الحظ لما يهادى ....... يخلى الاعمى ساعاتى

Thursday, 30 December 2010

2010


مش هتكلم عن 2011 انا لسه معرفهاش انا عايزة اتكلم عن 2010 عايزه الحق الست الطيبه دى قبل ماتمشى وتبقى ماضى عايزه اتكلم عليها وهى لسه حاضر وهى لسه موجوده

فى حاجات كتير اتغيرت فيا السنه دى يعنى يوم زى رأس السنه وعيد ميلادى كانوا مواسم اكتئاب بالنسبه لى، مانا معملتش حاجه فى السنه القديمه علشان ابقى مبسوطه اوى ان الجديده هتشرف، وكان دايما السؤال اللى بيطرح نفسه فى اليومين دول طب وبعدين يا هديل هتفضل السنين تعدى عليكى كده وانت مبتعمليش اى حاجه؟

ده غير ان فى حياه كل حد فينا مجموعه من الناس اللى ليهم اضافات عظيمه لحياته زى ياحرام انت خريجه سياسه واقتصاد وبشتغلى كده مع انى والله بشتغل شغلانات محترمه يعنى لا بنشل فى الموالد ولا حراميه غسيل ولا حاجه، سؤال تانى انت عندك كام سنه لو الاجابه فيها حاجه وعشرين السؤال اللى لازم يجى بعده متجوزه؟

طيب انا لا بشتغل سفيره علشان انا سياسه واقتصاد ولا متجوزه ولا مخطوبه ولا حتى بحب فى قصه حب وده طبعا كان قمه الفشل من وجهه نظر الناس ومن وجهه نظرى انا كمان، انا كنت بفكر كده كل ما عيد ميلادى يجى ولا سنه جديده اسأل نفسى اشتغلت حاجه قريبه من دراستى لا طيب لاقيت اللى امه داعياله برضه لا وخاف واقلق من اللى جاى مانا ماشيه فى سكه اللى يروح ميرجعش بقيت الاستثناء بتاع القاعده اللى بتقول الواحد يا ينجح فى الشغل يا بنجح فى الجواز وانا الحمد لله محققتش حاجه فى الاتنين

واللى زود الطين انى كنت مش لاقيه نفسى فى ولا شغلانه انا اشتغلتها واعد اقول لنفسى، دانا سياسه واقتصاد ازاى اشتغل حاجه اى حد ممكن يشتغلها، وكتير من صحابى اتجوزوا وباقى الناس اللى كانوا معايا فى الكليه اللى اتأخر منهم فى الجواز اتجوز بعد سنتين من التخرج كائن السنتين دول كانوا موسم التزاوج بتاع سياسه واقتصاد بس انا منفعش اشترك فيه اصلى كنت فى الحمام

كان نفسى الاقى نفسى بس مكنتش بدور عليها تقريبا كنت مستنياها هى اللى تلاقينى، لغايه ما فى يوم وانا فى شغلانه من الشغلانات اللى محبيتهمش واحده صاحبتى كانت بتكلمنى عن بلوج باباها ودى الشهاده لله كان اول مره اسمع فيها عن موضوع البلوجات ده، قولتلها الله يعنى انا كمان ممكن اعمل بلوج واكتب فيه، وبعد ماعملته ملقتش حاجه اكتبها فقولت خلاص انا هكتب عن الحاجات اللى قابلتها فى حياتى

لما بدأت اكتب حسيت انى لاقيت نفسى وهى كمان لاقيتنى مكنتش بفكر مين هيقرا علشان الكتابه كانت حاجه بتسعدنى فكده كده انا هكتب سواء حد قرا (صحابى يعنى) او محدش قرا خالص

صاحبتى دى برضه هى اللى قالتلى اعملى جروب على الفيسبوك، انا مكنتش بفكر فى الموضوع ده خالص اصل مين اللى هيدخله انا عن نفسى لو شوفت جروب زى ده مش هدخله، ولما لاقيت الناس بتدخل وتقرا وتقولى حلو الحاجات اللى بتكتبيها مكنتش بصدق واقول معقول

فى 2010 اخيرا بقت بعمل حاجه وبقى عندى هدف هو صحيح اتأخر بس الحمد لله انه جه فى الاخر، مبقاش بيفرق معايا عيد ميلادى والسنين اللى بتروح وتيجى علشان بقيت بعمل حاجه عايزه اعملها مش مفروضه عليا علشان بس كل الناس بتعملها

انا عايزه اقول لكل الناس اللى بعد مابتقرا بيبقى عندها وقت لسه تقولى فيه انت بتكتبى حلو، انتوا مش عارفين كلامكوا ده بيفرق معايا ازاى انا عايزه اعرفكوا كلكوا فى الحقيقه، انا نفسى كلكوا تكونوا بتعملوا حاجه انتوا بتحبوها علشان تحسوا باللى انا حساه، كتير منكوا بيقولى انت بتقولى اللى جوانا لانه جوايا انا كمان انتوا كمان لو قررتوا تكتبوا عنه اكيد هيبقى حلو لانه حاجه حقيقيه انتوا حاسين بيها

انا فى 2010 اتعلمت ان الفشل مش انك متكونش زى الناس الفشل انك تقارن نفسك بالناس لانك طول مابتعمل كده لا هترضى عن نفسك ولا هترضى عن الناس، وزى مافى ناس فى حياتك بتحبطك فى ناس تانيه بيعملوا منك حاجه، انا عارفه انى لسه ولا حاجه بس انا بقيت عند نفسى حاجه وده المهم

انا كواحده من المشاهير دلوقتى يعنى فى 2 تقريبا يعرفونى احب اقولكم اخبارى فى السنه الجديده ان شاء الله الكتاب هينزل فيها























Friday, 24 December 2010

يا واد يا تقيل خليك تقيل

يقولولك ايه الاعجاب اخرته حب ده الطبيعى، لكن نقول ايه بقى على الاعجاب اللى بيفضل اعجاب اكيد ده مش طبيعى

الولد يبقى معجب بالبنت وعنيه هتطلع عليها كل يوم وكاتم فى قلبه وساكت، طبعا البنت واخده بالها بس تعمل ايه بقى غلبانه اذا كان الولد اللى المجتمع مديله كل الصلاحيات علشان اسم النبى حارسه ذكر كاتم الاعجاب فى قلبه وبيعجب فى صمت فهى بقى لا تملك الا الانتظار على امل انه هيتشجع فى يوم من الايام ويجى يقولها الساعه كام

بس حتى وهى مستنيه بتعد تفكر وبعدين فى الولد ده بقى، هو عايز ايه؟ مبيزهقش دة ولا ايه والله شكله كده تبع حزب ابص اه لكن اتكلم لا، وتحضر فى دماغها الكلام اللى عمرها ماهتقوله الحمد لله المجتمع سابلنا الخيال، تعد تتخيل نفسها بتقوله بص يابن الناس انا تعبتلك بجد ما كتر مابتركز معايا كل يوم حاسه انك بقيت تعرف عنى اللى انا معرفوش، تكونش معجب بطريقه لبسى انا ممكن اقولك بجيبه منين عادى على فكره ماتخفش مش هاخبى عليك، ولو عينك من لفه الايشارب انا برده زى اختك وممكن اعلمهالك، اما بقى لو شايف انى عندى شنط وجزم كتير انا هاشورلك على المحل ده قريب ميتوهش

لكن مقدرش اعمل اكتر من كده مانا مش عارفه وانا لو اعرف اقول اعلى طول، هو صحيح انا فضلت كتير بسأل نفسى ليه البنات لازم تستنى لما الولاد يعجبوا بيهم وينولوا شرف اختيارهم ليهم، ليه لازم يكون الولد الفعل والبنت رد الفعل، ماهى البنت كمان ممكن يعجبها حد وتبقى عايزه تتعرف عليه

بس دلوقتى عرفت ليه، ليه لازم انتوا اللى تتعبوا علشان توصلوا لاى بنت، لان اى ولد هيطلع عين البنت اللى عجباه عقبال مايقولها انه معجب بيها وهايشيطلها دماغها عقبال مايقولها بحبك وهايجبلها شلل رعاش عقبال مايقولها انه عايز يتجوزها وفى الاخر هايسبها علشان سبب من الاسباب المهمه مثلا زى الدنيا بتمطر

ولو هى اللى بدات وقالتله انها معجبه بيه حتى لو الموضوع مشى فى الاول وهو 99% مبيمشيش لانه هيفضل فاكر انها كانت جريئه زياده عن اللزوم واسس التربيه عندها ملخلخه اصل بابا وماما كانوا مش فاضيين وفى الاخر برده هيسبها علشان الدنيا بتمطر

طب حط نفسك مكانى احساس ان فى حد مركز معاك وعارف انت بتتنفس كام مره فى الدقيقه معجب بقى ولا مش معجب احساس يضايق ويخنق، بص انا معاك ان البنات بتحب الولد التقيل ومبتحبش الناس اللى بيريلوا على اى حد، بس البنات مش هاتترمى عليك لمجرد انك تقيل، فاتقل زى مانت عايز وانا كمان هاتقل ونشوف مين بقى اللى اتقل من التانى

اذا كنت فاكر ان البنات لسه زى زمان بتنشغل بأى نظره ولا اهتمام احب اقولك اننا لتغيرنا كتير اوى، اه لسه بردوا بننشغل ونعمل قصص من الهوا لمجرد ان حد ساب كل الناس وجه سألنا الساعه كام، لكن كمان معظمنا جرب وجع القلب فمبقناش بنجرى وراه بالمشوار، ولا بقينا بندى اعذار، ولا بقينا ساعات بناخد الخطوه الاولى علشان بقينا عارفين ان الخطوه التانيه ممكن متجيش

يعنى انا لا هاسهلك الموضوع، ولا انا اللى هاجى اسألك الساعه كام، ولا هاشغل تفكيرى بيك، ولا هاهتم اعرف اسمك ولا اى معلومه عنك، ولا هاديك فرصه تتكلم معايا حتى لو طلعت معايا فى الشغل، علشان انت ضيعت فرصتك ومعملتش حساب انك اكيد مش هتفضل تشوفنى كل يوم، وانا مش هينفع اخسر فى الاول وبرده فى الاخر تيجى تقولى الدنيا بتمطر






Thursday, 2 December 2010

يعنى ايه صاحب؟

ليا واحدة صاحبتى كنا صحاب اوى ايام المدرسة وبعدين معرفش اية اللى حصل بقيت اعرف عن بواب عمارتنا اكتر ماعرف عنها مع اننا ساكنين فى نفس الشارع لكن بعدنا والدنيا خدتنا وحتى مبقيناش بنشوف بعض، وانا بقى فضلت طول عمرى حاطة الموضوع دة حلقة فى ودنى ..... ورقبتى ..... ومعلقاه فى مخى كمان .....، معرفش لية يمكن علشان الواحد ايام المدرسة كان عندوا يدوب كام صاحب يتعدوا على الصوابع فبالتالى خسارة اى واحد فيهم تمثل خسارة فادحة فى ميزان صداقاتة او يمكن علشان انا كنت بحبها اوى رغم شخصياتنا المختلفة وعيوبها الكتير وعيوبى الاكتر او يمكن علشان دايما صحاب المدرسة عاملين زى الخبطة اللى بتعلم كل ماتشوفها تحاول تعرف اية اللى خلاك تتخبط بس مبتعرفش

المهم انا خدت واديت مع نفسى واتفقت معاها انى مش هاخسر صاحب تانى مهما حصل، لانى دايما بشوف اللى معندوش صحاب غلبان اوى حتى لو كان مبسوط بحالة كدة وعمرى مافهمت ازاى الواحد ممكن يعيش من غير مايكون فى حياتة حد دايما فاكر انة بيحبه اكتر من اخواتة بس هو فى الحقيقة بيحبه اد اخواتة، ازاى معندوش حد بيفهمة اكتر من نفسة مهما كدب علية، حد يعقلة ويمنعة يعمل حاجات لو عملها هيفضل يضرب نفسة بالجزمة طول عمرة، حد يعد ينصح فية ويخنقة من كتر النصايح كأنه مصاحب الحكيم لقمان، حد تجرى علية وتكلمة اول ماتكون فرحان ولما تزعل هو اول واحد يعيط معاك، حد يعملك قرد علشان يبسطك ولو اتبسط ينزل يرقص معاك فى الشارع، حد يزعقلك لما تعمل حاجة غلط كأنة معرفش يربيك، حد يحسسك انة اكبر منك وعارف كل حاجة مع انة كتير ممكن يكون اصغر منك، حد دايما بيفكرك بعيوبك اللى لازم تغيرها كأنة هو كامل كمال الكامل، حد اول ماتتخانق معاة بتقول لنفسك انا خلاص زهقت بقى وبناقص وبعدين بتلاقى نفسك لا اراديا بتكلمة تانى، حد بتلاقية اول واحد جنبك لما تقع واول واحد جنبك لما تقوم، حد فى يوم فرحك يبقى فرحان وبيعيط يمكن اكتر منك، حد بيحبك زى مانت بهبلك، باحباطك، بترددك، بالتعب اللى فى دماغك، بنيلتك الكحلى، بقصصك الفاشلة، بذوقك الوحش، بكل عيوبك حتى لو كان عندك ميزة واحدة بس

وحاولت بقى بقدر الامكان الحفاظ على اللى باقى من صحاب المدرسة، مهم دول تراث الواحد اللى هيكمل علية بعد كدة امال يعنى لما يروح الجامعة هيقول لمين ان الدنيا وسعت علية اوى من غيرهم ويعد يلعن فى مكتب التنسيق اللى فرق مابينهم وكل يوم بليل يفكر فى التحويل لكليتهم حتى لو كانوا هما طب وهو فى اعلام ويبقى مش مصدق انة بقى بيعمل كل حاجة لوحدة ومبقاش لاقى حد يتمشى معاة لغاية الجامعة وبقى مضطر يعرف ناس تانية يكملوا معاة مسيرة الجامعة بعد ماكانت حياتة مفيهاش غير اهلة وصحابة بتوع المدرسة

كنت فاكرة انى عمرى ماهحب صحاب الجامعة زى المدرسة، بس دة كان فى الاول لكن بعد كدة لاقيت ان صحاب الجامعة بيبقى ليهم معزة خاصة فى قلب الواحد، معزة متقدرش متضحكش لما تفتكرها وتفتكر دنيتك اللى عرفتها معاهم واحلامكوا اللى كنتوا لسة بترسموها مع بعض، احساسك وانت رايح الجامعة كنت بتكره اوى تروح المدرسة بس كنت بتحب اوى تروح الجامعة، المحاضرات اللى كنتوا بتناموا فيها، الاسئلة اللى ياما اتسألتوها وعمر محد فيكوا عرف يجاوب حاجة فيها، لما كنت انت اللى بتتكلم وفى الاخر هما اللى يتطردوا من المحاضرة، ضحككوا على الدكاترة، السينما اللى كنتوا بتروحوها بين المحاضرات، والمحاضرات اللى كنتوا بتفوتوها علشان تقفوا قدام الكلية، قصص اعجابكم الصامت الكتيرة اوى بولاد الكلية، بندم ايام الامتحانات لانكوا مش عارفين هتذاكروا منين ولا خدتوا اية اصلا، حاجات كتيرة اوى متتعوضش ذكريات اربع سنين بالعمر كلة بتفتكرها كلها لما تروح فرح حد منهم مش مصدق ان الاحلام بقت خلاص حقيقة وصحابك بتوع امبارح هيبقوا خلاص امهات

لكن الدنيا بترجع توسع اكتر المرة دى لانك لا معاك صحاب المدرسة ولا حتى الجامعة لوحدك كومبلتلى مع نوعيات الناس موردتش عليك قبل كدة، وكتير فكرت انى كفاية عليا الصحاب اللى عندى لانى مهما صاحبت مش هقابل ناس وفية زى بتوع المدرسة ولا زى اوى زى بتوع الجامعة، لكن الواحد ميقدرش يعيش من غير صحاب فى الشغل طيب مين هيكلمة لما يتأخر يشوفة مجاش علية، مين هيغطى علية ويروحوا هما الاتنين فى داهية فى الاخر، مين هيعد يعملة حركات بتضحك لما يكونوا فى اجتماع، مين هيعد يسألة من اول اليوم هناكل اية النهاردة، مين هينزل معاة بعد الشغل يشترى هدوم علشان عندة عيد ميلاد، مين هيسيب الشغل علشانة ويعد يحللة فى مشاكلة، مين هيعد يعمل معاه خطط علشان ياخد اجازة، مين اللى هيخلية قادر يروح الشغل كل يوم علشان عارف انة موجود هناك

بس بردة لما بعد مع افكر مع نفسى بالاقى انى رغم كل محاولاتى خسرت ناس منهم، علشان مبقيناش بنكلم بعض، او علشان اتخانقنا مرة وكل واحد اتمسك بموقفة وفضلنا على كدة وبقى البعد هو الطبيعى والقرب هو اللى صعب، او علشان اسباب من تفاهتها ساعات حتى مبتعرفش تفتكرها من اللى زى الاكسيل بيتحول عربى ازاى وهوب خسرنا بعض ومبقيناش بنكلم بعض تانى

لكن اللى انا عارفاة دلوقتى ان الخسارة صعبة وكبيرة اوى، عمرك مبتفهم ازاى حد كان عارف عنك اكتر من اللى يعرفة عن نفسة دلوقتى انت مش عارف هو فين وبيعمل اية، ذكرياتك مش عارف تفتكرها لان الناس اللى كانت معاك فيها مبقوش موجودين فى حياتك، خسرت ناس علشان اسباب مهما كانت كبيرة هيفضل دورهم فى حياتك اكبر منها بكتير اوى، بتعد تندم على حاجات مردتش تعديها وكنت شايفها كبيرة اوى فى ساعتها بس لما بتفتكرها دلوقتى مش بتصدق انك خسرت ناس علشانها وتعد تقول لنفسك لو كان كل واحد اتنازل شوية، بتلاقى نفسك نسيت حد حبيتة بس مش قادر تنسى حد كنت صاحبة