الحظ لما يهادى ....... يخلى الاعمى ساعاتى

Tuesday, 11 May 2010

خرم القلب

"انا حبيت وانجرح قلبى" بقيت حاسه ان الكلمتين دول بقوا مرتبطين ببعض أو لهم نفس المعنى, حب وجرح حرف الواو ده بقى واجب عليهم. المشكله بقى ان فيه كابوس اتعودنا نحلم بيه بتاع الفارس الى هيخدنا على الحصان الابيض الكابوس ده بيضحك اوى يعنى ايه فارس اصلا وفيه ناس ممكن تكون مشفتش حصان ابيض قبل كده وفى ناس احلى بقى ممكن تفتكره كائنات خياليه من الى بتيجى فى التليفزيون بس. الكابوس ده كان يبقى حلم ايام زمان لكن دلوقتى بقى كابوس عارفين ليه لان الفارس ده لو جه هانكتشف بعد كده انه مش فارس وياريتنا ماقبلناه ولو طلع فارس مش هيقدر يركب حصان بكتيره اوى يجى راكب ميكروباص ابيض وكمان سالف الاجره من مامته ومش هايقدر يخدنا علشان اجره الميكروباص كانت اخر فلوس معاه. بس دايما فيه امل ان حلمنا ميقلبش كابوس.


اقول ايه ان مفيش واحده فينا حبيت الا وانجرح قلبها (ممكن تحب تانى بس لازم تنجرح فى الاول دى مرحله اساسيه فى حياه اى بنت مصريه) ولا اقول ان مفيش واحده فينا حلمت الا وصحيت لاقت الحلم بقى كابوس ولا اقول ان احلى ذكريتنا بنخاف نفتكرها علشان منزعلش من نفسنا وعلى نفسنا ولا اقول ان الواحده بتخرج من الحكايه كارهه المجتمع وكارهه الناس والاصعب انها بتكون كارهه نفسها لانها هى الى عملت فى نفسها كده ولا اقول بقى على احساس الفضا الى بنحسه جوانا بنبقى عاملين زى الازازه المخرومه من الناحيتين مفيهاش غير هوا عمال يصفر جواها ولا اقول بقى على السعاده الى بنحس انها بعيد اوى وفى حكايات اخرى فى بنات مش بيفتكروها اصلا ويعدوا بقى يحاولوا يفتكروا سعاده كانت معناها ايه دى. البنت أى بنت نفسها تحب وتتحب الاحساس ده ان فيه حد فى حياتك بيحس بيكى وبيخاف عليكى, ان فيه حد تسندى عليه بيبقى عندك استعداد تعملى اى حاجه علشان تسعديه, وبتبقى مبسوطه وطايره على طول متعرفيش ليه, بتقول لنفسها انا مش فى الدنيا لوحدى, بس دايما الالم بيجى على اد السعاده.

لو بصينا على النص التانى فى الحكايه الولاد يعنى بصوا انا مش عايزه اقول كلهم علشان نبقى حقانين هاقول 99.9 منهم بس, تقريبا منزلهمش نظام الاحساس لان الاحساس ده نعمه ربنا مبيديهاش لاى حد. هما الصراحه ساعات بيزعلوا برده بس بيخفوا على طول اموت واعرف الدوا الى بيخدوه علشان ينسوا وتخيلوا دول بيناموا بليل عادى, فى وقت بيكون اقرب صديق للبنت المخده علشان بتعيط عليها كل يوم قبل ماتنام ده لو نامت اصلا وكيس المخده الى بيتغير كل يوم من الحنافيه السايبه على طول.

تعالوا بقى نجيب الحكايه من اولها علشان نعرف ازاى ان مفيش حاجه ثابته على حالها, لما الولد بتعجبه بنت وطبعا هما ليهم مقاييس عجيبه فى الجمال, مش هانتكلم عليها دلوقتى بيحاول يعرفها بكل الطرق حتى لو وصلت انه يشتغل بواب عمارتهم وعلشان احنا جامدين اوى بقى (طبعا فى الاول بس) مش بنديله الفرصه دى ونعد نقفلها فى وشه (ده طبعا حسب المدرسه الى انت تبعها هو فيه انواع كتير هاقولكم اشهرها( 1- مدرسه لو عايزنى كلم بابا, 2- مدرسه عصفور فى اليد, 3- مدرسه الولاد زى اليويو اخبطهم فى الحيطه يرجعولك تانى) البنت مننا زكيه ماشاء عليها (ده طبعا فى الاول بس) بتاخد بالها ان فى حد كده يعنى طبعا هى بتكمل طناش لغايه متبقى فى حاجه صريحه وكل الناس تقولها أكيد فى حاجه وانت تقوليلهم عادى يا جماعه والولد بقى بيحاول يجر كلام وفى غفله من القدر بياخد رقم تليفونها ويكلمها طبعا هى بقى اول مره مبتردش (عايزه افكركوا اه كل حاجه بتعملها حسب المدرسه) يكلمها تانى بتعد لغايه 20 قبل ماترد (ده برده فى الاول بعد كده بترد من أول نص رنه مش علشان هى سريعه علشان بتبقى معلقه التليفون فى رقبتها مستنياه لما يتصل), وبعدين بقى بتيجى لحظه الحسم خلاص بقى الولد عمال يفكر فيها ليل مع نهار وهى برده بتبقى بتفكر فيه اصل البنات عندهم رادار انثوى يعنى لما بيبقى فى ولد معجب بيها هى بتبقى حاسه ان فى حاجه بس لسه مبنش نوع الحاجه ايه.


الولد بقى بيجى يقول للبنت بتاعتنا انا عايز اتكلم معاكى طبعا بقى بطير جوه نفسها من الفرحه بس بره نفسها بتعمل نفسها مش موجوده (هو ده الى احنا فالحين فيه بنتقل فى الاول بس وان شاء الله الصين هاتعملنا النوذج الى بيتقل فى الاول وفى الاخر) بيقولها بقى ان هو معجب بيها وياريت يدوا لبعض فرصه ويعرفوا بعض اكتر (الكلام الى كلنا سمعناه فى يوم ما الشمس مطلعتش فيه) طبعا فى بنات تانيه بيكون عايز يقولها انه معجب بصاحبتها وانه كان بيكلمها كتير ومركز معاها بس علشان كده او عايز يسألها عن المكان الى خرجت فيه مع صحابها وشاف صوره على الفيس بوك وساعات بتوصل انه بيكون عايزها تحرك عربيتها علشان اقفله عليه وبقاله فتره بيعاملها كويس علشان تعرف سايس الجراج فبيلاقى مكان يركن فيه.


البنت بقى الى الولد قالها انه معجب بيها يبدأوا يعرفوا بعض, الفتره الى فى الاول دى بتكون الفتره الذهبيه فى اى علاقه واحلى فتره اللى الواحد بيبقى مش عارف هو ده جد ولا تهيأت بيبقوا الاتنين بيستهبلوا وهما عارفين انهم بيستهبلوا وكل واحد فيهم بيبقى عارف ان التانى عارف ان هو عارف انهم مش عادى, وكمان الفتره الى بعد لحظه الحسم الى الولد بيكون فيها عامل زى ما بيقول الكتاب بيكلمها 20 مره فى اليوم ويبعتلها (i miss u msgs) مع انه بيكون لسه مكلمها من ربع ساعه وورد بقى وسربريزز عمال على بطال فى عيد ميلادها وفى الفالنتين وفى (anniversary) ايام جميله والله, البنت بقى بتبدا تصحيه كل يوم الصبح وده بيكون اول مشوار التنازلات طيب ميصحيها هو ماحنا برده ورانا حاجات نعملها الصبح او الاحلى بقى يشتريله منبه, البنت كمان بتعد تذاكرله لو هما لسه فى الجامعه ولو بيشتغلوا نفس الحاجه بتبدا تعمله حاجات فى الشغل سواء طلب او مطلبش بتحب تساعد يعنى. دى المرحله الاولى.


المرحله التانيه بقى بيبقوا خلاص عرفوا بعض كويس وحبوا بعض (ممكن يكونوا لسه متصاحبين اواتخطبوا) وهى لسه بتصحيه على فكره, فى بدايه المرحله دى عدد المكامات اد بعض وبعدين بيبقى فى عد تنازلى الولد بيقل والبنت بتزيد والسربريزز البنت الى بقت بتعملها والورد البنت هى الى بقت بتبعته ساعات بتوصل انها تديله عربيتها علشان عربيته فى التوكيل وتركب هى مواصلات عادى مش اشكال يعنى. كل ماتكلمه بقى وتقوله احنا مش بنتكلم زى زمان يقولها معلش اصلى مخنوق وعندى حوارات فى الشغل والبيت ومتخانق مع بابا ومش طايق نفسى (ومش طايقك انت كمان مش ناقص زن) البنت تستحمل وتعد تسمعه وتحاول تحل المشاكل, لو مخطوبين والمشكله فى الفلوس علشان بيجهزوا ممكن بتتنازل عن حاجات (بس الولد بيفضل شايف انها طالبه حاجات كتير).


المرحله الاخيره المشاكل بتكون كترت اوى بينهم ولو مخطوبين بتبقى بين كل واحد واهل التانى, بيكون بين كل خناقه وخناقه خناقه هما لسه بيحبوا بعض على فكره بس فيه حاجات كتير دخلت فى الموضوع, لو هما متصاحبين ممكن كتر المشاكل يخليهم يفركشوا أو بيبقى جه الوقت اللى لازم لازم ينتقلوا الى مرحله مابعد الصحوبيه وساعات مبينفعش علشان الولد لسه فى الكليه (مش لاقى يأكل يعنى) واهلها موافقوش أو اكتشفوا انهم بيحبوا بعض اه لكن مش قادرين يكملوا مع بعض لانهم مش زى بعض صدق الى قال أن الحب اعمى الولد بيكون مش لاقى شغل وبعدين يقول لصاحبته أنا حرام اربطك معايا (اصيل يا أبو احمد والله تقريبا مكنش واخد باله من الاول) بعد مبألهم 3 سنين متصاحبين أو الولد بيكون عايز يتقدم للبنت لكن باباه بيقوله دى بنت كويسه بس مش دى الى تبهدلها معاك انت لسه معملتش حاجه فالولد بيسبها عادى جدا أو بيقولها أنت مؤدبه ومحترمه بس أنت عارفه ظروفى (طبعا هى مش عارفه حاجه وبعد مايرميها فى البحر يقولها أنا مبعرفش أعوم) وبيسبها وممكن بعد فتره تسمع أنه خطب عادى جدا (بركه برضه ان الظروف اتحلت). لو مخطوبين بقى بيسيبوا بعض علشان بعد ماخلاص جهزوا وقربوا يتجوزوا علشان هو مقدرش يحبها أو أنه مش عارف يجيب شقه فالحل برده أنه يسيبها (على اساس أنها سبب من اسباب الزياده السكانيه) أو فيه مشاكل بين العائلتين فبيسيبوا بعض أو بيطلع ابن أمه. الاسباب كتيره اوى.


أنا مش بقول أن أى علاقه بتفشل دايما علشان الولاد بس الحقيقه ان ده بيحصل فى أغلب الاحيان. دايما كان صحابى يقولولى أن الولاد مبقوش بيتحملوا مسؤليه وأنهم مش عايزين يحبوا تانى وأن مفيش حاجه أسمها حب وأنا كنت أقولهم ليه مفيش حاجه أسمها كده بس فعلا الى بره الموضوع غير اللى جواه. البنت بيبقى عندها حق تقول كده بتكون بدأت مشوار الاكتئاب بتبقى مش مصدقه نفسها أنها اتعمل فيها كده وأن اللى عمل فيها كده هو أكتر واحد حبته فى الدنيا واللى كان المفروض يبقى أمانها, بيبقى عندها شعور عجيب عايزه تنساه ومش عارفه لانه أكتر حاجه حبتها فى حياتها فعايزه تفضل فاكراه فبيبقى الحل أنها نفسها تفقد الذاكره أو تعيش فى عالم تانى, الذكريات اللى كل ماتفتكرها تعيط وتقول لنفسها أنا مش مصدقه أن ده حصلى أصل الانسان ده عامل زى الدولاب بيبقى فيه حاجات كتير منهم حاجات ناسيها وبيفتكرها ضاعت لكن فى مره كده بيلاقيها مع أنه أفتكر نفسه خلاص نسيها. الاوحش ببقى أن البنت بعد كده مش بيبقى عندها أستعداد تبدأ حاجه جديده مع أى حد لانها معندهاش ثقه فى حد أو أن ده هيبقى أحسن من اللى قبله لانها أديت كل حاجه ومخدتش حاجه. بتحس كده أن قلبها أتخرم ومفيش حاجه هتسد الخرم ده.
كل حاجه بتاخد وقتها هو مش زرار ندوس عليه فننسى بس لازم نبقى واخدين بالنا يحسن العمر يعدى وأحنا ندمانين على اللى راح ودايما باصين ورانا ونقول لو كنا كملنا لاننا مكنش لينا نصيب فيه ويمكن لو كنا كملنا مع اللى حبيناهم زمان وسابونا كنا ندمنا وقولنا ياريتنا ماكملنا, واللى سابونا عاشوا حياتهم واتبسطوا فيها وأحنا فضلنا طول عمرنا زعلانين على راح وشايفين أنه كان أحسن حاجه فى حياتنا. مش سهل نعمله بس نفسنا تستاهل أننا نحاول وناس كتير بتحمد ربنا بعد كده لان بتقابل اللى يستاهلها بجد (وتعد تقول دأنا كنت هأقع فى حته مطب) ومنسيبش الالم بتاع فصل واحد فى حياتنا يدمر اللى جاى كله.


















30 comments:

Fadwa Ghoraba said...

احساس الفضا الى بنحسه جوانا بنبقى عاملين زى الازازه المخرومه من الناحيتين مفيهاش غير هوا عمال يصفر جواها
very true wa bywsef el a7sas bzbt
بتحس كده أن قلبها أتخرم ومفيش حاجه هتسد الخرم ده
a7sas w7esh awy f3lan..a7sas bel daya3 wa el waga3 wa el tawhan all at the same time..you lose trust and interest in everything around you..maybe cause you gave all you could give and were so true giving it
bas ana 3andy a3trad so3'ayr 3la el percetnage bta3t el wlad...msh 99.9% ...fe wlad kwiseen Wallahy bas lel2saf a7na aly bnkhtar 3'alat..a7na ely bnw23 nafsna fe el w7shen 3shan they r always more attractive :s
Anyways..I wish I could tell every guy to think hard before making any move on any gurl coz 7aram wallahy to make her suffer like that...wa fe youm mn el ayam htetrdlk..3shan rabena mbysme7sh fe mzalem el 3bad

Great Job ya Hadeel...keep it up..waiting for the next one ASAP ;)

Hadeel Mesbah said...

sa7 ya fadwa e7na elly ben5tar 3'alt bas ana la2et en mo3zam el banat e5tart 3'alt howa ta2reban mafesh sa7

Fadwa Ghoraba said...

hehehe shaklo keda
f3lan zay mbt2oly mfeesh walad now 3ayz yt7ml ay mas2olya...wa el banat kaman ya Dola mb2osh 3ayzen yd7o wala yego 3ala nafshom...el mwdo3 b2a w7esh awy on both sides..Rabena ystorha 3alina b2a fe el ayama el gaya de..Dah a7na dakhlen 3la ayam soaaaa :D

Laila Abd El Hady said...

The 1st one made me laugh & laugh bas da u know tab3an akid mesh beyda7ak, it's totally the truth bas now everything changes wiz me w im not going 2 b again o1 of those girls who looks 2 her past, it's over caz it's over for him, so why sho...uld i care if he passed away & he has chosen a new life wizout me 7atta law da makanash 100% his choice. Now I dont care & 4 me el 7amdolelah mafish ay khorm men ay no3 : )

It's 2 hard when it's related 2 our hearts, 2 our memories, but it's not that difficult 2 rebuild a new city wiz new people, caz the old city was not b able 2 take care of us.

This time u must choose right, choose the right city 2 build ur new home there & dont regret about the old 1 it doesnt deserve...

Hadeeeeeeeeeeeeeee I like it ; ) See more

Hadeel Mesbah said...

sa7 ya laila wana kaman it's over for me zay manty 3rfa we ha5tar sa7 isa we mafesh memories wala ay 7aga i've formated ma mind :D

Basma Nasr said...

Doooola,,B3edan 3n enk D7kteent D7k El Sneen :))))), bs wAlahy AMAZING ........BS A B2A tfawakty 3la nfsek el mara de :)))

Hadeel Mesbah said...

kwyes enk de7kty ya basma fe nas keter eftakro mashkelhom we ana menhom ba 5alas we should move on ba2a, basma enty men el nas elly bahtam bera2eyhom i really lvu u

Basma Nasr said...

luv u 2 walahy ya doola :) , w really u r sadeka sadooka,Mwaaaaaaaaaaaaaaaaaaaaaaaaaaaaah

Doaa Abd El-Hady said...

a5er paragraph 3alamyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyy
chapeaue bggggggggggggggggd

Hadeel Mesbah said...

merci ya dodo :)))

Yomna Mohamed said...

sa7 100%

Hadeel Mesbah said...

thxxxxxxxxxxxxxxxxxxxxxxxxx yomna

Elham Hussain said...

فعلا أي علاقة متمشيش رسمي
البنت هيا اللي بتتطلع منها متضررة اوي وبتنجرح جامد اوي
جرح غائر :(
بس هيا اللي بتجيبه لنفسها أولا وأخيرا يبقي تستحمل

بس ربنا برضه مش بيسيب حق حد
واللي حصلها من ظلم هيتردله في يوم من الايام

Yomna Mohamed said...

I agree with u Elham fe3lb da el bey7sl

Moutasem Mohamed said...

هديل
مع احترامي الشديد لاسلوبك و موضوعيتك و واقعيتك

أنا مش بقول أن أى علاقه بتفشل دايما علشان الولاد بس الحقيقه ان ده بيحصل فى أغلب الاحيان. دايما كان صحابى يقولولى أن الولاد مبقوش بيتحملوا مسؤليه وأنهم مش عايزين يحبوا تانى وأن مفيش حاجه أسمها حب

يبقى عندها شعور عجيب عايزه تنساه ومش عارفه لانه أكتر حاجه حبتها فى حياتها فعايزه تفضل فاكراه فبيبقى الحل أنها نفسها تفقد الذاكره أو تعيش فى عالم تانى, الذكريات اللى كل ماتفتكرها تعيط وتقول لنفسها أنا مش مصدقه أن ده حصلى أصل

وليه حضرتك مفكرتيش بطريقه عكسيه
يعني اي جواز بيبوظ قبل الفرح بكام يوم
طبعا كل شيء بقدر ربنا

انما ربنا خلقلنا عقول نفكر بيها

يعني ايه بعد ما الموضوع يبوظ
وهو كان طالع عين الي جابوه عشان متطلبات الزواج
هي تشوفه سالبي
ازي

ومين قال ان الموضوع مش صعب علي الولد زي البنت مين قال
هو سهل ان واحد واخد السكه الحلال
وفي ثانيه تطلبي منه يسيب الانسانه ده

sorry i dont think so

الموضوع ولا هو سهل علي البنات ولا الشباب
الشاب الي بياخد الطريق و السكه الصح من الاول
اكيد اكيد انسان عنده احساس

و مش ذنبه ولا مشكلته انه لازم يتحمل طلبات اهلها السخيفه
لما يبقي مش انسان و مش بيحس و مش بيقدر يتحمل مسؤليه
ودركولا و مصاص دماء و وحش و انسان مادي و طاغيه .... الخ

Hadeel Mesbah said...

معتصم انا عارفه انك بتتكلم من واقع تجربه شخصيه وانت عندك حق فى كلمه قولتها
بس انا كمان عندى حق لانى بتكلم من واقع تجارب شخصيه مش تجربه واحده انا اتكلمت عن اللى شوفته من عدد لو قولتهولك ممكن متصدقهوش
وعلى فكره انا معاك فى ان الموضوع بيبقى مش سهل على الاتنين
وان لا كل البنات ملايكه ولا كل الولاد شياطين
على فكره انا بحترم رأيك جدا ويارب اختلافنا ده لا يفسد بالود قضيه زى مابيقولوا

Moutasem Mohamed said...

اكيد يا فندم

اكرمك الله

كان ليا جار اكبر من كان بيقول
الجواز تكامل مش تفاضل
بدون الدخول في تفاصيل رياضيه

انما حتي لو بتكلم عن تجربه شخصيه
انا حولت اعمل حاله احصائية بمعني

عينه نقول كام شاب فشكل قبل الفرح بكام يوم
وحولت ادرس يا تري مكنش فيه تفاهم؟
يا تري في فروق ماديه او اجتماعيه ؟
يا تري و يا تري و يا تري اسئله كتير اوي


في شهر كان عندي كذه فرح وللاسف حالات الفشل كانت اكتر من الزواج

طبعا و اكيد في قدر ربنا

لكن لا داعي ان كل بنت محصلش نصيب تشوف حبيبها سالبي
هو يا اما يطاوع اهلها و يحقق طلباتهم في ظل المناخ الاقتصادي المنعش
يا اما حضرتك تشوفيه سالبي و و معرفش يحل المشكله

هي ديه القضيه و هو ده السؤال

Hadeel Mesbah said...

ماهو انت مسألتنيش انا ليه بقول عليه سلبى مش علشان لازم يطاوع اهلها (برده بتتكلم عن نفسك) غالبيه الناس اللى انا بتكلم عنهم اهل البنت كانوا مش ضاغطين عليه وكان المهم عندهم انهم ياخدوا راجل لكن الولاد هما اللى كانوا مش عايزين او مش عارفين يشيلوا مسؤليه انا بكتب بدون اى تحيز لو لاقيت اى حاله البنت هى اللى كانت مفتريه هكتب عنها

Amany Mohamed said...

Ana belnesbah ly mba2ash 3andy 2amal fy 2ay 7agah ahuh bs el wa7ed 3ayesh 3ala 2amal in rebena ye3awadih fy el2a5rah 3an kol 2a7lamoh elly da3et fy el donia

Hadeel Mesbah said...

maynfa3esh ya amany te3shy keda aked elly gana wel a5ra a7sen isa we rabena yg3lna men ahl elgana bas dah mesh m3nah enk te3shy mayta fel donia law a7lamek da3t yb2a makntesh nasebk we maknesh leky el5er feha we yama 7agat ra7t menena we kona fakren enha law da3t mesh han2der n3esh we 3eshna we nesyna e7mdy rabena eno nagky men elly konty 3yzah mesh konty hatkony ta3esa we 3eshy eldonia be2ml we tfa2ol en elly gay a7la isa
rabena ys3dek

Amany Mohamed said...

Thanks Hdeel for your nice and cheerful words

Nesma Hamza said...

بجد كلامك حلو اووى يا هديل و كأنه مرايه بتعكس اللى جوه معظم البنات و اللى نفسهم يقولوه ..أنا معاكى فى كل كلامك بس تفتكرى ايه الحل ,,أن البنات تبطل تحب مثلا عشان متتجرحش
لو بنتكلم على مجتمع جامعى مثلا عشان ده اكتر وقت المشاكل اللى من نوع ده بتظهر فيه و اكتر مكان فيه كلمة "الصحوبية" منتشرة اوى
لو بجد فكرنا بعقلنا شويه بنت و ولد سنهم 18 او 19 سنه بيحبوا بعض و لو فرضنا او الولد محترم و مش بيلعب بالبنت و أن البنت كويسة و الحياه فى اللذيذ ,,بأى منطق الاتنين دول ممكن يرتبطوا ؟؟؟أولا فى الفتره دى بيبقى لسه عقل الاتنبن لسه منضجش و اختياراتهم و ارائهم غالبا بتتغير فى اليوم ميت مره ..ثانيا هيقعدوا كام سنه غقبال ما الولد ربنا يكرموا و يعرف يكوّن نفسه عشان يتقدملها و يقدر يفتح بيت 6 او 7 سنين كمان ,,لا هى هتستحمل ولا هو هيستحمل كمان ..كل ما العلاقه بتطول بدون جواز المشاكل بتكتر اوى و غالبا بتفشل حتى و لو مخطوبين
أنا طبعا بتكلم على الموضوع بعقل اوى كده عشان انا بره لكن طبعا اللى بيبقى جوه الموضوع مش بيفكر بعقله أبدا و بيفضل ماشى ورا قلبه و أحلامه الورديه أن بابى و مامى هيساعدونا و أن ربنا هيقف جبنا عشان عارف ان احنا بنحب بعض بجد و أن احنا هنبتديها واحده واحده و نبنيها طوبه فضه و طوبه دهب ,,و غالبا طبعا اللى بتبقى عايشه فى الاوهام ديه هى البنت

أنا رأيى أن البنت مهما عملت و سيطرت على مشاعرها هى جواها طاقه حب تكفى العالم كله لو مطلعتش الطاقه دى بتتعب اوى و تلاقيها زى الورده الدبلانه ..لازم الطاقه دى تتطلع مش فى "الحب الضال" ده لكن تطلعها فى حاجات تايه حاجات هى شايفه انها ممكن تدى فيها ,,عمل خيرى أو عمل تطوعى مثلا اى حاجه تشغل بيها وقتها ..أكيد هتحس برده أنه لسه فيه جزء فيها بيدوّر على البنىءادم اللى يبقى أمانها بس الرغبه دى مش هتبقى ملحه اوى زى الاول لان فيه حاجات تانيه فى حياتها بتسعدها و فعلا هتحس أنها مبسوطة اوى أنها بتعمل حاجه مفيدة او بتساعد حد ... و الله يا جماعة لذة أنك تساعد و تسعد حد محتاج لمساعدتك ديه ملهاش زى
تانى حاجه فى رأيى البنت لازم تبصلها هما صحابها يعنى لو البنت فى جروب كلهم "مأنتمين" و الحوارات دى لازم غصب عنها هحس أنها غريبه و لوحدها ..دوّرى دايما على اللى يشجعك على الصح و يعمله معاكى ...أكيد لو كل البنات اللى حواليكى مش بيصاحبوا هتلاقى نفسك زيهم غصب عنك و لو فكرتى فى حاجه تانيه هتتكسفى من نفسك قدامهم لو متكسفتيش من ربنا ...و ده كله لغابت لما ربنا يرزقك بابن الحلال ما أنتى مش هتخللى برده ان شاء الله

و اخر حاجه خدى الجمله دى و علقيها على ضهرك " الارتباط عندى يا دبله فى اليمين يا دبله فى الشمال غير كده اسمه استهبااااااااااااااال"
:D

Hadeel Mesbah said...

عارفه كلامك صح كل الناس عايزه تحب طبيعى لكن اللى حكايته بتفشل بيبقى فى حاله مايعلم بيها الا ربنا وفى ناس بتضيع علشان الموضوع ده لانها بتكون عايزه تحب وخلاص مش مهم هى بتعمل ايه حلال ولا حرام وفى ناس تانيه بتقفل على نفسها لانها اتصدمت مره وفى ناس بتحول صدمتها دى لقصه نجاح يعنى علشان متزعلش بتشغل وقتها سواء زى مانت قولتى حاجه خيريه او اى هوايه بيحبوها
المهم بس الواحد يقرر هو عايز ينسى ويعيش حياته احسن من اللى كان وبيبقى عنده ثقه فى الله ان اللى جاى احسن وانت قدامك واحده منهم على فكره
ولا يمشى فى الطريق اللى يروح فيه مبيرجعش

Amany Mohamed said...

والله برضه مهما شغلت نفسها و كانت مبسوطه سواء بعملها أو بالعمل الخيري اللي بتعمله بيجي عليها وقت بتبقى لوحدها وساعتها بقى بتلاقى نفسها بتنسى كل النجاح اللي هي محققاه و بتفكر في موضوع واحد انا ليه كده

ما أنتى مش هتخللى برده ان شاء الله" "

:) لأ صدقيني فيه ناس كتير مش حاقول خللت بس فعلا اصبحت خارج مربع العمر الذهبي
وده اللي بيخليها مش بس تيأس ديه لو ضعيفه شويه ممكن تنهار

و في الأخر كل اللي ممكن يتقال في الموضوع ده أن ربنا ما بيجيبش حاجه وحشه لحد إحنا بس مش بنبقى فاهمين الحكمه من اللي بحصل لنا

Hadeel Mesbah said...

طيب مانت قولتى ربنا مش بيجيب حاجه وحشه بس احنا اللى مش فاهمين مش يمكن الناس دى ملهاش الخير فى الجواز اكيد ربنا ليه حكمه فى كده وطالما احنا مفيش فى ايدينا حاجه نعملها فى الموضوع ده يبقى نكيف نفسنا على الحياه دى ونحمد ربنا ونرضى وربنا هيرضينا ان شاء الله

Medhat Hamdy Sheta said...

وضوع جميل و كلام معظم المشاركين و اغلبهم من البنات الا انى حبيت اضم صوتى للاخ معتصم متفقا معاه ان الشباب برضه بيتالم مثل البنات و لكن من هذا الشاب ؟
هو الذى يتحمل المسئولية و لا يعرف الا باب البيت عشان يرتبط بالبنت اللى المفروض حاتكون مؤتمنة على شرفه و ماله و ابنائه فموضوع الاختيار ليس بهين ان يختار الشاب زوجة المستقبل و عندما يجدها كانه وجد كنزا لا يعوض فما بالكم اذا فقد هذا الكنز ماذا يكون شعورنا ؟و خصوصا نحن اصبحنا فى زمن الاختيار فيه اصعب ما يكون خصوصا عندما نكون فى مدينة مثل القاهرة و محدودين العلاقات و دائما ما اتذكر صديق لى تزوج بعد بحث عما تصلح له زوجة مدة 3 سنوات تخيلوا الامر ليس بسهل اطلاقا على الشباب ان يفشل فى ارتباط بل يترك اثارا مؤلمة لمن يدرك قيمة و قدسية العلاقة الزوجية

و للاسف وسط الكثرة من السىء سواء كان شباب او بنات يدفع الثمن المحترمين و المحترمات مما يبغون العفاف بالحلال فقط ولا طريق لهم سواه فهناك كثيرا من الشباب و البنات يتعذبون من الوحدة او الفراغ العاطفى و لكن تاتى المعوقات المادية التى كثيرا ما يفرضها الاهل وكانهم يعتقدونها امورا عادية جدا خصوصا عند مقارنتهم ببنت فلان و علان اللى جالها و جالها
و بصراحة وجود كثيرات من المحترمات من البنات لا يرتضين امكانيات الشاب المحدودة بعد ان اكلت الفضائيات عقلهن عندما ترى البنت منهن مدى الرفاهية و مدن الاسكان الفاخر التى تعرضها الاعلانات و كم السيارات الفارهة التى لو قعد معظم الشباب عمرهم لتحصيل ذلك ما امكنهم

المشكلة اصبحت فى قلة امكانيات الشباب نظرا للظروف الاقتصادية السيئة للبلد و عدم رضا البنت و اهلها بامكانيات الشاب و نسيان البنات لمفهوم التعب و الكفاح و استبدالها بالعريس الجاهز و الرفاهية و كذلك سوء الاختيار من الطرفين فقط يبحثون عن الحب فقط متناسين انها حياة كاملة يعيشوها سويا و عدم وجود الصراحة الكاملة من الطرفين حتى يقيم كل طرف الاخر و يدرك هل هو مناسب او لا
كذلك كثرة الكلمات المطاطة مثل ان يكون الشاب صريحا فى البداية بانه امامه مشوار كفاح طويل و تجد البنت توافق و ترحب بذلك و بعد الارتباط يجد الشاب مطالب باشياء كثيرة تفوق قدرته و طاقته و تجده مطالب بتوفير شقة تمليك فى مناطق راقية مش باقولكم كلمة الكفاح بقت ضمن الكلمات المطاطة فى حياتنا و طبعا من كتر الطلبات و الضغط يجد الشاب نفسه عاجز عن الوفاء بالالتزامات و ما اصعبه شعور على اى شاب فيضطر للانسحاب و فشكلة الموضوع

Hadeel Mesbah said...

والله يا مدحت عندك حق برضه فى بنات فعلا بتفكر كده وبتظلم الولاد معاها وفى بنات تانيه كانت راضيه باى حاجه طالما مع الانسان اللى اختارته وكانت هتستناه وهتشجعه وتقف جنبه وتسانده وكانت هتضحى باى حاجه تانيه علشانه وعلشان ربنا يجمعهم بس فوجئت بالخيانه وعدم المسؤليه وانه بيسبها قدام اصغر مشكله بتقابلهم حتى لو كانوا خلاص محددين ميعاد الفرح
الدنيا فيها وفيها

Medhat Hamdy Sheta said...

للاسف احيانا كثيرة لا يقابل الانسان منا الشخص المناسب له الا بعد فوات الاوان لقدر مكتوب على الجميع
وللاسف عندما تصبح الماديات هو المحور الاساسى و معيار التقييم فى الزواج يفقد الزواج كثيرا من قدسيته و بركته و عندما يغالى الاهالى فى مطالبهم بصورة غير مقبولة يمثل ضغطا على اى شاب غير مقبول بالصورة التى تجعله ينفجر على اتفه سبب و يفركش الزواج غير عابىء باى شىء سوى ان يتخلص من الضغط النفسى الذى وضعه اهل البنت فيه و الذى ينعكس بالضرورة على علاقته بها اما اثناء الخطوبة او بعد الزواج

و لو اخدنا الموضوع بصورة وردية و نية سليمة لسيناريو شاب يتقدم لبنت عارضا كل امكانياته و يحاول الطرفين التغاضى عن كل مظاهر فارغة او فشخرة كدابة و يحاولون التوفير على العريس فى النفقات كى يدخر ما يستطيعه من مال معه لمسئوليات ما بعد الزواج بدلا من الزواج و هو محمل و مثقل بالديون او حلب العريس لاخر قرش معه و استنزافه بكل الطرق و كانها بيعة و شروة فبالله عليكم كيف يشعر من يعانى ابتزاز الاهالى له و مسئوليات الحياة بالحب لشريك حياته بعد كل المعاناة التى يعانيها مع اهلها فالامر فى مجمله بسيط لكن تفكير الناس اصبح اصعب من معادلة القنبلة الذرية

Nesma Hamza said...

ما أنا قولت يا أمانى أن مهما البنت عملت عشان تشغل وقتها بيفضل جزء منها بيدوّر على البنىءادم اللى يشاركها حياتها ,,ده طبيعى و الا متبقاش بنت ..بس الفكره أن الموضوع ده مش بيبقى ملح اووى زى الاول أو نقدر نقول أن مش ده بس اللى بيبقى شاغل بالها ..يعنى بنىءادم شاغل باله 3 او 4 مواضيع زى واحد تانى مفيش فى دماغه غير موضوع واحد ..أكييييد لاء
و عمليه الجواز و الخطوبه ده نصيب و رزق و زى ما قالت هديل جايز ميكونش فيه خير ..الحياه اختيارات فعلا فيه بنىءادم بيختار يملا حياته بحاجات تفيده و تفيد غيره يحس هو بقيمتها و تحسسه هى بالسعاده ,,و فيه بنىءادم يقعد مستنى مالى حياته بموضوع واحد و فاكر انه كده هيجيله ......نصيبيك هيجيلك هيجيلك استنيتيه او مستنتهوش بس فى رأيى دايما الانتظار قاتل

70ss78 said...

كلام رائع جدا و بيوصف فعلا علاقتى بخطيبتى السابقة اللى عشت معاها أحلى 3 سنين رغم كل المشاكل اللى كانت فيهم و للأسف تسببت أنا بحمقة فاضية فى نهاية علاقتى بيها عشان كرامتى أكلتنى بس صدقينى الرجالة برده بيندموا و بيجيلهم إحساس كبير بالندم و العلاقة دى اتسببت فى فوبيا عندى اضطرتنى لتقديم تنازلات كنت بعتبرها ضد رجولتى بس اللى بيتلسع من الشوربة بقى :) المهم اتجوزت من 3 سنين و مش هاكدب عليكى أنا مازلت ندمان على خطيبتى الأولى و لسة بتجيلى فى الأحلام و ساعات بحس إنى ظالم مراتى معايا و ده بيدفعنى لمحاولات تعويضها فى اتجاهات تانية بس برده مازلت غير مستقر و الحمد لله و مقالتك دى رجعتنى 6 سنين لورا ربنا يسامحك :)