الحظ لما يهادى ....... يخلى الاعمى ساعاتى

Tuesday 17 August 2010

اجرى يابن ادم جرى الوحوش ...... ياتلحق السى تى ايه يامتلحقوش 1


رحله كفاح المواطن المصرى مع المواصلات من الحاجات العظيمه اللى من المفروض تتدرس فى منهج تانيه اعدادى. بتحس كده ان فى تحدى بينه وبينها مسابقه كل واحد عايز يكسب فيها يعنى لو بتركب حاجه وكل يوم بتلاقيها زحمه لو نزلت بدرى مكن متجيش نزلت متأخر تلاقيها فاتتك فى اليوم بقى اللى تكون اجازه تلاقى الناس تقولك دى المواصلات كانت كتير والطريق فاضى وانت لما بتسمع كده بتبقى عايز تدفن نفسك علشان فاتتك الفرصه دى

انا مثلا بقيت لما بشوف السى تى ايه ماشى فى اى حته ببقى عايزه اعيططططططططططط واحشنى ياناس نفسى اشوفه من جوه انا مش عايزه حاجه فى الدنيا دى غير انى اركبه كل يوم واروح الشغل بكرامتى. اه والف اه اعمل ايه يعنى ده جزائى انى مردتش اجيب عربيه علشان مزودتش الازمه المروريه وقولت خليكى يابنتى مع الشعب


كل يوم الصبح بكون فى الشارع فى ميعاد السى تى ايه (احنا بيتهيألنا يعنى ان ده ميعاده) نظريه ميعاد السى تى ايه اعتقد ان ماما هى اللى مألفاها دايما تقولى اعرفى ميعاده وانزلى فيه المشكله بقى ان ماما متأكدتش من صحه نظريتها قولتولى ليه لان ميعاد السى تى ايه مش انه بيجى فى وقت معين لا ساعه معينه يعنى السى تى ايه بتاعى ميعاده من 8 ل 9 لو مجاش فى الساعه دى اعرف انه مش جى. ساعات ربنا بيكرمك وبتلاقيه وساعات بتعد تستنى و ومبيجيش وبتبقى مش عارف هل السواق راحت عليه نومه ولا هل الكائنات الفضائيه خطفت الاتوبيس بالسواق هتقولولى ممكن جه ومشى هقولوكم ان السى تى ايه ده عامل زى المصريه للاتصالات بيقربنا كلنا بتلاقى ان الناس اللى السى تى ايه ظالمهم ومش عايز يحن عليهم فى الفه غريبه بينهم وعادى انك تلاقى اى حد فيهم يجى يسألك هو السى تى ايه عدى. ساعات بقى يجى وميرداش يقف تخيلوا احساس الواحد وامله بيضيع قدام عينيه


غير كده الواحد بيفقد هيبته قدام الناس يعنى ايه منظرى وانا ساعات بقف بالساعه استناه ومبيجيش ومش بشاور لاى حاجه تانيه طبعا الناس اللى بيبقوا واقفين معايا فى الشارع بيبقوا مستغربين انا عارفه انهم نفسهم يسألونى انتى مستنيه ايه ...... ماهو عندهم حق كل يوم بأف انا وهما كل واحد فيهم ربنا بيكرمه وبيركب ويروح لحاله وانا بفضل واقفه مستنيه المجهول انا بحس ان فى اجيال بتعدى عليا وانا لسه واقفه يعنى الناس دى ممكن ترجع من الشغل تلاقينى لسه واقفه انا خايفه العمر يمضى وانا لسه مستنيه. مش دى بس المشكله السى تى ايه اللى انا بركبه لونه ازرق وفى سى تى ايهات تانيه بتعدى فى الشارع بس لونها احمر, فيوم السى تى ايه لعب معايا الدنيئه شوفتوا من بعيد لاقيته احمر قلت مش بتاعى لما عدانى لاقيته ان هو بتاعى بس لونه احمر السى تى ايه فاكر نفسه فى فيلم المهمه المستحيله بيغير لونه علشان الناس متعرفهوش


الغريبه بقى انك ممكن تلاقى ان فيه مواصله مهمه (السى تى ايه مثلا) مفيش غيره اللى بيروح مكان معين وبيجى كل سنه مره. ولو جه ممكن واحد بس اللى يجى طول اليوم. يعنى انا عندى بس شويه سؤالات بسيطه هل باقى السواقين واخدين اجازه عارضه ولا هل مفيش غير اتوبيس واحد ولا هل بيستلفوا الاتوبيسات تشتغل على خط تانى هو مفيش غبره بتاع مصر الجديده كل يوم وانا مستنيه المجهول ساعات بيعدوا4ورا بعض واحنا الغلابه اللى بيروحوا المعادى بيجلهم واحد بس

مش كفايه اننا صابرين عليه قالك..... الاتوبيس المكيف..... قال مش كفايه ان السواق خد التكيف ركبه فى بيته وسكتنا قلنا حرام برده طباخ السم بيدوقه وبقى الاتوبيس من غير تكييف, مش كفايه اننا مش بنلاقى مكان نعد والناس بتبقى طالعه من الباب وبتبقى ناقص تاخد كرسى السواق, انا ساعات بحس ان الناس كلها بتشتغل فى المعادى. فاكرين السى تى ايه ده زمان اول مابدأ كان نضيف وفيه تكييف والسواق كان عنده ميك اكيد طبعا السواق اداه لابنه يعمل بيه شات يعنى هو مالوش نفس

ولما السى تى ايه مبيجيش بركب ايه بقى المترو, المترو بقى احد مأسى مصر الحديثه هو صحيح الواحد مش عارف كنا عايشين ازاى من غيره بس الواحد برده مش عارف احنا عايشين ازاى بيه

احلى زحمه بقى على الصبح تلاقى شباك تذاكر واحد بس هوه اللى شغال والباقى تلاقى الشباببك مقفوله وكل شباك واقف وراه الراجل بتاعه متظلمهمش ياجماعه يمكن عاملين اضراب, طبعا الشباك الوحيد اللى شغال الطابور (اذا كان الناس عاملين طابور) واصل لغايه المعادى يعنى اخر واحد فى الطابور مش محتاج يركب المترو هو خلاص وصل

تيجى تركب المترو تلاقى الناس اللى نازله ينزلوك معاهم ولما تيجى تنزل الناس اللى هتركب يطلعوك تانى والواحد فى المترو مسير مش مخير. راحوا عاملين ابواب للنزول وابواب للركوب والست الالكترونيه نابحه صوتها طول النهار علشان تقول للناس لكن ايه هو بمزاجهم الناس تركب من الباب اللى عايزه تركب منه وتنزل من اللى هى عايزاه ولو قلتلهم ده علشان الزحمه والنظام يقولولك ايه ن..ظ..ا..م يعنى ايه


وازاى يعنى يعملوا عربيه للسيدات الرجاله متركبش فيها يعنى ايه. كده طيب هنركب برده وتيجى تكلمهم يقولولك عادى اننا نركب بعد 9 بليل وممكن تكون الساعه 9 الصبح. يعنى احنا سيبنالكوا المترو كله تركبوه وبنركب عربيتين بس لازم تيجوا تزاحمونا فيها لا تلاقيهم راكبين فيهم وقاعدين كمان وبيعملوا للعسكرى اللى واقف بره باى باى نعمل ايه ماهما فعلا ماتوا فى 73

وبعدين هو المترو نظام التهويه فيه ايه علشان السؤال ده محيرنى. الواحد مش عارف هو وسيله مواصلات ولا وسيله انتحار الواحد بيركبه سليم ينزل عنده كل امراض الدنيا. فاكرين المترو ده زمان اول ماتعمل كان نضيف

انا عارفه انى قلبت عليكوا المواجع علشان كده كفايه عليكوا كده النهارده وعلى فكره انا لسه موصلتش للشغل




To be continued




16 comments:

Amy said...

I like - fe3lan elmowaslat fi baladna ma2saaaaaaaaaah :'(

Anonymous said...

هههههههههههههههههه
ضحكتنى يا هديل فكرتني لما كنت بروح معاكي المعادي من غير عربية
وكنا بنشوف مصايب
المهم بتشوفي الناس هماهما بتوع زمان ولا لا

هديل مصباح said...

thxxxxxxxxxxxxxx amy 3andek 7a2 walahy entazry el goz2 el tany

هديل مصباح said...

فاكره ياهاله كانت ايام انا لسه بعيشها لغايه دلوقتى
لا كل الناس اتغيرت ماعدا انا هههههههههههههه

Doaa Abd El-Hady said...

el CTA faker nafso f film el mohema el mosta7ila :D:D msh fahma ezay da7aktiny :D:D

waiting for the next part

هديل مصباح said...

‎7ta el CTA bytrag 3la aflam :D:D:D:D, gay mat2l2esh

Mariam Gaber Mohamed said...

heheheehehehehe :D:D can't stop laughing :D gamda aweeeee waiting next part ba2a :D hadeeeeeeeeeel lazem el kalam da yenzel f ktab ba2a bgd

Dolly Badr said...

hehhehehehheheh gamd 2wy y dola :D

Laila Abd El Hady said...

Ya Hadeeeeeeeeeeeeeeeeeeeee enaha la kaweya w tab3an mestaneyeen part 2 ba2a :D :D 3agabatny el mohema el mosta7ila awy :D:D

هديل مصباح said...

thx mariam :D:D gay 2oryeb isa. walahy ana kaman nefsy ed3y enty bas e7na fe ayam moftrga
dah el3sham bardo ya dolly
elwa7ed mesh 3arf yao5t laila y3mel eh e7na fena men el7agat de

Gehan Bahnihi said...

gamda gedan ,,,,,3ala feka de moshkilt 7ayati,,,,

هديل مصباح said...

thx gehan we 7ayati ana kaman :)

dido said...

msh adra ya DoDooooo Hamoooooooooot mn el De7k walahy ,, Faze3aaaaaaaaaaaaaaaaaaa

هديل مصباح said...

thxxxxxxxxxxxxxxxxxxxxxxxxx dina

Dina NabHan said...

to7faaaaaaaaaaaaaaaa gdn bgd enty malkesh 7al :D

هديل مصباح said...

hehehe ba3d ma3ndakom