أحساسك أيه لما بتبص لصورتك وأنت صغير؟
حالة استغراب غريبة بتجيلك، مش فاكر الشكل ده، وشك برىء مهما كان شكلك البراءة باينه عليه ... عينك بتضحك وبتلمع من الامل ... ضحكتك صافيــــــــــــة من الودن للودن، ضحكة من القلب مبتحسهاش دلوقتي في أي صورة من صورك مهما كانت حلوة. هتتجنن وتعرف شكلك دلوقتي ده جه منين؟
ساعتها بتحس أنك نفسك ترجع بالزمن للوقت ده، لما كان أكبر أحلامك لبس العيد أو رحلة مع المدرسة، لما كنت بتقول أنا لما أكبر هطلع دكتور، لما كنت كل يوم بترجع مهدود من اللعب مع صحابك في بير السلم، لما كانت أكتر حاجة بتخوفك رد فعل بابا لما يشوف الشهادة أمو كحكة، وأكتر حاجة بتعكننك أكلة ماما عاملاها مش بتحبها، لما كنت بتتجنن لما حد يقولك أن كلام الميس غلط، وأكتر لحظات سعادتك لما تنكش في اوراق باباك أو تلخبط وشك بمكياج مامتك ،لما كنت بتقول لمامتك أنا مش هتجوز علشان مسيبكيش لوحدك، لما كنت بتجري انت وأخواتك علشان كل واحد فيكوا عايز يرد على التليفون الاول، لما كنت فاكر أن الخير دايما بينتصر على الشر زي في الافلام وأن كل المشاكل ممكن يحلها سوبرمان وان قصة حبك هتكون زي سندريلا والامير
نفسك تعيد الزمن وتعيش كل اللي عيشته من أول وجديد، نفسك في فرصة تانية تصلح فيها كل اللي بوظته في حياتك، حاسس أنك عايز تمسك نفسك اللي في الصورة وتقولها لما تكبري خلي بالك أن حياتك مش هتكون سهلة اسأليني أنا، بس مش أنتي لوحدك مفيش حد حياته سهلة، وأن هيجي يوم وأسألك أنا عايش ليه؟ وهبقى في قمة الاكتئاب، ساعتها قوليلي أنك طالما لسه ملاقيتش الاجابة يبقى أنت مدورتش كويس أو دورت في المكان الغلط لان مفيش حد مخلوق من غير لازمة وأن مجرد وجودك في الدنيا دي حاجة بتسعد أبوك وأمك وناس تانية كتير تعرفهم ومتعرفهمش ممكن تعيش حياتك عشانهم، حاولي تنبهيني للحاجات التانية الحلوة اللي في حياتي لما تلاقيني مش شايف غير الحاجات الناقصانى بس وقوليلي أن مفيش ضمان أن السعادة هتكون في الحاجات الناقصة، فكريني لما تلاقيني حلمت بحد وكنت فاكره أكبر أحلامي بس لاقيته ولا حاجة أن الكوابيس طول عمرها موجودة وأني أقدر أحلم تاني، لما تلاقيني حاسس أني محققتش حاجة في حياتي وأن كل الناس مشيت طريقها طمينيني وقوليلي أن الفرصة مضاعتش طول مانا جوايا نفس، متخلنيش أضيع وقت كتير في البحث عن معنى للسعادة وقوليلي ان السعادة أنك تعيش وتستمتع بكل لحظة حلوة مهما كانت بسيطة، زعقيلي لما تلاقيني مقضى حياتي شفقة عليها وعلى نفسى لان مفيش حد هيغير غيري ومحدش يقدر يغير غيرى ومفيش حاجة مينفعش تتغير، وقفيني لما تلاقينى بقول أشمعنى وكان ويا خسارة ويابخته كتير، إتريقي عليا لما تلاقيني ماشي باصص ورايا وقوليلي بكرة تقع على وشك، لو لاقتيني في يوم قلقان على نصيب أو رزق قوليلي متقلقش على اللي مش في ايدك، أياكي تخليني اعيش من غير امل ... اياكي تخليني أعيش ميت، فكريني بأحساسي لو لاقتيني ندمان على حد انا عرفته او حبيته قوليلي متندمش على احساسك .. اتعلم بس، لو لاقتيني عمال احارب علشان حد يحبني ولا يعجب بيا قوليلي وهما بقى عملوا أيه علشان انت تحبهم، لو لاقتيني بكره حد او مضايق من حد قوليلي متخليش ناس ملهاش لازمه تاخد مكان في حياتك انساهم وخلاص، لو لاقتيني ندمان على اي لحظة حلوة فاتت قوليلي بدل ماتندم عليها اتبسط انك عشتها، فجأيني بالمفاجاة الكبيرة كل ما تلاقيني ندمان أو قرفان أو زعلان اني حاولت فى حاجات كتير ومع ناس كتير بس محاولتش ولا مرة مع نفسي ومقدرتش أي حاجة عندي ولا حسيت باي حاجة عندى لاني زي كل البني ادمين عايز اخد كل حاجة
ساعديني أني أعرفك، لاني لا عارفك دلوقتي ولا فاكرك زمان
عارفة أيه هي الحاجة الوحيدة اللي متقدريش تجاوبيني عليها
هو شكلي بتاع دلوقتي ده جه منين؟
18 comments:
So deep! ana estawkaftny kaman fekret Cinderella.. de akbar wahm a7'ad mny wa2t 3ashan astaw3bo. bgad enjoyed reading it.. Keep it up dola
Enty 3rfa ya nihal enk aktar wa7da batbst lama y3gbk makal enty 3arfa leh wala nesety
so touched
Keeeeeeeeeeeeeep it Up ya Dolaaa bgd so talented msA♥♥
Mariam mabsota enha 3abtk :)
Yasmine rabena y5aliky thx sweety ♥
:)
Eh el ebtsama dy ????
Aked 3gbha ya dolly sa7 ya fedo :D
hya mesh bt3raf te2ra 2slan y dola 3alashan kda she smiled 2alt le nafsha mesh kan zmanay 2areetha now :P
aked ya Dola 3agbny awy :)) Dolly ya 2lsha..khoshy atkhmdy :P
7ader :O
lool ya dolly
Nice one dola :)
I like it
thx ya sahar :)
3ala eih. it's really nice. waiting 4 more!
thx again
plz read the rest of my articles in the blog
Post a Comment