الحظ لما يهادى ....... يخلى الاعمى ساعاتى

Wednesday 14 July 2010

زعلتى على ايه النهارده؟

قالك الهم عارفنا ان غبنا عنه يسأل علينا معارفنا , انا كهديل واحد من همومى اليوميه رحله البحث عن السى تى ايه وبقيت مكرسه حياتى ادعى انى الاقيه كل يوم وانا رايحه وراجعه من الشغل وان شاء الله هنستضيف فى البلوج الحلقه اللى جايه واحد من سواقين السى تى ايه علشان يكلمنا عن ازاى بقى من الحاجات النادره لدرجه ان هو نفسه مبيركبوش . فى ناس زى كتير شايلين هم اى حاجه وكل حاجه بيبقوا مش قادرين يمشوا من كتر الهم (او زعلانين ان السى تى ايه فاتهم) اصلا الهم والاكتئاب بقوا صحاب بيت وكل الناس ماشيه تكلم نفسها من كتر الهم زمان كان لما تلاقى حد ماشى يكلم نفسه كان بيبقى مجنون دلوقتى لو لاقيت حد مش بيكلم نفسه بيقى هو اللى مجنون , ولما تسأل اى حد عامل يقولك والهى تعبان والهى قرفان لكن لو حد قالك بقى مبسوط على الاخر والدنيا فل تقول فى نفسك مبسوط يعنى ايه الكلمه دى يكونش معناها سعيد ايه الكلام الصعب ده وطبعا مش هاتتكلم معاه تانى لاتتعدى وتبقى سعيد زيه
هى دى المشكله اكيد يعنى محدش فينا زعلان على طول اكيد فى حاجات تبسطنا ساعات يعنى بس احنا ايه نسيب الحاجه الحلوه ونفكر فى الوحش يعنى لو فى اليوم حصل حاجه واحده منيله بنيله وعشر حاجات حلوين نسيب الحلو ونفكر فى الحاجه الوحشه , احنا مش نكدين او بعضنا يعنى لكن احنا اتعودنا على كده اتعودنا على النكد والارف والزعل والحزن ونسينا يعنى ايه فرح يعنى ايه سعاده يعنى ايه اكون مبسوط . لو حد لا قدر الله كان مبسوط مبقاش بيقول (ماعدا الراجل اللى قال فوق شكله مش من البلد دى) بيقنا بنخاف حتى لو الواحد عنده مشاكل بس عاديه يعنى مش جامده اوى يخاف يقول لاى حد لايكون عنده مشاكل اكبر فيحسده , دلوقتى بقى اللى يشوف بلوه غيره بيحسده عليها
انتوا عارفين احنا كمان بيوحشنا النكد وان الواحد كده يبقى قاعد زعلان وبيعيط يعنى لو مفيش حاجه نكدت علينا نقوم ايه فاتحين التليفزيون وندور على اى فيلم من افلام النكد العالميه عربى , انجليزى او حتى هندى الحاجات الحلوه دى اللى البطل او البطله بيموتوا فى الاخر الواحد بيعيط عليها من قلبه ولو ملقيناش وده طبعا نادرا يعنى نقوم ايه نفتكر ايام زمان اللى كنا مبسوطين فيها (حلو) ونعيط انها خلصت ومش راجعه تانى (مش حلو) او نفتكر حد كنا بنحبه وقلبنا ونعيط او نكلم اى حد من صحابنا ونعيط مع بعض العياط برده بيحب اللمه احنا كده كده هنعيط .
ومضى العمر يا ولدى واحنا بنعيط يعنى لما ولادنا يسألونا كنتوا بتعملوا ايه زمان هنقولوا هوهوهوهوهههههههه ههههييييه كنا بنعيط . والعمر جرى واحنا ماسكين فى اللى مزعلانا ونساين اللى بيفرحنا او زعلانين على الفات مع اننا عارفين ان الفات مبيرجعش تانى لكن نسيبه ابدا لازم نزعل عليه ده واجب برده , انتوا عارفين احنا دايما يا بنفكر فى الماضى او المستقبل عمرنا مابنفكر فى الحاضر اللى احنا فيه يعنى دايما يا زعلانين على حاجه فاتت او خايفين على حاجه لسه هاتيجى لكن اللحظه اللى عايشنها دلوقتى هنستنى لما تفوت وتبقى ماضى وهنزعل بقى عليها ده غير ان احنا كنا خايفين منها لما كانت لسه مستقبل ولسه مجتش
الهم نفسه زهق مننا ويمكن مبقاش عايز يجيلنا لكن مضطر لكن احنا مش مضطرين اننا نفضل مهمومين على طول مفيش حاجه اسمها زمان كان زمان ده خلاص راح ومش هايرجع كلمه لو دى هى اللى جايبلنا الكافيه حتى لو الزمان رجع اللى حصل هيحصل تانى واى حاجه كان نفسك فيها ومحصلتش مكنتش نصيبك اصلا متزعلش عليها احنا طريقنا مكتوب من قبل مانيجى الدنيا. ومتخافش من بكره ممكن متشوفش بكره اصل وتبقى ضيعت النهارده. والناس اللى خرجوا من حياتك مكنش نصيبك انهم يكملوا فيها حتى لو تعرفهم من ايام فحت البحر. اى حاجه بتحصلنا هى الخير لينا بس احنا مبنعرفش نصدق ده. ومتفتكرش انك انت لوحدك اللى مهموم وزعلان كل الناس زعلانه حتى لو مبيقولوش
انا عايزه احكيلكوا حكايه انا مكنتش اعرف اذا كنت بعرف اكتب ولا لا بس انا كنت بحب اكتب بس مكنتش بكتب برضه وبعدين حصلتلى حاجه فى وقت وزعلت اوى وحسيت ان حياتى خلاص وقفت ومكنتش عارفه اخرج من حزنى وفى يوم واحده صاحبتى قالتلى ان باباها عامل بلوج وبيكتب فيه ففكرت انى ممكن انا كمان اعمل بلوج واكتب فيه وكنت ناويه اخلى صحابه بس هما اللى يقروا علشان انا مكنت حاسه ان الحاجات اللى بكتبها ممكن تعجب حد (كنت عارفه ان صحابى هيجاملونى حتى لو وحشه) وعملت البلوج وبدأت اكتب ودى الحمدلله من اكتر الحاجات اللى فرحتنى فى حياتى ونسيت اصلا انا كنت زعلانه من ايه ولا على ايه. انت بس اللى تقدر تخرج نفسك من اللى انت فيه مش حد تانى لو زعلت اوى اعمل اى حاجه بتحبها وممكن تبقى فاكر انك مش بتعرف تعمل حاجه بس ممكن تكون بتعرف تعمل حاجه اى حاجه . الهم كده كده عارف طريقك وعارف هيجيبك منين لكن انت كمان عارف طريق السعاده وعارف طريقها فين بس انت اللى مش عايز تدور او مستنى ان الحزن يخلص لكن المفاجأه بقى انه مبيخلص والسعاده كمان مبتخلص.

21 comments:

Anonymous said...

بس يا هديل يا صاحبتي ساعات بحس اني الدنيا ديه حظوظ ساعات في ناس مش بتلحق تفرح او مدة الفرح عندها قصيرة جدا كل ما تحس انها بدأتا تفرح تلاقي الهم والحزن بيجري وراها باقصى سرعة
لدرجة انها تقول يارتني ما فرحت هو اللي خلى الفرح يجيلي ما انا كنت في حالي
بس بعد ده كله لازم نحمد ربنا اكيد شيل لنا السعادة الحقيقة بس امتى وفين الله واعلم
هالة

Anonymous said...

المسألة مش مسأله حظوظ او نكد ممكن حاجات صغيره و تافهه هى اللى بتزعلنا و زى ما بنزعل بسرعه بنفرح بسرعه بردوا و بعدين الدنيا ديه دار اختبار و تعب و لازم النكد يكون موجود فيها
و السعادة الحقيقة تكمن فى الرضا بالقدر و الرضا بالمقسوم و ربنا يجعلنا من عبيدة السعداء فى الدنيا و الاخرة.
يمكن انا عن نفسى لما ببقى مضايقة او زعلانه بحاول اشوف حاجه تخلينى افرح شويه. و الحمد لله بتعدى لما افكر فى ان اللى مزعلنى دا موضوع تافهه. و ربنا يفرحنا كلنا.
مع تحياتى
فاطمة

هديل مصباح said...

الموضوع مش حظوظ كل واحد بيشوف اللى مكتوبله حلو او وحش احنا كده كده هنشوفه ونحمد ربنا احنا مش بيحصلنا غير الخير

Anonymous said...

eh el 3alamya dyy y dola enty shklk da7`la 3la mon3ataf f 7ayatk :)

Nihal said...

عندك حق... أنا متفقه معاكي يا هديل
نهال

Fadwa Akthem Ghoraba said...

لما ولادنا يسألونا كنتوا بتعملوا ايه زمان هنقولوا هوهوهوهوهههههههه ههههييييه كنا بنعيط

heheheh :D we el 3yat f3lan by7b el lamma..kont a3rf 3 freindz byt2blo everyday at work y3odo y3yto sawa :D allah yr7mhom b2a !! basho mn kotr el 3yat !!...

Bas sa7btek aly altlk 3la fkret el blog de gad3a awy..I think she chose the group's pic and used to edit the blog as well :D Allah yr7mha b2a hya kmaaan :D

هديل مصباح said...

hehehe 3eb 3aliky mana etkalmt 3ank aho

Laila Abd El Hady said...

Love it men kalby bgad enty mesh fahma ezay : ) Yeah we must b the PRESENT not past or future...
& I totally agree wiz u en kol 7ad howa elly beyla2y his way 2 happiness mesh 7ad tany elly haykharago men el ekte2ab wel za3al : )
Tafawakty 3al...a nafsek my dear friend ; )See more

هديل مصباح said...

nefsy antalek lel 3almya ba2a

Basma Nasr said...

Dooola :) at25rty 3la mo3gbenek awy ;), bas bgad gamda a5er 7aga,aslan klamek sa7 moot ,,,,, f3lan ay 7ad fe el donya de aked fe 7aga bt5leh sa3ed bas howa ally byksl s3at kter ydwar 3leha.

Doaa Abd El-Hady said...

chapeau ya hadee bgd ya3ny :)

Hagar Omar said...

ohhhhhhhhhhhhhhhhhhh hadawyyyyyyyyyyy ohhhhhhhhhh hadawyyyyyyy mesh 7a2ol aktar men kda

Mariam Gaber Mohamed said...

speechless bgd u r awesome one =) sry 4 being late .. bs hadeel bgd mafkrteesh tegma3e el articles de f ktab zay masalan ( ketab malosh esm)bta3 el 3esele .. bgd try ta5de el step de 3shan el kalam da bgd gamed awe mn 7a22o yantasher w lw nezel ketab feh el kalam da sada2ene hayeb2a best salles isa =))

هديل مصباح said...

walahy nefsy bas lesa mesh 3rfa abd2 menen bas isa habtedy adwar begad

Hamada El Khazregy said...

والله فعلا صح عندك حق احنا اللى مش عايزين نفرح

هديل مصباح said...

:)

Sarah Gomaa said...

شويه حبوب امل وسعادهمتدوبين فى الكلام ده يخليك تتنهد تنهيده كبيره لما تقراه
وتقول
ياسلام والله عندك حق يا هديل
:) :)

الله ينور

هديل مصباح said...

وهو ده المطلوب انك تحسيه يا ساره

رحاب المليحي said...

الله ينور عليكى يا هديل :)
عندك حق ف كل كلامك..
بس يا ترى انتى بقى بتعملى بيه؟ :)

هديل مصباح said...

انا كنت زمان مبعملش بيه وكنت ارفه نفسى على اى حاجه وعلى طول باصه ورايا على اللى فات وزعلانه عليه مع ان كان فى حاجات حلوة كتير فى حياتى بس مش عارفه احس بيها لانى دايما شايفه ان زمان كان احلى

Unknown said...

فكرتينى ياا هديل بفيلم " محطة مصر "
لما أم كريم عبد العزيز كل أما تشووفواا تعيط
بجد كااانت لقطة توووحفة توصف كل اللى انتى قولتيه داا
احناا نااس بتخااف تفرح لفرحتهاا متكملش فبالتاالى بنقول بلااش من الفرح أإصلاا
ومع ذلك تلاقى الشعب المصرى هو شعب النكتة العاالمى .. يضحك فى المصايب قبل الفرح :D:D:D