما نتى مبسوطة وكل حاجة تمام التمام، الحاجه اللى بتقولك ان سعادتك دى مش كاملة، احساس بيصحى من عز النوم ويخليكى تقعدى تسألى نفسك ايه اللى ناقص؟ ايه اللى ناقص؟ ايه اللى ناقصصصصصصصصصصصصصصصصصص؟


اهو هو دة يا سيدتى الفراغ العاطفى اللى بيقولوا عليه، انك تحسى ان الصوره عمرها مابتبقى كاملة، وانك مهما كنتى سعيدة هتبقى سعيدة اكتر لو فى حد جنبك، وطول مانتى ماشيه مش شايفة غير اتنين اتنين فطبيعى انك تقولى لنفسك طب انا حبيبى (الجديد لان القديم خده الوبا) راح فين


انتوا عارفين ان الدراسات العلمية (عملتها واحدة اسمها هديل باحثة فى جمعية المرأة المتوحشة) اثبتت ان الفراغ العاطفى هو اللى بيخليكى مبتعرفيش تنسى الذى مضى، بيخليكى افشة فى الذكريات بأيدكى وسنانك مش عايزاها تروح لمزبلة التاريخ علشان مش عايزة تحسى بالفراغ، ولما بتنسيها شوية بتلاقى حياتك بقت فاضــــــــــــــــــــــــــية اكتر من الاول وانتى اللى كنتى فاكرة حجم الفراغ هيرجع زى زمان، لاقتيه كبر اوى، ليه ياترى؟


علشان زمان كنتى حاسة بالفراغ بس مش شايفاه ولا لامساه، لكن دلوقتى انتى جربتى الحاجة اللى بتملى الفراغ يعنى بقت مجسمة بالنسبالك، علشان كدة الفراغ العاطفى اللى بعد الخرم بيكون اكبر من اللى قبل الخرم (والله اعلم)، فانتى دلوقتى كل ما تحسى بالفضا بتقومى مرجعة الذكريات اللى فى نص الطريق للمزبلة وتفكرى فيها تانى علشان الدنيا تتضيق شوية بدل ماهى واسعة عليكى كدة، يعنى مش علشان انتى ليلى وهو قيس، ولا هو الحب الكبير على رأى كابتن راغب علامة، ولا علشان هو كان احسن واحد شافتة عنيكى (اسمعى كلام الناس بقى واعملى الليزك)، ده علشان القصة دى كانت اقرب حاجة عاطفية حسيتى بيها


والشعور ده هو برضه اللى بيخليكى تدورى على اللى هيشغل الفراغ اللى انتى بس بتشوفيه جنبك فى المراية، كل يوم وفى كل واحد تقابليه، يقى عندك حساسية من اى كلمة حلوة، لدرجة اتك مبقتيش عارفة تفرقى، وبعد ما الكلام الحلو عندك كان بحبك ومعجب بيكى، دلوقتى بقت كلمة صباح الخير ياجميل ممكن تشوفيها انتى بداية لقصة حب، بقيتى بتفسرى سلوك الناس على مزاجك وبتعملى قصص من الهوا ونفسك اوى تصدقيها، اللى يبصلك مرتين يبقى معجب، اللى يتكلم معاكى بذوق شوية زيادة يبقى اكيد عينه منك، بقت اول حاجة بتيجى فى دماغك اول ماتشوفى اى ولد، ياترى ينفع


يا ريتها بتيجى على اد كدة، لا وكمان بتلاقى نفسك بتفكرى فى ناس غريبة اللى بكرش واللى مطول ضوافره (خصوصا صباع معين) كدة بقى الموضوع خرج من ايدك يا بنت الناس ولازم لمبة الخطر الحمرا تنور لان الفراغ سيطر عليكى لدرجه مخلياكى مبقتيش بتشوفى اصلا


عزيزتى (ب.ح) اللى حياتها بلا حسن يعنى، انتى ينفع تدورى على شغل، على هدوم، لكن مينفعش تدورى على الحب، الحب هو اللى هيدور عليكى ويلاقيكى زى ملاقاكى المرة الاولانية مع المردوم عليه بالنيله الكحلى (حلو الدلع بتاعة على فكرة) ولاقيتى نفسك وقعتى وبتحبى متعرفيش ازاى فى نفس ذات الوقت اللى انت لسة عمالة تسألى الناس: هو الواحد ازاى يعرف انه بيحب؟ هو الحب ده عامل ازاى؟


كل ما تلاقى نفسك عجبك حد وتخيلتى نفسك معاه فى الكوشه كده على طول (هو عصر السرعة وصل عندك انتى كمان) او لاقيتى عدد اللى بيعجبوكى فى اليوم وصل ل5، قولى اللهم ما اخزيك يا فراغ


انا عارفة انك نفسك تاخدى فرصتك المرة دى بقى، نفسك توصلى للجيم اوفر اللى عند المأذون، نفسك تنسى كلام صاحبتك بتاع "من استعجل الشىء قبل اوانة عوقب بحرمانه"، لانك انتى وصاحبتك دى بس اللى لسه فاضلين مستنين الاوان (شكلكوا استعجلتوا) ، نفسك تقابلى الحد اللى لما تحبيه هتقولى لنفسك "انا ازاى كنت هرضا باللى قبلك"، الحد اللى يستاهل وجع الخرم الاولانى اللى علمك وخلاكى مغلطيش فى اختيارك المره دى كمان، الحد اللى تشوفى الدنيا كلها فيه (بعد ماعملتى الليزك طبعا) ، الاستثناء بتاع قاعدة صحابك المتجوزين بتاعة مستعجلة على اية بلا نيلة ( انا عارفة انك بقيتى بتكرهيهم هما وصاحبتك اللى فوق )، متقلقيش حسن جى جى، امتى الله اعلم بس ان شاء الله جى، وعلى رأى المثل كل فولة وليها كيالها (مستعجلة ليه اكيد هو دلوقتي بيلم المحصول) علشان كدة اسمعى منى دى


من استعجل الشىء قبل اوانه عوقب بحرمانه


22 comments:

♥●• Izdiher·•●♥ said...

Some difficult for me but nice I like first two paragraph .

Hadeel Mesbah said...

thx efrah :)

Sally Mohamed Hamad said...

المقال بجد روعه
عجبتنى الجمله دى اوى ( ولا لما بقي الهوا بيعدى فى الخرم اللى فى قلبك بتحسى انك بردانه ولا اى حاجة ده حتى بقى بيجيب طراوه)

Hadeel Mesbah said...

شكرا يا سالى اوىىىىىىىىىىىى

Omnia Adel said...

eshma3na 7assan ya hadeel tyb !!!:p
bs bgd gamda awiii
bs enty 3arfa elmoushkla enna msh bn3rf enna sab2na elawan ela mt2a5r awiiiiii

Hadeel Mesbah said...

ana toul 3omry ba7eb el2esm dah, web3den enty mesh fakra ana 7yaty bela 7asan, elawan 3omro mabysb2na lew7do e7na elly benseb nafsna

Omnia Adel said...

e7na bnseeb nfsna 3ashan bn7is b 7agat gameeeeeeeela msh bnb2a 3awzeen nidy3ha bs fe el2a5r bnfoo2 3ala 2lm gamed awiii

Hadeel Mesbah said...

bosy elwa7ed mesh byt3alem beblash bas e7na mesh lazem nestna lama elmawod3 y7slna momken net3alem men elly by7sal lelnas, anyway elmohem enena net3alem we man3'latesh nafs el3'ltat tany

Omnia Adel said...

sa7 elwa7ed msh byt3alim bblash
w 3"alt enharda haykoon dars kbeer w moufeed awii l bokra isa ,,

Hadeel Mesbah said...

isa

Roah Yousry said...

gamiiiiiiiiiiiiiiiiiiiiiiiiiiiiiiiiiiiiiil el mqal ya hadel ..ana bgd bamooot f maqalatek rabna yewafa2ek ya rab daymn :))

Hadeel Mesbah said...

rabena y5aliky bgd ya esraa we ywf2ek enty kaman isa

Doaa Abd El-Hady said...

la2eto w 2aret el article :D:D
i liked soooooooooooooo .......... ana 7ayaty bela 7assan :D:D
LOL

Hadeel Mesbah said...

lol

Doaa Abd El-Hady said...

da7aktiny awy wallahy i like :D:

Fadwa Akthem Ghoraba said...

Dola...howa el khorm msh bytsad khales??

Hadeel Mesbah said...

aked bel2smant :D, bosy ana le3'yat delw2ty mesh 3rfa enty law 7aga et2t3t men hodomek we 5yteha sa3at mabtbansh bas enty 3omrek mabtnsy enha met5yta

hala said...

gamela ya dola, bas 3ayza as2alek teftekry el welad bardo momken y7eso belfaragh da???

Hadeel Mesbah said...

mythy2lesh l2nhom law 7ythom bela 7osnya hy3rfo ay wa7da isa om el5lol 3lshan temla elfra3' bas e7na bent3l2 we ay wa7ed by3ady fe 7ytna ben3mlo temsal beside enena lel2sf mesh haynf3 n3rf kol youm wa7ed

Fadwa Akthem Ghoraba said...

Dola...howa el khorm msh bytsad khales??

هديل مصباح said...

aked bel2smant :D, bosy ana le3'yat delw2ty mesh 3rfa enty law 7aga et2t3t men hodomek we 5yteha sa3at mabtbansh bas enty 3omrek mabtnsy enha met5yta

Nihal Ali said...

Dolaaaa bgad estamta3t belmakal gedaaaaaan.. yod7'ol el2alb 3ala tool l2no maktob bsed2 w 3afawya.. which is simply YOU..btw, I read it twice looking 4 my name, before getting what you expect :))))