الحظ لما يهادى ....... يخلى الاعمى ساعاتى

Friday 21 October 2011

الدنيا زي المرجيحة

انا بحب اقرأ اي حاجة بتتكلم عن السعادة، ازاي الواحد يبقى سعيد، بحب اشوف تجارب الناس التانية السعيدة علشان اتعلم منها، بس الصراحة بتعلم في ساعتها وبعد كدة بنسى وارجع ادور على حاجات تانية بتتكلم عن السعادة برضه وازاي تبقى سعيد

كنت فاكرة ان انا بس اللي لما بتلمح كلمة السعادة في عنوان كتاب او مقالة بتقول لنفسها هو دة اللي هيحل كل مشاكلي، اللي بتقعد تتفرج على فيديوهات عيش يومك وانسى اللي فات، اللي بتعمل شير لصور الدنيا مراحل عيشها ومتستعجلش وبتكتب حكم عن السعادة على الفيس بوك ويجلها عليها ميت لايك، اللي بتقعد تتكلم مع صحابها بالساعات في هو ليه الواحد مش مبسوط، ومع ذلك بتتخنق من صحابها المكتئبين على طول، اللي دايما بيعملولها تاج في صور لو هاموت بكره تحب تقولي ايه النهادرة، اللي شايفة ان اسعد لحظات حياتها كانت زمان مع انها لو رجعت بالزمن للوقت ده هتلاقي انها ساعتها كانت شايفة ان اسعد لحظات حياتها حاجة تانية خالص، اللي كل ما تظبط نفسها زعلانة ولا مكتئبة جملة الوقت اللي بيمر وانت زعلان فيه مبيرجعش تاني تقعد ترن في دماغها

بس طلع ان مش انا لوحدي اللي كده، الناس من كتر ماهي مفتقده الفرحة في حياتها بقيت ماتفهمش الفرحة هي اللي نسيتهم ولا هما اللي نسيوا الفرحة، كل واحد فيهم مستني فرحته اللي بجد، فرحة من جوه قلبه، الفرحة اللي هتنسيه كل حاجة ضايقته في حياته، وفي ناس من كتر مانفسها تفرح ومن كتر ماستنت بقى اي حاجة بسيطة ممكن تفرحها ان شاء الله باكو شوكولاته لانها زهقت من حالة الحزن اللي عايشه فيه على طول، وناس تانية بتفضل مستنيه الفرحة الكبيرة اللي مش عارفين هتيجي امتى

ساعات كتير الواحد بيحس كده من غير مايكون في حاجة فعلا مزعلاه بس حاسس انه نفسه يفرح، وساعات تانية بيبقى زعلان على حاجات او ناس، رغم انه عارف ومتأكد ومؤمن ان زعله ده رفاهية لناس تانية، ورغم انه عارف انه احسن من ناس كتير جدا وزي ما شايف برضه ناس تانية كتير جدا احسن منه، بيحمد ربنا وراضي بقضائه بس زعلان، مش بيفتكر ساعتها ولا كلمة من اي كتاب قراه عن السعادة، ولا لقطة من الفيديوهات بتاعة العمر بيجري الحق عيشه واتبسط فيه، ولا حكايه من اللي ياما سمعهم اللي بتتكلم عن ناس حياتهم خلصت قبل ماتبدأ، مع انه عارف ان الدنيا غدارة، وانها مش بتديك حاجة عايزها والا وبتاخد منك حاجة تانية اغلى، ورغم انه عارف ان مفيش حد بياخد كل حاجة، بس ده كله مبيمنعوش انه يزعل

لانه صعب على الانسان انه ميزعلش على ناس حبهم ومبقوش معاه دلوقتي لاي سبب، صعب انه ميحلمش وميبقاس عنده حاجة عايز يحققها والاصعب انه كل مايجي يحقق حاجة منها الدنيا تسدها في وشه، صعب انه كل مايمشي في طريق يلاقي اخره سد، صعب انه يعيش وهو عارف انه اجلا او عاجلا هيزعل على حاجة جديدة او من شخص بيحبه لان هي دي الدنيا مينفعش تطمنلها

بس عارفين ايه السهل، انك تضحك كل ما الدنيا تكشر في وشك وقولها بكرة تروقي وتحلي، كل ما تبدأ في حاجة وتلاقيها وقفت فجأة لاسباب غير معروفة اضحك واتأكد انك طلبت نمرة غلط وحاول بطريقة تانية، كل ماحاجة حلوة في حياتك تخلص وانت كنت فاكرها هتفضل معاك على طول اضحك واعرف ان النهاية دي ممكن تكون بداية حاجة تانية احلى، كل ماتخسر حد اضحك طالما مش انت السبب في خسارته، كل ما تقابل حد وتحس انه احسن منك اضحك لانك اكيد احسن منه في حاجة تانية وبدل ماتقارن نفسك بالناس دور جوه نفسك، كل ماتلاقي نفسك مستنيه فرحتها الكبيرة ومستنيه حد يشاورلها على طريق السعادة المنور اللي هتمشي فيه اضحك وقوم دور بنفسك، كل ماتلاقي نفسك مخنوق من غير سبب واضح اضحك وقوم اعمل حاجة بتحبها، كل ما تقابل حاجة صعبة اوي، جامدة اوي في حياتك وتلاقي نفسك حاسس انك مش قادر ولا عارف تعديها، ازعل علشان ده الطبيعي وبعدها اضحك لانك لسه فيك نفس، يعني الحاجة دي مقضيتش عليك

اضحك حتى لو محققتش اي حاجة في حياتك طالما حاولت علشان رغم ده لسه قادرتضحك، اضحك لان الدنيا دي زي المرجيحة يوم تحت ويوم فوق، بس عمرها ماهتبقى فوق على طول ولا تحت على طول برضه











































9 comments:

♥●• İzdihër •●♥ said...

The happiness of your life depends upon the quality of your thoughts: therefore, guard accordingly, and take care that you entertain no notions unsuitable to virtue and reasonable nature." ~ Marcus Aurelius


Superb post :)

هديل مصباح said...

everyone can create his own happiness :)
thx efrah

Laila Abd El Hady said...

Bgd chapeau ya Hadeeeeeeeeeeeeeeeee : ) Love it♥♥

هديل مصباح said...

laila ana 5adt chapeaus keter 2bl keda :D howa elchapeau lama bykber byb2a eh ? :D

Hanan Dahab said...

Totaly agree with Laila, Chapeau ya Hadeeeeeel, I think el chapeau lama byekbar beyb2a chapeau kebeeeeeeeeeeerrr awey, bgd 7elw awey and keep laughing :D:D

هديل مصباح said...

:) i wish the same to u ya hanan

Anonymous said...

المشكله يا هديل ان الحزن و الفرح ذي الملح و السكر ، كل ما زادت نسبة احدهما على الآخر ، زاد تأثيره في حياتنا

و لكي ان تتخيلي ان مقالك الداعي للسعاده و الفرح مكون من 38 سطر ، 27 منهم في وصف الحزن واسبابه و 11 فقط في وصف السعاده

مش عارف ده معناه ايه ، يمكن قلمك انتي نفسك رافض يضحك على نفشه !!؟

Anonymous said...

على نفسه **

هديل مصباح said...

علشان انا قلمى زعلان وانا بحاول افرحه