الحظ لما يهادى ....... يخلى الاعمى ساعاتى

Thursday 30 December 2010

2010


مش هتكلم عن 2011 انا لسه معرفهاش انا عايزة اتكلم عن 2010 عايزه الحق الست الطيبه دى قبل ماتمشى وتبقى ماضى عايزه اتكلم عليها وهى لسه حاضر وهى لسه موجوده

فى حاجات كتير اتغيرت فيا السنه دى يعنى يوم زى رأس السنه وعيد ميلادى كانوا مواسم اكتئاب بالنسبه لى، مانا معملتش حاجه فى السنه القديمه علشان ابقى مبسوطه اوى ان الجديده هتشرف، وكان دايما السؤال اللى بيطرح نفسه فى اليومين دول طب وبعدين يا هديل هتفضل السنين تعدى عليكى كده وانت مبتعمليش اى حاجه؟

ده غير ان فى حياه كل حد فينا مجموعه من الناس اللى ليهم اضافات عظيمه لحياته زى ياحرام انت خريجه سياسه واقتصاد وبشتغلى كده مع انى والله بشتغل شغلانات محترمه يعنى لا بنشل فى الموالد ولا حراميه غسيل ولا حاجه، سؤال تانى انت عندك كام سنه لو الاجابه فيها حاجه وعشرين السؤال اللى لازم يجى بعده متجوزه؟

طيب انا لا بشتغل سفيره علشان انا سياسه واقتصاد ولا متجوزه ولا مخطوبه ولا حتى بحب فى قصه حب وده طبعا كان قمه الفشل من وجهه نظر الناس ومن وجهه نظرى انا كمان، انا كنت بفكر كده كل ما عيد ميلادى يجى ولا سنه جديده اسأل نفسى اشتغلت حاجه قريبه من دراستى لا طيب لاقيت اللى امه داعياله برضه لا وخاف واقلق من اللى جاى مانا ماشيه فى سكه اللى يروح ميرجعش بقيت الاستثناء بتاع القاعده اللى بتقول الواحد يا ينجح فى الشغل يا بنجح فى الجواز وانا الحمد لله محققتش حاجه فى الاتنين

واللى زود الطين انى كنت مش لاقيه نفسى فى ولا شغلانه انا اشتغلتها واعد اقول لنفسى، دانا سياسه واقتصاد ازاى اشتغل حاجه اى حد ممكن يشتغلها، وكتير من صحابى اتجوزوا وباقى الناس اللى كانوا معايا فى الكليه اللى اتأخر منهم فى الجواز اتجوز بعد سنتين من التخرج كائن السنتين دول كانوا موسم التزاوج بتاع سياسه واقتصاد بس انا منفعش اشترك فيه اصلى كنت فى الحمام

كان نفسى الاقى نفسى بس مكنتش بدور عليها تقريبا كنت مستنياها هى اللى تلاقينى، لغايه ما فى يوم وانا فى شغلانه من الشغلانات اللى محبيتهمش واحده صاحبتى كانت بتكلمنى عن بلوج باباها ودى الشهاده لله كان اول مره اسمع فيها عن موضوع البلوجات ده، قولتلها الله يعنى انا كمان ممكن اعمل بلوج واكتب فيه، وبعد ماعملته ملقتش حاجه اكتبها فقولت خلاص انا هكتب عن الحاجات اللى قابلتها فى حياتى

لما بدأت اكتب حسيت انى لاقيت نفسى وهى كمان لاقيتنى مكنتش بفكر مين هيقرا علشان الكتابه كانت حاجه بتسعدنى فكده كده انا هكتب سواء حد قرا (صحابى يعنى) او محدش قرا خالص

صاحبتى دى برضه هى اللى قالتلى اعملى جروب على الفيسبوك، انا مكنتش بفكر فى الموضوع ده خالص اصل مين اللى هيدخله انا عن نفسى لو شوفت جروب زى ده مش هدخله، ولما لاقيت الناس بتدخل وتقرا وتقولى حلو الحاجات اللى بتكتبيها مكنتش بصدق واقول معقول

فى 2010 اخيرا بقت بعمل حاجه وبقى عندى هدف هو صحيح اتأخر بس الحمد لله انه جه فى الاخر، مبقاش بيفرق معايا عيد ميلادى والسنين اللى بتروح وتيجى علشان بقيت بعمل حاجه عايزه اعملها مش مفروضه عليا علشان بس كل الناس بتعملها

انا عايزه اقول لكل الناس اللى بعد مابتقرا بيبقى عندها وقت لسه تقولى فيه انت بتكتبى حلو، انتوا مش عارفين كلامكوا ده بيفرق معايا ازاى انا عايزه اعرفكوا كلكوا فى الحقيقه، انا نفسى كلكوا تكونوا بتعملوا حاجه انتوا بتحبوها علشان تحسوا باللى انا حساه، كتير منكوا بيقولى انت بتقولى اللى جوانا لانه جوايا انا كمان انتوا كمان لو قررتوا تكتبوا عنه اكيد هيبقى حلو لانه حاجه حقيقيه انتوا حاسين بيها

انا فى 2010 اتعلمت ان الفشل مش انك متكونش زى الناس الفشل انك تقارن نفسك بالناس لانك طول مابتعمل كده لا هترضى عن نفسك ولا هترضى عن الناس، وزى مافى ناس فى حياتك بتحبطك فى ناس تانيه بيعملوا منك حاجه، انا عارفه انى لسه ولا حاجه بس انا بقيت عند نفسى حاجه وده المهم

انا كواحده من المشاهير دلوقتى يعنى فى 2 تقريبا يعرفونى احب اقولكم اخبارى فى السنه الجديده ان شاء الله الكتاب هينزل فيها























12 comments:

Anonymous said...

أولا : كل سنة و انتي طيبة .. ان شاء الله السنة الجديدة تكون سنة سعيدة عليكي و على كل اللى بتحبيهم
انا كنت باقول زيك كده : انا مش بشتغل بشهادتى مع اني خريجة اعلام ..و لسة ما جاش النصيب فى الزواج .. بس دايما باقول لنفسي .. الحمد لله كل ميسر لما خلق له و كل شئ بأوان
ربنا يكرمنا جميع بكل اللى بنحبه
اللهم آمين

هديل مصباح said...

وانت طيبه وعليكى انت كمان ان شاء الله
امين يارب

Mariam Gaber Mohamed said...

First , ana mabsota awe w ana ba2ra el kalam 3shan ur feel weslne aweee aweee .. second mohema awe fe3lan el goz2iia bta3et en el social byfred 3alena noo3 aw namat mo3ayan mn el 7ayah ele may3mlosh maykonsh 7ad normal bs da msh sa7 la2en fe3lan kol wa7ed lazem yekon nafso maykarnsh nafso b 7ad fa de kaman 7aga 3agbtneee .. third ba2a Congrats ya DoOo for this step w isa this year tekoon gr8 4 U and 4 all w mazed mn el naga7 ;)) happy new year :))

Possy NobonTo said...

انا فى 2010 اتعلمت ان الفشل مش انك متكونش زى الناس الفشل انك تقارن نفسك بالناس لانك طول مابتعمل كده لا هترضى عن نفسك ولا هترضى عن الناس، وزى مافى ناس فى حياتك بتحبطك فى ناس تانيه بيعملوا منك حاجه، انا عارفه انى لسه ولا حاجه بس انا بقيت عند ...نفسى حاجه وده المهم

Chapeau ya Hadeel ... =) ... Happy new year w isA kollena n3mel elli nefsena feeh fe 2011

هديل مصباح said...

isa ya possy
we mazed men elnaga7 leky enty kaman ya mariam isa, e7na lazem ne2bl ba3d mara 3nd mai

Mariam Gaber Mohamed said...

i hope so ya dodo ana kaman nfse awe law zabato yom bgd 2olole w ana agy isa 3shan nfse ashofko koloko gdnnnn

Mahmoud Azab said...

الفشل انك تقارن نفسك بالناس
جميل كلامك يا هديل (Y)

هديل مصباح said...

isa ya mariam
thx ma7moud :)

Laila Abd El Hady said...

Dear 2010 thx 3ashan akhiran kharagty Hadee men el e7bat w 3amalt ely bt7ebo bgd : ) im proud of u ya Hadeeeeeeee : ) w ya Rab 2011 tkon a7la kman ; )

هديل مصباح said...

yarab ya o5t laila 3lena kolena isa

Roah Yousry said...

awln..happy new year w isA el sanadi te7a2a2i elli enti ma2dertish te7a2a2ih el sana elli fatet..saneyan..enti f3ln ketabatek kolha 7elwa gdn w rabena yewafa2ek ya rab w teb2i daymn f taqadom w naga7

هديل مصباح said...

sana sa3eda isa 3aliky ya esraa thx u so much wenty kaman isa