الحظ لما يهادى ....... يخلى الاعمى ساعاتى

Wednesday 15 September 2010

اجرى يابن ادم جرى الوحوش ........ ياتلحق السى تى اية يامتلحقوش 2

قال وانا كنت فاكره ان المشكلة بس فى السى تى اية المشكلة طلعت كبيرة اوى اكبر من السى تى اية بكتير هو صحيح لغاية دلوقتى بيجى واحد بس والناس طالعين من بابه اللى ورا واللى قدام وطبعا لو اى حد تانى شاورلة ممكن السواق يشتمة

المشكلة ان المدارس دخلت يعنى حتى لو نزلت الشارع الساعه 6 الصبح هتلاقى فيه ناس وكميه عيال هما ليه المصريين مسمعوش كلام الست كريمة مختار لما قالتلهم نظموا الاسرة كانت حاجات كتير اتغيرت

ومع دخلة المدارس يتلاقى الشوارع اتملت عيال منهم اللى رايح مدرستة ومنهم اللى رايح يلعب قدام المدرسة ومش هيدخلها والناس اللى فى كليات منهم اللى رايح يشوف محاضرتة ومستقبلة ومنهم اللى رايح يتسكع ويصيع فى الجامعة مهو ده مستقبلة برده معلش يعنى بنتقل عليهم الصياعة واللعب ممكن فى اى وقت مش لازم الصبح فى ناس رايحة تشوف اكل عيشها وبتلاقى ناس تانيه رايحة شغلها مكنتش بتشوفها قبل كده اكيد يعنى مش كلهم بيشتغلوا مدرسين واساتذة جامعة وحتى لو بيشتغلوا اداريين فى مدرسة ولا كلية دول بيروحوا كل يوم ملهمش علاقة يعنى الدراسة بدأت ولا لا. طول مانت واقف بقى عمال تفكر الناس دى جت منين خلاص بقى مش بتفكر فى السى تى اية ماهو خلاص جة والحمد لله اتأكدت ان الناس ركبتة وهتروح شغلها وعملتلة باى باى وهو ماشى. والمترو مش لاقى حاجه توديك علشان تركبة متفهمش لية اول مالدراسه تبدأ بتختفى الميكروباصات

سئل المواطن ركبت ميكروباص قال اه طيب جريت وراه قال لا يبقى مركبتوش. الميكروباص وسيله مواصلات مصر الشعبيه هو وابن اخته التوك توك بقى موجود فى كل منطقة والناس بتستسهل تركبها عن المترو والاتوبيس

لو سافرت اى مكان بره ولقيت حد راكب ميكروباص اعرف انه مصرى على طول ده لو لقيت ميكروباص اصلا. المصريين فى اى حته ميقدروش يعيشوا من غير مايجروا ورا ميكروباص. هما يجروا والميكرواص يجرى منهم السواق مش عايز يقف بس على مين وراه. انت لو واقف فى شارع ممكن تلاقى ان كل الناس اللى واقفه بتجرى ورا ميكروباص واحد كلهم متفهمش ازاى مع انه معروف علميا ان الميكروباص 14 راكب بس يعنى اكيد الميكروباص مش هياخد كل دول ومع ذلك بيجروا كل واحد بيبقى عنده امل ان هو اللى هيركب وبيستعمل كل الوسائل اللى تساعده على كده من زق وشنكله وخبط ورزع خناقات وشتيمه ستات على رجاله ولاد على بنات كله بيزق كله المهم يلاقى كرسى ولما تقولى لحد حاسب او خلى بالك يقولك هو انا جيت جنبك مفيش حاجه اسمها البنات تركب الاول ولا الستات اللى معاها عيال الواحد مش عارف هو موضوع ليدز فرست عمره كان موجود اصلا

فى ناس ليها سياسه تانيه مع الميكروباص انها متركبش الميكروباص اللى ناس بتتخانق عليه وتستنى لما يجى واحد تانى وبتبقى مبسوطه اوى لما تلاقى ان معظم الناس ركبت الميكروباص الاولانى فبتطمن انها اكيد هتعرف تركب الميكروباص التانى لكن الميكروباص بيتاخر والناس بتكتر تانى ولما يجى تلاقى نفس المنظر الاولانى دول ممكن يعدوا طول اليوم بيحاولوا يركبوا ميكروباص

ساعات مش بتلاقى ميكروباصات اصلا مفيش متفهمش راحوا فين مع انهم على طول موجودين, المواصلات زى اى حاجه فى الدنيا عايزها متلاقيهاش مش عايزهها تلاقيها اكتر من الهم على القلب. او تلاقيها بس كلها مليانة يجى اللى بعدة مليان واللى بعدة واللى بعدة لدرجة انك ممكن تحس ان الميكروباص بيتصنع بركابة

لو ربنا كرمك ولاقيت واحد وخلاص افتكرت ان الدنيا هتضحكلك وهتروح الشغل فى ميعادك تلاقى السواق وهو ماشى لازم يسلم على سواق سواق من صحابه سواقين الميكروباصات والعربيتين يقفوا جنب بعض فى وسط الشارع علشان السواقين يتكلموا مش مهم الناس اللى وراهم ولا الشارع اللى وقف اكتر ماهو واقف ولا الناس اللى راكبه اللى وراها اشغال ومصالح المهم علاقات السواق الاجتماعية

السواقين فى وسط الزحمه بيبقى ليهم قرارات فجائيه السواق كقائد للميكروباص لازم يعدى بالميكروباص بتاعة من ازمة الشوارع المصرية يعنى ممكن بعد ماتركب يقولك انة هياخد طريق تانى علشان الزحمه او علشان يهرب من لجنة وانت ممكن يكون الطريق الجديد مش طريقك عادى فى اكتر من حيطة ممكن تخبط دماغك فيها او ممكن لو السواق قلبة حنين ينزلك يركبك ميكروباص تانى. برده من قرارات السواق انه يركب اكتر من حموله العربية الراجل عايز يفك ازمة فجأه تلاقى ناس جنبك من كل مكان ومش لاقى مكان تحط فيه رجلك ولا ايدك وبتبقى شبه قاعد يعنى مش فارقة بقى ولد ولا بنت راجل ولا ست المهم الصالح العام. علشان كده الميكروباص احسن مكان علشان تلزق فيه فى الناس وبيبقى مليان بالناس اللزيقه وقبل ماتفتح بقك هتلاقى واحد بيقولك انا جيت جنبك. او انة يطلع قرار من عندة ويزود الاجرة الحياة فرص

سواق الميكروباص برده لازم يكون انتقائى فى اختيار الركاب عادى يعنى انك تلاقى ميكروباص مش بيركب غير بنات بس وبيبقى دايما حاجز المكان اللى جنبة لصاحبتة وصحبتها او حجزة وخلاص كيفه كده ان محدش يعد جنبه

اى حد بيركب ميكروباص لازم يعمل حسابة انة لو ركب ميكروباص مش معناة خلاص انة هيمشى لازم يجيلة سواق ميكروباص تانى وياخد اقوالة ويعرف مين اللى قالة يركب دى هى الدنيا سايبة وممكن ينزلك بالعافية ويركبك ميكروباص تانى والموضوع ده طبعا بينتهى بخناقه بين السواقين وبيجى السواق يقولك العربية دى مش طالعة بعد ماكانوا بيتخنقوا عليك دلوقتى انت اللى مش لاقى شوفت البتر بيعمل اية. او انه فى اى وقت ممكن يدخل يمون وتلاقى ادامه طابور طويل عريض كأنهم بقالهم سنين ممونوش وكانوا ماشين بالطاقة الشمسية فبيبقى الاسهل انك تنزل تركب واحد تانى

تعددت الاسباب لعدم ركوبك الميكروباص فبتطر اطرارا انك تركب تاكسى اخر حاجة ممكن يفكر فيها المواطن المصرى دة لو لاقيت تاكسى يعبرك يعنى انت عايز طول عمرك متعبروش ويفضلوا السواقين يذمرولك يمكن تغير رأيك ولما تحتاجة تلاقية ببساطة كدة. وبردة ساعات مش يتلاقى ولا تاكسى كلهم زحمة لا ابيض ولا اسود ولا اى الوان تانية

فى سؤالين محيرنى لية دايما لما تركب تاكسى والدنيا حر وزحمة والشارع واقف تلاقى ان الشباك اللى جنبك مش بيتفتح ولية السواق بس هو اللى بيعرف يفتح الباب

متفهمش سواق التاكسى عايز يروح فين تقولة مكان قريب يقولك لا تحس انك لازم تقولة اسكندرية علشان يرضى ولو هيوديك يعد يلف بيك يلف بيك علشان المكان يبقى بعيد وياخد فلوس اكتر طيب مكان بعيد يبصلك كده كأنك شتمتة ويسيبك ويمشى

وياسلام بقى لما تركب تاكسى وتقولة ودينى المترو مثلا يقولك ماشى وبعدين تحس ان مش هو دة الطريق فتقول لنفسك يمكن طريق مختصر وبعدين يقولك نازل فين ياباشا تقولة انزل فين دة مش المترو يقولك مترو انت مش قولت بترو

ولو فى شارع طويل شوية ومش بتقدر تمشية فدايما بتركب تاكسى ودايما بتدفع 2 جنية اصلة شارع لازم يطلعلك مرة سواق يقولك انا عايز 5 فتقولة 5 لية هو انت ودتنى اسكندرية

فى سواقين بيحبوا يحسنوا علاقات الراكب بدل مانت قاعد لوحدك يقوموا مركبين ناس تانية معاك من غير ميقولولك وممكن يعدوا جنبك كمان الحق علية يعنى عايز يسليك

من المعروف انك لازم تقك قبل ماتركب تاكسى علشان ميجيش يقولك مش معايا فكة ومفيش حد تفك منة فتقولة خلاص لكن هو لو عايز منك ربع جنية زياده يقولك مش مسامح

لية السواق لازم يحط ابداعاتة الفنية ولو راكبين اكتر من واحد ووكل واحد نازل فى حتة يقولك اية انتوا راكبين ميكروباص الواحد تببقى عايز تقولة لو كنا لاقينا واحد مكناش عبرناك

انت اللى غلطان اصلا حد قالك تنزل من البيت