الحظ لما يهادى ....... يخلى الاعمى ساعاتى

Wednesday, 19 May 2010

!!!هما راحوا فين

كانوا هنا أنا متأكده أنهم كانوا هنا ولا انا بيتهيألى بقى ولا أيه. يحكى أن فى قديم الزمان كان هناك مخلوق اسطورى أسمه الرجل المصرى (قبل مابيريل يطلع طبعا) وحطولى 3 خطوط تحت كلمه رجل وكان يتميز هذا المخلوق بالشهامه والجدعنه والطبع الحامى وحاجات غريبه كده منوعاش عليها. الحاجات دى بقى أختفت دلوقتى وبقى مكانها صفات تانيه زى الذكوريه والتعقيد و الواحد بقى بيحس أنهم كلهم بقوا مرضى نفسين ده غير اننا اصلا مشوفناش الصفات التانيه احنا وعينا على البنطلون اللوويست والبوكسر اللى باين منه والله الواحد مش فاهم موضوع البوكسر ده يعنى الناس هتستفيد ايه لما تشوفه. دول كمان بيعملوا شعرهم عند الكوافير بس ده عادى ما البنات بقوا بيقصوا شعرهم بوى كت. مش عارفه انا بس اللى بحس كده ان كل الولاد بقوا شبه بعض وكل البنات شبه بعض وساعات بقى الواحد مش بيبقى عارف دول ولاد ولا بنات
الواحد مش عارف فيه ميكروب فى الجو يعنى بيخلى الناس كده ولا هما بيتربوا غلط ولا ايه. انا مش عارفه ليه الناس بتفرق فى تربيتها لاولادها مش بتربى الولاد زى البنات بتشوف الام من وبنتها صغيره بتدربها على الشغل فى البيت علشان لما تكبر تاخد الالومبيات ان شاء الله ومش بس فى البيت انها كمان تعمل كل حاجه لاخوها جهزى الاكل لاخوكى اكوى قميص اخوكى مش فاهمه يعنى مايتنيل اخوها يعمل حاجته لنفسه يجوا ياكلوا تلاقى مامتها بتحط اكل لاخوها اكتر منها ليه علشان هو راجل حتى لو عنده 7 سنين ماهو عين امه بقى. يرجع الولد ده من بره حتى لو فى نص الليل حتى لو مامته نايمه وبكل بجاحه يقولها عايز ياكل وتقوم الام تجهزله الاكل تجرأ بقى البنت تطلب من امها طلب زى ده كانت وأدتها لانها اصلا فى العادى بتقولها عندك الاكل فى المطبخ لو البنت قالتلها ما انت بتعمل لاخويا هتقولها هو راجل لكن انت متعملى لنفسك هو انت صغيره هى دى الكلمه اللى بنعلق عليها كل حاجه ماهو كمان مش صغير مايعمل لنفسه لكن هو ايه راجل

ليه بنربى ولادنا على كده ماهم ولادنا دول هايكبروا فى يوم من الايام ويربوا ولادهم هما كمان على نفس اللى اتربوا عليه يعنى لو ربينا الولاد على انهم يساعدوا اخواتهم البنات فى البيت وانهم يعملوا كل حاجه لنفسهم وميعتمدوش على امهم او اختهم لما يكبروا ويتجوزوا هيساعدوا مرتاتهم وهيربوا ولادهم برده على كده

والله يعنى الواحد بيشوف حاجات غريبه غرابه زى مثلا ان اى اسره مصريه اول مايدخل ابنهم الجامعه يجيبولوا عربيه هو بس الى عنده عربيه واخته الى اكبر منه دخلت وخرجت من الجامعه ومفكروش يجبولها عجله حتى أو لو عندهم عربيه يدهالوا هو مش البنت ولما تيجى تتكلم معاهم يقولولها الولد كبر وبقى راجل كأن العربيه دى علامه من علامات الرجوله لكن انت عايزه عربيه ليه هتعملى بيها ايه وانت بتروحى فين. لكن هما لو فكروا مع نفسهم شويه يلاقوا انهم المفروض يجيبوا للبنت مش للولد ليه بقى علشان البنت بتتبهدل فى المواصلات احنا اصلا مش عارفين نمشى فى الشارع والعربيه هترحم البنت من الارف الى بتشوفه كل يوم لما بتيجى تروح الصبح كليتها ولا شغلها ومش لاقيه تاكسى معبرها ومش عارفه تقف فى انهى حته فى الشارع علشان محدش يضايقها لدرجه ان فى بنات بتقف فى الجزيره اللى فى نص الشارع علشان ناحيه الشارع اللى كانت واقفه فيها فيه ناس عكسوها وضيقوها راحت معديه الشارع لاقت ناس تانين ضايقوها وعاكسوها فملائتش حل غير الجزيره. البنت دى لما تيجى تقول لاخوها يوصلها فى حته يقولها مش فاضى وميرداش مع انه بيوصل صحابه فى كل حته وعمال يلف ويدور فى الشوارع يعاكس البنات لو اخوها ده بقى مصاحب هيوصل صاحبته وام صاحبته وبنت خاله صاحبته فى كل حته لكن اخته بنت البطه السودا. لو خارج هو وصحابه وكان فيهم بنات فى حته والوقت اتأخر ميرداش انهم يروحوا لوحدهم ويحلف انه لازم يوصل "نفر نفر" فيهم لبيوتهم ما هو راجل بقى (لسه شارب بيريل) , لكن اخته بقى يأما هيبقى عندها واحد زميلها فى الشغل أو الكليه بيبقى عايز يوصلها علشان متروحش لوحدها وبرضه هتلاقوه بيعمل كده مع الناس الغرب بس ماهو احنا كده من بره هلاهلا ومن جوه اجارك الله أو اصلا محدش بيوصلها فى حته ليه لانها مبتخرجش اصلا علشان اخوها واهلها مبيردوش مع انه خارب الدنبا مع نص بنات مصر. يعنى هو بيخرج مع بنات ومش عايز اخته تخرج حتى لو مع بنات حتى لو مخطوبه مش بيبقى عايزها تخرج مع خطيبها ولو رضى يبقى بضرب النار وممكن هو يكون كمان خاطب وبيخرج مع خطيبته عادى لكن هو حلو ليه و وحش لمين لوعرفت الاجابه اتصل بجمعيه المرأه المتوحشه
كل شاب مصرى دلوقتى بقت الست الطيبه هيفاء وهبى شغله الشاغل بيدورعليها فى كل واحده بيشوفها (طبعا هو كان ومازال وهيفضل طول عمره بيدور) عايز البنت اللى تكون معاه احلى واحده بيبسط اوى لما صاحبه يقوله دى جامده جدا قال طبع حامى قال ابقى سلملى على الترماى وبيقى ماشى معاها كده والارايال ماشاء الله منوره كده فوق رأسه مبسوط ان الناس بتبصلها وبتعجب بيها ولو متجوزهاش واتجوز اى واحده تانيه هيفضل طول عمره يبص مع الناس التانيه اللى بتبص, هو البنت معندهاش وظيفه غير أنها تكون جميله طيب مايجيبوا اى تمثال ويعدوا يبصوا عليه زى ماهما بيقولوا الراجل مش بشكله البنت كمان مش بشكلها البنت مش مزه ومش مكنه ومش جمل ولا وحش البنت انسان
فى ولاد تانيه بتحب تغير كده وتجدد مثلهم الاعلى فيلم أمراه واحده لا تكفى يحب يعرف دى ويخرج مع دى ويقولك البنات بقت صايعه قال مانتوا اللى بتخلوها تصيع يعنى لو الولاد لمت نفسها البنات الصايعه دى مش هتلاقى حد تصيع معاه وربنا يهديها. وبعد التاريخ الطويل المشرف للولد قال ايه بيبقى ياعينى معندوش ثقه فى البنات وعايز يتجوز صالونات (الدمعه هتفر من عينى) يعنى يبقى عمل كل حاجه فى الدنيا وعايز يتجوز واحده معملتش أى حاجه فى حياتها بس ربنا مابيسيبش الناس دى بتقع وقعات فى بنات برضه معملتش اى حاجه فى حياتها غير انها عرفت ولاد محافظه القاهره بس
فى ولاد بتضحكنى اوى لما يلاقوا بنت مثلا بتعتمدعلى مامتها ولا مبتعرفش تطبخ يعدوا يقولولها ماتكبرى بقى ماتعتمدى على نفسك وهما فى نفس ذات الوقت معتمدين على ابوهم انه يشغلهم و يجبلهم شقه ويفرشها لكن ازاى يعنى البنت تكون متعرفش تطبخ البنت كده مش بتتحمل مسؤوليه علشان بس مبتعرفش تطبخ لكن هما بقى شايلين مسؤوليه الزن على ابوهم بيتعبوا والله
مفيش بنت دلوقتى بتعرف تمشى فى الشارع فى امان الله الا لازم تسمعلها 100 الف كلمه طبعا نوعيه الكلام بتختلف حسب بقى هى ساكنه فين واكيد مش محتاجنى اقولكوا الكلام انتوا اكيد عارفينه المهم طول ماهى ماشيه لازم تسمع وخلاص كل الرجاله باختلاف اعمارهم ووظايفهم من اول الولد اللى عنده سبع سنين لغايه الراجل اللى مات مرتين قبل كده اموت واعرف برضه هما بيستفيدوا ايه لما كل واحد يرمى كلمه لكل واحده ماشيه ايه يعنى شعور النصر الى بيحسوا بيه لما بيعملوا كده ساعات بحس ان كل واحد فيهم لما بيعد مع صحابه بيعد يقول انا عاكست 10 النهارده واتحرشت ب5 صاحبه بقى يقوله وانا عاكست 15 واتحرشت ب 2 أو لما يرجع البيت مامته تقوله عاكست كام واحده النهارده يا حبيبى؟ كله من الزفت التليفزيون الى مبوظ عقول الناس الافلام والكليبات اللى عمالين يشوفوها وبعدين ينزلوا الشارع عايزين يطبقوا بقى طيب الشباب وقولنا معذورين عندهم كبت طيب والرجاله المتجوزين الى بتعاكس وبتتحرش وبغتصب كمان نقول عليهم ايه بقى طبعا انا شايفه انهم عايزين ضرب النار يعنى ايه اب مسؤول وعنده بنات يعاكس يعنى ايه لا وفى نفس الوقت بيخاف على بناته ومراته ومش بيخليهم يخرجوا. وطبعا نموذج الرجاله الشهمه اللى لما بتشوف بنت حد بيضايقها تتدخل ده خلص من زمان لانهم ماتوا كلهم فى 73 دلوقتى البنت وهى ماشيه وفى ناس بيعاكسوها وفى ناش تانيه شايفينهم محدش بيقول حاجه علشان مستنينها لما تيجى عندهم علشان يعاكسوها هما كمان , المعاكسه حق لكل راجل مصرى المفروض يضموها للحريات اللى بيكفلها الدستور
البنت مش تمثال حلو ولا شغاله وبتتحمل مسؤوليات اكتر من الولد وحقها انها تمشى فى الشارع محدش يضايقها زى ماهما عارفين يمشوا فى الشارع ومحدش بيعملهم حاجه. على فكره لما حد دلوقتى يقول للبنت انت مسترجله مبقاش معناها انها وحشه لان مبقاش فى رجاله اصلا






22 comments:

Mohamed Sakr said...

أنتي معبية جامد ، أنا مش ههأجمك بالعكس هأتفق معاكي في حاجات كتييييير اوي قولتيها ، بس ما ينفعش نعمم مش كل الشباب والرجالة اللي في مصر بقوا على الصورة اللي انتي ذكرتيها من المؤكد ان مازال في شباب ورجالة زي الفل ينضرب بيهم المثل ، بس المشكلة ان احنا ممكن نقول ان الاوحش بقيت هي النسبة الغالبة او هي الاكثر ظهوراً ، ومن وجهة نظري دة راجع لغياااااب حاجات كتيييييييير أشهرها مش ضعف الدين غيابه تماما وكمان غلبة القيم المادية على اي شيء ، كلنا حاليا بنهتم بالجوانب المادية غصبا عننا لأن الحياة بقيت عاملة زي المفرمة لو ملحقتش تدبر امورك هاتتفرم رغم ان الارزاق بيدي الله ، بس كل واحد دي الوقتي بقى في حاله الكويس من الناس بقى في حاله وهمه اكل العيش والستر ومالوش دعوة بغيره والوحش مش لاقي اللي يلمه والشهامة والجدعنة من المؤكد انها قلت بس هي لسة موجودة لكن محتاجة مكريسكوب

ربنا يعدّل الامور ويهدينا ويهدي الناس اجمعين ويرحمنا برحمته

تحياتي
محمد صقر

Ahmed said...

اتكلي علي الله و خلي نيتك في حياتك انك متظلميش حد من عيالك و انت بتربيهم

و ربنا يكرمك بالولاد و البنات و يديكي الحكمه الي تقدري تربي بيها جوزك و عيالك علي القيم الي انت بتطمحي فيها


بس انا مع محمد في ان نظرية التعميم مرفوضه

و معاكي ان فيه قيم كتير انهارت في المجتمع و كلها راجعه الي غياب الدين و انتشار العولمه اللاوعيه و ده طبعا نتيجة ان الاب مشغول و الام اصبحت لاهيه

ربنا ينفعك بكتاباتك و ينفع بيكي

و بعد كده تكتبي ع الفيس بس عشان بتعب من اللف و ان شاء الله اتابع كتاباتك

Hadeel Mesbah said...

انا مش بعمم يا احمد انا بكتب عن حاجات انا شوفتها
مش لف ولا حاجه بس انا لازم اكتب هنا الاول انت لو انضميت للجروب مش هاتلف علشان انا بكتب لينك المقالات فيه

Mariam Gaber Mohamed said...

we live in this words bgddd .. gr8 one dedooo :)) Go ahead

Laila Abd El Hady said...

Ma e7na law konna 3arfeen homa ra7o fein konna konna raga3nahom tany!! Bas still fi nesba tab3an heya la tozkar men el regala elly bgad mawgodeen Wallahy...
entalekky ba2a ya Hadee w la tatwakaffy : )

Hadeel Mesbah said...

thx mariam :))
e7na mesh handwer 3la 7ad ya laila e7na ma2lelen men nafsena awy awy. i will isa

Hala Mohamed Said Geanedy said...

Helwa awyyy ya dola, hoa fe3lan mesh ba2ab fe regala

Doaa Mahmoud said...

gameel awy ya dola
we el gamed b2a enohm msh 7aseen be el moseeba elly homa feha y3ny tla2y el wa7ed shayf nafso eno ragel maslan 3lshan msh by3akes el banat we tla2eeh by3ml mawakef tanya t2akd en elly e7'tasho mato :D

Engi El Naggar said...

Great article ya Hadeel....I was just thinking a couple of days ago en el bent el mestargela 7aga kowayessa fel zaman el mehabeb daa...wa ella el regalla 7ayaklooha walahi...totaly agree with you...keep it up

Bella Reem said...

to7faaaaaaaaaaaaaaa .. ente leki esloob motmyez fe el ketaba ya hadeel , rabena yewfa2ek isa

Hadeel Mesbah said...

thx lolo
sa7 ya do3do3 kol wa7ed fehom faker nafso 7aga we howa asln rabena elly 3alem beh
3andek 7a2 ya engi e7na lazem 7ad ya5od dor el ragel 3lshan el ragel wa5d dor 7ad tany
rabena ya5liky ya reem isa yarab

Hagar Omar said...

ba2olekkkkkkkkk el article da me3adyyyyyyyy i like sooo much. I'm proud that u r my vice.

Hadeel Mesbah said...

thx boss i luv u so muchhhhhhhhhhhhhhhhhhhh

Heba Salem said...

bgd to7fa gedaaaaaaaaaaaaan totally agree with u hadeelo

Esraa Yuosry said...

walhi el kalam da kolo sa7 gdnnnnnnnnnnnnn w rabena yesle7 7al el shabab wl banat w 2omet el nabi agma3in 3alih el salat w el salam

Basma Nasr said...

walahy ya doola m3lem kber kber :) , aslan el klam sa7 moot ,,w aktar 7aga 7oty el akl la5oky de ,,hehehehe

Hadeel Mesbah said...

tab3an betekalmy men wa7y tagrobtk el sh5sya, asila ya basma walahy bas ana lesa medyaky el m3l2aa

Basma Nasr said...

hehehehe, basha

Hadir Gaber said...

very true..lel asaf

Eman Solliman said...

‎7elwa awiiiiiiiiiiiiiiiiiiiiiiiiiiiiiiii awiiiiiiiiiiiiiiiiiiiiiiiiiiiii MSA 3leky elmwdo3 gamil w eslobek agmal :)

Atef El-Bassiony said...

أستر يا رب

Hadeel Mesbah said...

ياترى ده معناه ايه